Unabii kuhusu Misri

¹Neno la unabii kuhusu Misri:

Tazama, Bwana amepanda juu ya wingu liendalo kwa haraka

naye anakuja Misri.

Sanamu za Misri zinatetemeka mbele yake,

nayo mioyo ya Wamisri inayeyuka ndani yao.

²“Nitamchochea Mmisri dhidi ya Mmisri,

ndugu atapigana dhidi ya ndugu,

jirani dhidi ya jirani,

mji dhidi ya mji,

ufalme dhidi ya ufalme.

³Wamisri watakufa moyo,

na nitaibatilisha mipango yao.

Watatafuta ushauri kwa sanamu na kwa roho za waliokufa,

kwa waaguzi na kwa wale waongeao na mizimu.

⁴Nitawatia Wamisri

mikononi mwa bwana mkatili

na mfalme mkali atawatawala,”

asema Bwana, Bwana wa majeshi.

⁵Maji ya mito yatakauka,

chini ya mto kutakauka kwa jua.

⁶Mifereji itanuka;

vijito vya Misri vitapungua

na kukauka.

Matete na nyasi vitanyauka,

⁷pia mimea iliyo kando ya Mto Naili,

pale mto unapomwaga maji baharini.

Kila shamba lililopandwa kando ya Mto Naili litakauka,

litapeperushwa na kutoweka kabisa.

⁸Wavuvi watalia na kuomboleza,

wote watupao ndoana katika Mto Naili,

na watupao nyavu katika maji

watadhoofika kwa majonzi.

⁹Wale watu wafanyao kazi ya kitani kilichochambuliwa watakata tamaa,

wafumaji wa kitani safi watavunjika moyo.

¹⁰Wafanyao kazi ya kufuma nguo watahuzunishwa,

nao vibarua wataugua moyoni.

¹¹Maafisa wa Soani ni wapumbavu kabisa,

washauri wa Farao wenye busara wanatoa ushauri wa kijinga.

Unawezaje kumwambia Farao,

“Mimi ni mmoja wa watu wenye hekima,

mwanafunzi wa wafalme wa zamani”?

¹²Wako wapi sasa watu wako wenye hekima?

Wao wakuoneshe na kukufahamisha

ni nini Bwana wa majeshi

amepanga dhidi ya Misri.

¹³Maafisa wa Soani wamekuwa wapumbavu,

viongozi wa Memfisi wamedanganyika,

walio mawe ya pembe ya taifa lake

wameipotosha Misri.

¹⁴Bwana amewamwagia

roho ya kizunguzungu;

wanaifanya Misri iyumbayumbe

katika yale yote inayoyafanya,

kama vile mlevi ayumbayumbavyo

katika kutapika kwake.

¹⁵Misri haiwezi kufanya kitu chochote,

cha kichwa wala cha mkia,

cha tawi la mtende wala cha tete.

¹⁶Katika siku ile Wamisri watakuwa kama wanawake. Watatetemeka kwa hofu mbele ya mkono wa Bwana wa majeshi anaoinua dhidi yao.

¹⁷Nayo nchi ya Yuda itawatia hofu Wamisri, kila mmoja atakayetajiwa Yuda ataingiwa na hofu, kwa sababu ya kile ambacho Bwana wa majeshi anapanga dhidi yao.

¹⁸Katika siku hiyo miji mitano ya Misri, itazungumza lugha ya Kanaani, na kuapa kumtii Bwana wa majeshi. Mji mmoja utaitwa Mji wa Uharibifu.[#19:18 yaani Heliopoli ( Mji wa Jua )]

¹⁹Katika siku hiyo patakuwa na madhabahu ya Bwana katikati ya Misri na mnara wa kumbukumbu kwa Bwana kwenye mpaka wa Misri.

²⁰Itakuwa alama na ushahidi kwa ajili ya Bwana wa majeshi katika nchi ya Misri. Watakapomlilia Bwana kwa sababu ya watesi wao, Mungu atawapelekea mwokozi na mtetezi, naye atawaokoa.

²¹Hivyo Bwana atajijulisha mwenyewe kwa Wamisri, nao katika siku hiyo watamkubali Bwana . Wataabudu kwa kumtolea dhabihu na sadaka za nafaka, watamwekea Bwana nadhiri na kuzitimiza.

²²Bwana ataipiga Misri kwa tauni; atawapiga na kuwaponya. Watamgeukia Bwana , naye atayasikia maombi yao na kuwaponya.

²³Katika siku hiyo kutakuwa na njia kuu kutoka Misri hadi Ashuru. Waashuru wataenda Misri, na Wamisri wataenda Ashuru. Wamisri na Waashuru wataabudu pamoja.

²⁴Katika siku hiyo Israeli itakuwa ya tatu, pamoja na Misri na Ashuru, nao watakuwa baraka kwa dunia.

²⁵Bwana wa majeshi atawabariki, akisema, “Baraka iwe kwa Misri watu wangu, kwa Ashuru kazi ya mikono yangu, na kwa Israeli urithi wangu.”