Elifazi anasema: Uovu wa Ayubu ni mkubwa

¹Ndipo Elifazi Mtemani akajibu:

²“Je, mwanadamu aweza kuwa wa faida kwa Mungu?

Je, hata mtu mwenye hekima aweza kumfaidi?

³Je, Mwenyezi angefurahia nini

kama ungekuwa mwadilifu?

Au je, yeye angepata faida gani

kama njia zako zingekuwa kamilifu?

⁴“Je, ni kwa ajili ya utaua wako ndiyo maana anakukemea

na kuleta mashtaka dhidi yako?

⁵Je, uovu wako si mkuu?

Dhambi zako si hazina mwisho?

⁶Umedai dhamana kwa ndugu zako bila sababu;

umewavua watu nguo zao, ukawaacha uchi.

⁷Hukumpa maji aliyechoka,

nawe ulimnyima chakula mwenye njaa,

⁸ingawa ulikuwa mtu mwenye uwezo ukimiliki nchi:

mtu uliyeheshimiwa, ukiishi ndani yake.

⁹Umewafukuza wajane mikono mitupu

na kuzivunja nguvu za yatima.

¹⁰Ndiyo sababu mitego imekuzunguka pande zote,

hatari ya ghafula inakutia hofu,

¹¹ndiyo sababu ni giza sana huwezi kuona,

tena ndiyo sababu mafuriko ya maji yamekufunika.

¹²“Je, Mungu hayuko katika mbingu za juu?

Juu kuliko nyota zilizo juu sana!

¹³Hivyo wewe wasema, ‘Mungu anajua nini?’

Je, yeye huhukumu katika giza kama hilo?

¹⁴Mawingu mazito ni pazia lake, hivyo hatuoni sisi

atembeapo juu ya anga la dunia.

¹⁵Je, utaifuata njia ya zamani,

ambayo watu waovu waliikanyaga?

¹⁶Waliondolewa kabla ya wakati wao,

misingi yao ikachukuliwa na mafuriko.

¹⁷Walimwambia Mungu, ‘Tuache sisi!

Huyo Mwenyezi aweza kutufanyia nini?’

¹⁸Lakini ndiye alizijaza nyumba zao na vitu vizuri,

hivyo ninajitenga mbali na mashauri ya waovu.

¹⁹“Wenye haki wanaona maangamizi yao na kufurahi,

nao wasio na hatia huwadhihaki, wakisema,

²⁰‘Hakika adui zetu wameangamizwa,

nao moto umeteketeza mali yao.’

²¹“Mjue sana Mungu ili uwe na amani,

ndipo mema yatakapokujia.

²²Uyapokee mafundisho toka kinywani mwake,

na maneno yake uyaweke moyoni mwako.

²³Ukimrudia Mwenyezi, utarudishwa upya:

Ukiuondoa uovu uwe mbali na hema lako,

²⁴kama dhahabu yako ukiihesabu kama mavumbi,

dhahabu yako ya Ofiri kama miamba ya mabondeni,

²⁵ndipo Mwenyezi atakuwa dhahabu yako,

naye atakuwa fedha yako iliyo bora.

²⁶Hakika ndipo utakapojifurahisha kwa Mwenyezi,

nawe utamwinulia Mungu uso wako.

²⁷Utamwomba yeye, naye atakusikia,

nawe utazitimiza nadhiri zako.

²⁸Utakusudia jambo nalo litatendeka,

nao mwanga utaangazia njia zako.

²⁹Watu watakaposhushwa, nawe ukasema, ‘Wainue!’

ndipo atamwokoa aliyevunjika moyo.

³⁰Atamwokoa hata yule ambaye ana hatia,

ataokolewa kwa sababu ya usafi wa mikono yako.”