Mwisho umewadia

¹Neno la Bwana likanijia kusema:

²“Mwanadamu, hili ndilo asemalo Bwana Mwenyezi kwa nchi ya Israeli:

“ ‘Mwisho! Mwisho umekuja

juu ya pembe nne za nchi!

³Sasa mwisho umekuja juu yenu,

nami nitamwaga hasira yangu dhidi yenu.

Nitawahukumu sawasawa na matendo yenu

na kuwalipiza kwa ajili ya desturi zenu zote za kuchukiza.

⁴Sitawaonea huruma

wala kuwarehemu.

Hakika nitawalipiza kwa ajili ya matendo yenu

na desturi za machukizo miongoni mwenu.

Ndipo mtajua kuwa Mimi ndimi Bwana .’

⁵“Hili ndilo asemalo Bwana Mwenyezi:

“ ‘Maafa! Maafa ambayo hayajasikiwa!

Tazama, yanakuja!

⁶Mwisho umewadia!

Mwisho umewadia!

Umejiinua wenyewe dhidi yenu.

Tazama, umewadia!

⁷Maangamizi yamekuja juu yenu,

ninyi mnaoishi katika nchi.

Wakati umewadia! Siku imekaribia!

Kuna hofu kuu ya ghafula juu ya milima, wala si furaha.

⁸Ninakaribia kumwaga ghadhabu yangu juu yenu

na kumaliza hasira yangu dhidi yenu.

Nitawahukumu sawasawa na matendo yenu

na kuwalipiza kwa ajili ya desturi zenu zote za machukizo.

⁹Sitawaonea huruma

wala kuwarehemu.

Nitawalipiza kwa ajili ya matendo yenu

na desturi za machukizo miongoni mwenu.

“ ‘Ndipo mtajua kuwa Mimi ndimi Bwana ambaye huwapiga.

¹⁰“ ‘Tazama, siku imefika!

Tazama, imewadia!

Maangamizi yamezuka ghafula,

fimbo imechanua,

nayo majivuno yamechipua!

¹¹Jeuri imeinuka

kuwa fimbo ya kuadhibu waovu.

Hakuna hata mmoja wa hao watu atakayeachwa,

hata mmoja wa kundi hilo:

hakuna utajiri wao utabaki,

wala chochote cha thamani.

¹²Wakati umewadia,

siku imefika.

Mnunuzi na asifurahi

wala muuzaji asihuzunike,

kwa maana ghadhabu iko juu ya kundi lote.

¹³Muuzaji hatajipatia tena

ardhi aliyoiuza

wakati wote wawili wangali hai.

Kwa kuwa maono kuhusu kundi lote

hayatatanguka.

Kwa sababu ya dhambi zao, hakuna hata mmoja

atakayeokoa maisha yake.

¹⁴“ ‘Wajapopiga tarumbeta

na kuweka kila kitu tayari,

hakuna hata mmoja atakayeenda vitani,

kwa maana ghadhabu yangu iko juu ya kundi lote.

¹⁵Nje ni upanga,

ndani ni tauni na njaa.

Walio shambani

watakufa kwa upanga,

nao waliomo mjini

njaa na tauni vitawala.

¹⁶Wote watakaopona

na kutoroka watakuwa milimani,

wakiomboleza kama hua wa mabondeni,

kila mmoja kwa sababu ya dhambi zake.

¹⁷Kila mkono utalegea

na kila goti litakuwa dhaifu kama maji.

¹⁸Watavaa gunia

na kufunikwa na hofu.

Nyuso zao zitafunikwa na aibu,

na vichwa vyao vitanyolewa.

¹⁹“ ‘Watatupa fedha yao barabarani,

nayo dhahabu yao itakuwa najisi.

Fedha yao na dhahabu yao

havitaweza kuwaokoa

katika siku hiyo ya ghadhabu ya Bwana .

Hawatashibisha njaa yao

au kujaza tumbo zao kwa hiyo fedha wala dhahabu,

kwa sababu imewaponza wajikwae dhambini.

²⁰Walijivunia vito vyao vizuri

na kuvitumia kutengeneza sanamu za machukizo

na vinyago vya upotovu.

Kwa hiyo nitavifanya vitu hivyo kuwa najisi kwao.

²¹Nitavitia vyote mikononi mwa wageni

kuwa nyara na kuwa vitu vilivyotekwa mikononi mwa watu waovu wa dunia,

nao watavinajisi.

²²Nitaugeuza uso wangu mbali nao,

nao waovu wa dunia watapanajisi mahali pangu pa thamani.

Wanyangʼanyi watapaingia

na kupanajisi.

²³“ ‘Andaa minyororo,

kwa sababu nchi imejaa umwagaji wa damu

na mji umejaa udhalimu.

²⁴Nitaleta taifa ovu kuliko yote

kumiliki nyumba zao.

Nitakomesha kiburi cha wenye nguvu

na mahali pao patakatifu patatiwa unajisi.

²⁵Hofu ya ghafula itakapokuja,

watatafuta amani, lakini haitapatikana.

²⁶Maafa juu ya maafa yatakuja,

tetesi ya mabaya juu ya tetesi ya mabaya.

Watajitahidi kupata maono kutoka kwa nabii;

mafundisho ya sheria toka kwa kuhani yatapotea,

vivyo hivyo shauri kutoka kwa wazee.

²⁷Mfalme ataomboleza,

mwana wa mfalme atavikwa kukata tamaa,

nayo mikono ya watu wa nchi itatetemeka.

Nitawaadhibu kulingana na matendo yao,

na kwa kanuni zao wenyewe nitawahukumu.

“ ‘Ndipo watajua kwamba Mimi ndimi Bwana .’ ”