Ayubu anaendelea

¹“Kwa nini Mwenyezi asiweke nyakati kwa ajili ya hukumu?

Kwa nini wale wamjuao wazitafute siku kama hizo bila mafanikio?

²Watu husogeza mawe ya mpaka;

huchunga makundi ya wanyama waliyonyangʼanya kwa nguvu.

³Huwanyangʼanya yatima punda wao,

na kumchukua rehani fahali wa mjane.

⁴Humsukuma mhitaji kutoka njia,

na kuwafanya maskini wote wa nchi kulazimika kujificha.

⁵Kama punda-mwitu jangwani,

maskini huzunguka katika kazi zao za kutafuta chakula;

mahali palipo jangwa

huwapa chakula cha watoto wao.

⁶Hukusanya chakula mashambani na kuokota masazo

katika mashamba ya mizabibu ya waovu.

⁷Kwa kukosa nguo, usiku kucha hukaa uchi;

hawana chochote cha kujifunika baridi.

⁸Hutota kwa mvua za mlimani,

nao huikumbatia miamba kwa ajili ya kukosa pa kujisitiri.

⁹Mtoto yatima hupokonywa matitini;

mtoto mchanga wa maskini hunyakuliwa kwa ajili ya deni.

¹⁰Kwa kukosa nguo, hutembea uchi;

hubeba miganda ya ngano, lakini huwa na njaa.

¹¹Hukamua zeituni katika mawe ya kusagia;

hukanyaga mashinikizo, lakini wanaona kiu.

¹²Kilio cha huzuni cha wanaokufa kinapaa kutoka mjini,

nazo nafsi za waliojeruhiwa zinalilia msaada.

Lakini Mungu hamlaumu mtu yeyote

kwa kutenda mabaya.

¹³“Wako wale wanaoiasi nuru,

wasiofahamu njia zake

wala hawakai katika mapito yake.

¹⁴Mwanga wa mchana unapotoweka, muuaji huinuka,

naye huwaua maskini na mhitaji;

wakati wa usiku hunyemelea kama mwizi.

¹⁵Jicho la mzinzi hungojea wakati wa giza,

naye hufikiri, ‘Hakuna jicho litakaloniona,’

naye huuficha uso wake.

¹⁶Katika giza, huvunja nyumba,

lakini wakati wa mchana hujifungia ndani;

hawataki kufanya lolote nuruni.

¹⁷Kwa wote hawa, giza nene ndiyo asubuhi yao;

hujifanya rafiki na vitisho vya gizani.

¹⁸“Lakini wao ni povu juu ya maji;

sehemu yao juu ya nchi imelaaniwa,

hivyo hakuna hata mmoja

aendaye kwenye shamba la mizabibu.

¹⁹Kama vile joto na hari vinyakuavyo theluji iliyoyeyuka,

ndivyo Kuzimu kuwanyakuavyo waliotenda dhambi.

²⁰Tumbo lililowazaa huwasahau,

nao huwa karamu ya mabuu;

watu waovu hawakumbukwi tena,

lakini huvunjika kama mti.

²¹Huwafanya mawindo wanawake tasa na wasio na watoto,

nao hawaoneshi huruma kwa wajane.

²²Lakini Mungu huwakokota wenye nguvu kwa uwezo wake;

ingawa wamestawi, hawana hakika ya maisha.

²³Aweza akawaacha wakapumzika wakijihisi salama,

lakini macho yake yanaona njia zao.

²⁴Kwa kitambo kidogo hutukuka,

hatimaye hutoweka;

hushushwa na kukusanywa

kama wengine wote;

hukatwa kama masuke ya nafaka.

²⁵“Kama hili sivyo, ni nani awezaye

kunithibitisha kuwa mwongo,

na kuyafanya maneno yangu

kuwa si kitu?”