Utangulizi; kuzaliwa kwa Yesu na ujana wake

Utangulizi

¹Kwa kuwa watu wengi wamekaa ili kuandika habari za mambo yaliyotimizwa katikati yetu,

²kama vile yalivyokabidhiwa kwetu na wale waliokuwa mashahidi walioyaona na watumishi wa lile neno tokea mwanzo,

³mimi nami baada ya kuchunguza kila kitu kwa uangalifu kuanzia mwanzo, niliamua kukuandikia habari za mambo hayo, ewe mtukufu Theofilo,

⁴ili upate kujua ukweli kuhusu yale uliyofundishwa.

Kuzaliwa kwa Yohana Mbatizaji kwatabiriwa

⁵Wakati wa utawala wa Herode mfalme wa Yudea, palikuwa na kuhani mmoja jina lake Zakaria, aliyekuwa wa ukoo wa kikuhani wa Abiya. Elizabeti mkewe alikuwa pia mzao wa Haruni.

⁶Zakaria na Elizabeti mkewe wote walikuwa watu wanyofu mbele za Mungu, wakizishika amri zote za Bwana na maagizo yote bila lawama.

⁷Lakini walikuwa hawana watoto, kwa sababu Elizabeti alikuwa tasa; nao wote wawili walikuwa wazee sana.

⁸Siku moja ilipokuwa zamu ya kikundi cha Zakaria, yeye akifanya kazi ya ukuhani Hekaluni mbele za Mungu,

⁹alichaguliwa kwa kura kwa kufuata desturi za ukuhani, kuingia Hekaluni mwa Bwana ili kufukiza uvumba.

¹⁰Nao wakati wa kufukiza uvumba ulipowadia, wale wote waliokuwa wamekusanyika ili kuabudu walikuwa nje wakiomba.

¹¹Ndipo malaika wa Bwana, akiwa amesimama upande wa kuume wa madhabahu ya kufukizia uvumba, akamtokea Zakaria.

¹²Zakaria alipomwona huyo malaika, akafadhaika sana, akajawa na hofu.

¹³Lakini malaika akamwambia, “Usiogope, Zakaria, kwa maana Mungu amesikia maombi yako. Mkeo Elizabeti atakuzalia mtoto wa kiume, nawe utamwita jina Yohana.

¹⁴Yeye atakuwa furaha na shangwe kwako, nao watu wengi watashangilia kwa sababu ya kuzaliwa kwake.

¹⁵Kwa kuwa atakuwa mkuu mbele za Bwana, kamwe hataonja mvinyo wala kinywaji chochote cha kulevya, naye atajazwa Roho Mtakatifu hata kabla ya kuzaliwa kwake.

¹⁶Naye atawageuza wengi wa Waisraeli warudi kwa Bwana Mungu wao.

¹⁷Naye atatangulia mbele za Bwana katika roho na nguvu ya Eliya, ili kuigeuza mioyo ya baba kuwaelekea watoto wao, na wasiotii warejee katika hekima ya wenye haki, ili kuwaweka tayari watu walioandaliwa kwa ajili ya Bwana.”

¹⁸Zakaria akamuuliza malaika, “Jambo hilo linawezekanaje? Mimi ni mzee na mke wangu pia ana umri mkubwa.”

¹⁹Malaika akamjibu, akamwambia, “Mimi ni Gabrieli, nisimamaye mbele za Mungu, nami nimetumwa kwako ili nikuambie habari hizi njema.

²⁰Basi sasa kwa kuwa hujaamini maneno yangu ambayo yatatimizwa kwa wakati wake, utakuwa bubu hadi siku ile mambo haya yatakapotukia.”

²¹Wakati huo watu walikuwa wanamngojea Zakaria nje huku wakishangaa kukawia kwake mle Hekaluni.

²²Alipotoka akawa hawezi kusema nao, wao wakatambua kuwa ameona maono ndani ya Hekalu. Lakini kwa kuwa alikuwa bubu, akawa anawaashiria kwa mikono.

²³Muda wake wa kuhudumu Hekaluni ulipomalizika, akarudi nyumbani mwake.

²⁴Baada ya muda usio mrefu, Elizabeti mkewe akapata mimba, naye akajitenga kwa miezi mitano.

²⁵Elizabeti akasema, “Hili ndilo Bwana alilonitendea aliponipa kibali na kuniondolea aibu yangu mbele ya watu.”

Kuzaliwa kwa Yesu kwatabiriwa

²⁶Mwezi wa sita baada ya Elizabeti kupata mimba, Mungu alimtuma malaika Gabrieli aende Galilaya katika mji wa Nazareti,

²⁷kwa mwanamwali bikira aliyekuwa ameposwa na mtu mmoja jina lake Yusufu wa nyumba ya Daudi. Jina la huyu mwanamwali bikira ni Mariamu.

²⁸Naye malaika akaja kwake akamwambia: “Salamu, wewe uliyebarikiwa, Bwana yu pamoja nawe!”

²⁹Mariamu akafadhaishwa sana na maneno haya, akajiuliza moyoni salamu hii ni ya namna gani.

³⁰Ndipo malaika akamwambia, “Usiogope, Mariamu; umepata kibali kwa Mungu.

³¹Tazama, utachukua mimba, nawe utamzaa mtoto wa kiume na utamwita jina Yesu.

³²Yeye atakuwa mkuu, naye ataitwa Mwana wa Aliye Juu Sana. Bwana Mungu atampa kiti cha utawala cha Daudi baba yake.

³³Ataimiliki nyumba ya Yakobo milele, na ufalme wake hautakuwa na mwisho.”

³⁴Mariamu akamuuliza huyo malaika, “Maadamu mimi ni bikira, jambo hili litawezekanaje?”

³⁵Malaika akamjibu, “Roho Mtakatifu atakujilia juu yako, nazo nguvu zake Yeye Aliye Juu Sana zitakufunika kama kivuli. Kwa hiyo mtoto atakayezaliwa atakuwa mtakatifu, naye ataitwa Mwana wa Mungu.

³⁶Tazama, jamaa yako Elizabeti amechukua mimba katika uzee wake, na huu ni mwezi wake wa sita, yeye aliyeitwa tasa.

³⁷Kwa maana kwa Mungu hakuna lisilowezekana.”

³⁸Mariamu akasema, “Tazama, mimi ni mtumishi wa Bwana. Na iwe kwangu kama ulivyosema.” Kisha malaika akaondoka, akamwacha.

Mariamu aenda kumtembelea Elizabeti

³⁹Wakati huo Mariamu akajiandaa, akaharakisha kwenda katika mji mmoja kwenye nchi ya vilima ya Yudea.

⁴⁰Akaingia nyumbani mwa Zakaria na kumsalimu Elizabeti.

⁴¹Naye Elizabeti aliposikia salamu ya Mariamu, mtoto aliyekuwa tumboni mwake akaruka. Elizabeti akajazwa na Roho Mtakatifu,

⁴²akapaza sauti kwa nguvu, akasema, “Umebarikiwa wewe miongoni mwa wanawake, naye mtoto utakayemzaa amebarikiwa.

⁴³Lakini ni kwa nini mimi nimepata kibali kiasi hiki, hata mama wa Bwana wangu afike kwangu?

⁴⁴Mara tu niliposikia sauti ya salamu yako, mtoto aliye tumboni mwangu aliruka kwa furaha.

⁴⁵Amebarikiwa yeye aliyeamini kwamba lile Bwana alilomwambia litatimizwa.”

Wimbo wa Mariamu

⁴⁶Naye Mariamu akasema:

“Moyo wangu wamwadhimisha Bwana,

⁴⁷nayo roho yangu inamfurahia

Mungu Mwokozi wangu,

⁴⁸kwa kuwa ameangalia kwa fadhili

unyonge wa mtumishi wake.

Hakika tangu sasa vizazi vyote vitaniita aliyebarikiwa,

⁴⁹kwa maana yeye Mwenye Nguvu

amenitendea mambo ya ajabu:

jina lake ni takatifu.

⁵⁰Rehema zake hudumu kizazi hadi kizazi,

kwa wale wanaomcha.

⁵¹Kwa kuwa ametenda mambo ya ajabu kwa mkono wake;

amewatawanya wale wenye kiburi

ndani ya mioyo yao.

⁵²Amewashusha watawala toka kwenye viti vyao vya utawala,

lakini amewainua wanyenyekevu.

⁵³Amewashibisha wenye njaa kwa vitu vizuri,

bali matajiri amewafukuza mikono mitupu.

⁵⁴Amemsaidia mtumishi wake Israeli,

kwa kukumbuka ahadi yake ya kumrehemu

⁵⁵Abrahamu na uzao wake milele,

kama alivyowaahidi baba zetu.”

⁵⁶Mariamu akakaa na Elizabeti karibu miezi mitatu, kisha akarudi nyumbani mwake.

Kuzaliwa kwa Yohana Mbatizaji

⁵⁷Ulipowadia wakati wa Elizabeti kujifungua, alizaa mtoto wa kiume.

⁵⁸Majirani zake na jamii zake wakasikia jinsi Bwana alivyomfanyia rehema kuu, nao wakafurahi pamoja naye.

⁵⁹Siku ya nane wakaja kumtahiri mtoto, wakataka yule mtoto aitwe Zakaria, ambalo ndilo jina la baba yake.

⁶⁰Lakini mama yake akakataa na kusema, “Hapana! Jina lake ataitwa Yohana.”

⁶¹Wakamwambia, “Hakuna mtu yeyote katika jamaa yako mwenye jina kama hilo.”

⁶²Basi wakamfanyia Zakaria baba yake ishara ili kujua kwamba yeye angependa kumpa mtoto jina gani.

⁶³Akaomba wampe kibao cha kuandikia na kwa mshangao wa kila mtu akaandika: “Jina lake ni Yohana.”

⁶⁴Papo hapo kinywa chake kikafunguliwa na ulimi wake pia, akaanza kuongea, huku akimsifu Mungu.

⁶⁵Majirani wote wakajawa na hofu ya Mungu, na katika nchi yote ya vilima ya Yudea watu walikuwa wakinena kuhusu mambo haya yote.

⁶⁶Kila aliyesikia habari hizi alishangaa akauliza, “Je, mtoto huyu atakuwa mtu wa namna gani?” Maana mkono wa Bwana ulikuwa pamoja naye.

Unabii wa Zakaria

⁶⁷Zakaria, baba yake, akajazwa na Roho Mtakatifu, naye akatoa unabii, akisema:

⁶⁸“Ahimidiwe Bwana, Mungu wa Israeli,

kwa kuwa amewajilia watu wake na kuwakomboa.

⁶⁹Naye ametusimamishia pembe ya wokovu[#1:69 inamaanisha nguvu]

katika nyumba ya Daudi mtumishi wake,

⁷⁰(kama alivyonena kwa vinywa vya manabii wake

watakatifu tangu zamani),

⁷¹kwamba atatuokoa kutoka kwa adui zetu,

na kutoka mikononi mwao wote watuchukiao:

⁷²ili kuonesha rehema kwa baba zetu

na kukumbuka agano lake takatifu,

⁷³kiapo alichomwapia baba yetu Abrahamu:

⁷⁴kutuokoa kutoka mikononi mwa adui zetu,

tupate kumtumikia yeye pasipo hofu

⁷⁵katika utakatifu na haki mbele zake,

siku zetu zote.

⁷⁶“Nawe mtoto wangu, utaitwa nabii wa Aliye Juu Sana;

kwa kuwa utamtangulia Bwana

na kuandaa njia kwa ajili yake,

⁷⁷kuwajulisha watu wake wokovu

utakaopatikana kwa kusamehewa dhambi zao,

⁷⁸kwa ajili ya wingi wa rehema za Mungu wetu,

nuru inayotoka juu itatuzukia

⁷⁹ili kuwaangazia wale wanaoishi gizani

na katika uvuli wa mauti,

kuiongoza miguu yetu katika njia ya amani.”

⁸⁰Yule mtoto akakua na kuongezeka nguvu katika roho; akaishi nyikani hadi siku ile alipojionesha hadharani kwa Waisraeli.