Taabu na msaada

¹Ole wako wewe, ee mharibu,

wewe ambaye hukuharibiwa!

Ole wako, ee msaliti,

wewe ambaye hukusalitiwa!

Utakapokwisha kuharibu,

utaharibiwa;

utakapokwisha kusaliti,

utasalitiwa.

²Ee Bwana , uturehemu,

tunakutamani.

Uwe nguvu yetu kila asubuhi

na wokovu wetu wakati wa taabu.

³Kwa ngurumo ya sauti yako, mataifa yanakimbia;

unapoinuka, mataifa hutawanyika.

⁴Mateka yenu, enyi mataifa, yamevunwa

kama wafanyavyo madumadu,

watu huvamia juu yake

kama kundi la nzige.

⁵Bwana ametukuka, kwa kuwa anakaa mahali palipoinuka,

ataijaza Sayuni kwa haki na uadilifu.

⁶Atakuwa msingi ulio imara kwa wakati wenu,

hazina ya wokovu tele, hekima na maarifa;

kumcha Bwana ni ufunguo wa hazina hii.

⁷Angalia, mashujaa wake wanapiga kelele barabarani,

wajumbe wa amani wanalia kwa uchungu.

⁸Njia kuu zimeachwa,

hakuna wasafiri barabarani.

Mkataba umevunjika,

mashahidi wake wamedharauliwa,

hakuna anayeheshimiwa.

⁹Ardhi inaomboleza na kuchakaa,[#33:9 au Ardhi inakauka]

Lebanoni imeaibika na kunyauka;

Sharoni ni kama Araba,

nayo Bashani na Karmeli

wanapukutisha majani yao.

¹⁰“Sasa nitainuka,” asema Bwana .

“Sasa nitatukuzwa;

sasa nitainuliwa juu.

¹¹Mlichukua mimba ya makapi,

mkazaa mabua;

pumzi yenu ni moto unaowateketeza.

¹²Mataifa watachomwa wawe majivu;

kama vichaka vya miiba vilivyokatwa ndivyo watakavyochomwa.”

¹³Ninyi mlio mbali sana, sikieni lile nililofanya;

ninyi mlio karibu, tambueni uweza wangu!

¹⁴Wenye dhambi katika Sayuni wametiwa hofu,

kutetemeka kumewakumba wasiomcha Mungu:

“Ni nani miongoni mwetu awezaye kuishi na moto ulao?

Ni nani miongoni mwetu awezaye kuishi na moto unaowaka milele?”

¹⁵Yeye aendaye kwa uadilifu

na kusema lililo haki,

yeye anayekataa faida ipatikanayo kwa dhuluma

na kuizuia mikono yake isipokee rushwa,

yeye azuiaye masikio yake dhidi ya mashauri ya mauaji,

na yeye afumbaye macho yake yasitazame uovu:

¹⁶huyu ndiye mtu atakayeishi mahali pa juu,

ambaye kimbilio lake litakuwa ngome ya mlimani.

Atapewa mkate wake,

na maji yake hayatakoma.

¹⁷Macho yenu yatamwona mfalme katika uzuri wake

na kuiona nchi inayoenea mbali.

¹⁸Katika mawazo yenu mtaifikiria hofu iliyopita:

“Yuko wapi yule afisa mkuu?

Yuko wapi yule aliyechukua ushuru?

Yuko wapi afisa msimamizi wa minara?”

¹⁹Hutawaona tena wale watu wenye kiburi,

wale watu wenye usemi wa mafumbo,

wenye lugha ngeni, isiyoeleweka.

²⁰Mtazame Sayuni, mji wa sikukuu zetu;

macho yenu yatauona Yerusalemu,

mahali pa amani pa kuishi, hema ambalo halitaondolewa,

nguzo zake hazitangʼolewa kamwe,

wala hakuna kamba yake yoyote itakayokatika.

²¹Huko Bwana atakuwa Mwenye Nguvu wetu.

Patakuwa kama mahali pa mito mipana na vijito.

Hakuna jahazi lenye makasia litakalopita huko,

wala hakuna meli yenye nguvu itakayopita huko.

²²Kwa kuwa Bwana ni mwamuzi wetu,

Bwana ndiye mtoa sheria wetu,

Bwana ni mfalme wetu,

yeye ndiye atakayetuokoa.

²³Kamba zenu za merikebu zimelegea:

Mlingoti haukusimama imara,

nalo tanga halikukunjuliwa.

Wingi wa mateka yatagawanywa,

hata yeye aliye mlemavu atachukua nyara.

²⁴Hakuna yeyote aishiye Sayuni atakayesema,

“Mimi ni mgonjwa”;

nazo dhambi za wale wanaoishi humo

zitasamehewa.