Mpende Bwana Mungu wako

¹Haya ndio maagizo, amri na sheria ambazo Bwana Mungu wenu aliniagiza niwafundishe ninyi ili mpate kuyashika katika nchi ambayo ninyi mnavuka Yordani kuimiliki,

²ili ninyi, watoto wenu na watoto wao baada yao wamche Bwana Mungu wenu siku zote kwa kushika amri na maagizo yake yote ninayowapa, ili mweze kuyafurahia maisha marefu.

³Sikia, ee Israeli, nawe uwe mwangalifu kutii ili upate kufanikiwa na kuongezeka sana katika nchi inayotiririka maziwa na asali, kama Bwana , Mungu wa baba zenu, alivyowaahidi ninyi.

⁴Sikia, ee Israeli: Bwana Mungu wako, Bwana ni mmoja.

⁵Mpende Bwana Mungu wako kwa moyo wako wote, na kwa roho yako yote, na kwa nguvu zako zote.

⁶Amri hizi ninazokupa leo zitakuwa katika moyo wako.

⁷Wafundishe watoto wako kwa bidii. Nena kuhusu amri hizi uketipo nyumbani na wakati utembeapo njiani, ulalapo na uamkapo.

⁸Zifunge kama alama juu ya mkono wako, na uzifunge juu ya paji la uso wako.

⁹Ziandike kwenye miimo ya milango ya nyumba yako na juu ya malango yako.

¹⁰Bwana Mungu wako atakapokuleta katika nchi aliyowaapia baba zako, Abrahamu, Isaka na Yakobo, kukupa wewe, nchi kubwa, yenye miji inayopendeza ambayo hukuijenga,

¹¹nyumba zilizojaa vitu vizuri vya aina nyingi ambavyo hukuvijaza, visima ambavyo hukuchimba, na mashamba ya mizabibu na mizeituni ambayo hukupanda wewe, basi, utakapokula na kushiba,

¹²jihadhari usije ukamwacha Bwana , aliyekutoa katika nchi ya Misri, kutoka nchi ya utumwa.

¹³Utamcha Bwana Mungu wako, na umtumikie yeye peke yake na kuapa kwa jina lake.

¹⁴Usifuate miungu mingine, miungu ya mataifa yanayokuzunguka;

¹⁵kwa kuwa Bwana Mungu wako, ambaye yuko katikati yako, ni Mungu mwenye wivu na hasira yake itawaka dhidi yako, naye atakuangamiza kutoka uso wa nchi.

¹⁶Usimjaribu Bwana Mungu wako kama ulivyomjaribu huko Masa.

¹⁷Utayashika maagizo ya Bwana Mungu wako kwa bidii, na masharti na amri alizokupa.

¹⁸Fanya lililo haki na jema mbele za Bwana , ili upate kufanikiwa, uweze kuingia na kuimiliki nchi nzuri ambayo Bwana aliahidi kwa kiapo kwa baba zako,

¹⁹kuwafukuza kwa nguvu adui zako mbele yako kama Bwana alivyosema.

²⁰Siku zijazo, mtoto wako atakapokuuliza, “Ni nini maana ya masharti haya, amri na sheria hizi ambazo Bwana Mungu wako alikuagiza wewe?”

²¹Mwambie: “Tulikuwa watumwa wa Farao huko Misri, lakini Bwana alitutoa sisi kutoka Misri kwa mkono wenye nguvu.

²²Machoni petu, Bwana alitenda ishara za miujiza na maajabu makubwa na ya kutisha mno dhidi ya Misri, na dhidi ya Farao na nyumba yake yote.

²³Lakini Mungu akatutoa huko, akatuleta na kutupatia nchi hii ambayo aliwaahidi baba zetu kwa kiapo.

²⁴Bwana akatuagiza tutii amri hizi zote na kumcha Bwana Mungu wetu, ili tupate kustawi na kuendelea kuwa hai kama ilivyo leo.

²⁵Tukizitii kwa bidii amri hizi zote mbele za Bwana Mungu wetu, kama alivyotuamuru sisi, hiyo itakuwa haki yetu.”