Musa anayabariki makabila

¹Hii ndiyo baraka Musa mtu wa Mungu aliyotamka kwa Waisraeli kabla ya kifo chake.

²Alisema:

“Bwana alikuja kutoka Mlima Sinai,

akachomoza kama jua juu yao

kutoka Mlima Seiri,

akaangaza kutoka Mlima Parani.

Alikuja pamoja na watakatifu makumi elfu

kutoka kusini,

kutoka miteremko ya mlima wake.

³Hakika ni wewe ambaye huwapenda watu,

watakatifu wako wote wamo mkononi mwako.

Miguuni pako wote wanasujudu,

na kutoka kwako wanapokea mafundisho,

⁴sheria ile Musa aliyotupatia sisi,

tulio milki ya kusanyiko la Yakobo.

⁵Alikuwa mfalme juu ya Yeshuruni[#33:5 maana yake Yeye aliye mnyofu , yaani Israeli]

wakati viongozi wa watu walipokusanyika,

pamoja na makabila ya Israeli.

⁶“Reubeni na aishi, asife,

wala watu wake wasiwe wachache.”

⁷Akasema hili kuhusu Yuda:

“Ee Bwana , sikia kilio cha Yuda,

mlete kwa watu wake.

Kwa mikono yake mwenyewe hujitetea.

Naam, uwe msaada wake

dhidi ya adui zake!”

⁸Kuhusu Lawi alisema:

“Thumimu yako na Urimu yako ulimpa,

mtu yule uliyemfadhili.

Ulimjaribu huko Masa

na kushindana naye

kwenye maji ya Meriba.

⁹Alinena hivi kuhusu baba yake na mama yake,

‘Mimi siwahitaji kamwe.’

Akawasahau jamaa zake,

asiwatambue hata watoto wake,

lakini akaliangalia neno lako

na kulilinda agano lako.

¹⁰Humfundisha Yakobo mausia yako

na Israeli sheria yako.

Hufukiza uvumba mbele zako

na sadaka nzima za kuteketezwa

juu ya madhabahu yako.

¹¹Ee Bwana , bariki ustadi wake wote,

nawe upendezwe na kazi ya mikono yake.

Vipige viuno vya wale wainukao dhidi yake;

wapige adui zake hata wasiinuke tena.”

¹²Kuhusu Benyamini akasema:

“Mwache mpendwa wa Bwana

apumzike salama kwake,

kwa maana humkinga mchana kutwa,

na yule Bwana ampendaye

hupumzika kati ya mabega yake.”

¹³Kuhusu Yusufu akasema:

“Bwana na aibariki nchi yake

kwa umande wa thamani

kutoka juu mbinguni,

na vilindi vya maji

vilivyotulia chini;

¹⁴pamoja na vitu vilivyo bora sana

viletwavyo na jua,

na vitu vizuri sana vinavyoweza

kutolewa na mwezi;

¹⁵pamoja na zawadi bora sana

za milima ya zamani

na kwa wingi wa baraka

za vilima vya milele;

¹⁶pamoja na baraka nzuri mno

za ardhi na ukamilifu wake,

na upendeleo wake yeye

aliyeishi kwenye kichaka

kilichokuwa kinawaka moto.

Hivi vyote na vikae juu ya kichwa cha Yusufu,

juu ya paji la uso la aliye mkuu

miongoni mwa ndugu zake.

¹⁷Katika fahari yeye ni kama fahali mzaliwa wa kwanza;

pembe zake ni pembe za nyati,

na kwa pembe hizo atapiga mataifa,

hata yaliyo miisho ya dunia.

Hivyo ndivyo yalivyo makumi elfu ya Efraimu;

hivyo ndivyo yalivyo maelfu ya Manase.”

¹⁸Kuhusu Zabuloni akasema:

“Shangilia, Zabuloni, wakati wa kutoka nje,

nawe Isakari, katika mahema yako.

¹⁹Watawaita mataifa kwenye mlima,

na huko mtatoa dhabihu za haki;

watajifurahisha kwa wingi uliojaza bahari,

kwa hazina zilizofichwa mchangani.”

²⁰Kuhusu Gadi akasema:

“Atabarikiwa yeye aongezaye milki ya Gadi!

Gadi huishi huko kama simba,

akirarua kwenye mkono au kichwa.

²¹Alijichagulia nchi nzuri kuliko zote

kwa ajili yake mwenyewe;

fungu la kiongozi lilikuwa limehifadhiwa

kwa ajili yake.

Viongozi wa watu walipokusanyika,

alitimiza haki ya mapenzi ya Bwana ,

na hukumu zake kuhusu Israeli.”

²²Kuhusu Dani akasema:

“Dani ni mwana simba,

akiruka kutoka Bashani.”

²³Kuhusu Naftali akasema:

“Naftali amejaa tele upendeleo wa Bwana ,

naye amejaa baraka yake;

atarithi magharibi na kusini.”

²⁴Kuhusu Asheri akasema:

“Aliyebarikiwa zaidi sana katika wana ni Asheri;

yeye na apate upendeleo kwa ndugu zake,

yeye na anawe miguu yake kwenye mafuta.

²⁵Makomeo ya malango yako yawe chuma na shaba,

nazo nguvu zako zitakuwa sawa na siku zako.

²⁶“Hakuna mwingine kama Mungu wa Yeshuruni,

ambaye hupanda juu ya mbingu ili akusaidie,

na juu ya mawingu katika utukufu wake.

²⁷Mungu wa milele ni kimbilio lako,

na chini kuna mikono ya milele.

Atamfukuza adui yako mbele yako,

akisema, ‘Mwangamize yeye!’

²⁸Hivyo Israeli ataishi salama peke yake.

Mzao wa Yakobo ni salama

katika nchi ya nafaka na divai mpya,

mahali mbingu hudondosha umande.

²⁹Ee Israeli, wewe umebarikiwa!

Ni nani kama wewe,

taifa lililookolewa na Bwana ?

Yeye ni ngao yako na msaada wako,

na upanga wako uliotukuka.

Adui zako watatetemeka mbele yako,

nawe utapakanyaga

mahali pao pa juu.”