Tarumbeta za fedha

¹Bwana akamwambia Musa:

²“Tengeneza tarumbeta mbili za fedha ya kufua, uzitumie kwa kuita jumuiya pamoja na wakati wa kuvunja makambi ili kuondoka.

³Tarumbeta zote mbili zikipigwa, jumuiya yote itakusanyika mbele yako katika ingilio la Hema la Kukutania.

⁴Kama tarumbeta moja tu ikipigwa, viongozi, yaani wakuu wa koo za Israeli, ndio watakaokusanyika mbele yako.

⁵Mlio wa kujulisha hatari ukipigwa, makabila yaliyo na makambi upande wa mashariki yataondoka.

⁶Mlio wa pili ukipigwa, walio kwenye makambi ya kusini wataondoka. Mlio huo wa kujulisha hatari utakuwa ishara ya kuondoka.

⁷Ili kuwakusanya watu, piga tarumbeta zote, lakini siyo kwa mlio wa kujulisha hatari.

⁸“Wana wa Haruni, makuhani, ndio watakaopiga hizo tarumbeta. Hili litakuwa agizo la kudumu kwa ajili yenu na kwa vizazi vijavyo.

⁹Mtakapopigana vita katika nchi yenu wenyewe dhidi ya adui anayewaonea, piga tarumbeta kwa mlio wa kujulisha hatari. Ndipo utakumbukwa na Bwana Mungu wenu na kuokolewa kutoka kwa adui zenu.

¹⁰Pia nyakati za furaha yenu, yaani sikukuu zenu zilizoamriwa na sikukuu za Mwezi Mwandamo, mtapiga tarumbeta juu ya sadaka zenu za kuteketezwa na sadaka zenu za amani, nazo zitakuwa ukumbusho kwa ajili yenu mbele za Mungu wenu. Mimi ndimi Bwana Mungu wenu.”

Waisraeli waondoka Sinai

¹¹Katika siku ya ishirini ya mwezi wa pili wa mwaka wa pili, wingu liliinuka kutoka juu ya Maskani ya Ushuhuda.

¹²Ndipo Waisraeli wakaondoka kutoka Jangwa la Sinai wakasafiri kutoka sehemu moja hadi nyingine hadi wingu lilipotua katika Jangwa la Parani.

¹³Waliondoka kwa mara ya kwanza kwa agizo la Bwana kupitia kwa Musa.

¹⁴Vikosi vya kambi ya Yuda vilitangulia kwanza chini ya beramu yao. Nashoni mwana wa Aminadabu alikuwa kiongozi wao.

¹⁵Nethaneli mwana wa Suari alikuwa kiongozi wa kabila la Isakari,

¹⁶naye Eliabu mwana wa Heloni alikuwa kiongozi wa kabila la Zabuloni.

¹⁷Ndipo Maskani iliposhushwa, nao wana wa Gershoni na wana wa Merari ambao waliibeba wakaondoka.

¹⁸Vikosi vya kambi ya Reubeni vilifuata, chini ya beramu yao. Elisuri mwana wa Shedeuri alikuwa kiongozi wao.

¹⁹Shelumieli mwana wa Surishadai aliongoza kikosi cha kabila la Simeoni,

²⁰naye Eliasafu mwana wa Deueli aliongoza kikosi cha kabila la Gadi.

²¹Kisha Wakohathi wakaondoka, wakichukua vitu vitakatifu. Maskani ilipaswa kusimamishwa kabla wao hawajafika.

²²Vikosi vya kambi ya Efraimu vilifuata, chini ya beramu yao. Elishama mwana wa Amihudi alikuwa kiongozi wao.

²³Gamalieli mwana wa Pedasuri aliongoza kikosi cha kabila la Manase,

²⁴naye Abidani mwana wa Gideoni alikuwa kiongozi wa kikosi cha kabila la Benyamini.

²⁵Mwishowe, kama kikosi cha nyuma cha ulinzi wa vikosi vyote, vikosi vya kambi ya Dani viliondoka chini ya beramu yao. Ahiezeri mwana wa Amishadai alikuwa kiongozi wao.

²⁶Pagieli mwana wa Okrani aliongoza kikosi cha kabila la Asheri,

²⁷naye Ahira mwana wa Enani aliongoza kikosi cha kabila la Naftali.

²⁸Huu ndio ulikuwa utaratibu wa kuondoka wa vikosi vya Waisraeli walipokuwa wanaondoka.

²⁹Basi Musa akamwambia Hobabu mwana wa Reueli, Mmidiani, mkwewe Musa, “Tunaondoka kwenda mahali ambapo Bwana amesema ‘Nitawapa ninyi mahali hapo.’ Twende pamoja, nasi tutakutendea mema, kwa maana Bwana ameahidi mambo mema kwa Israeli.”

³⁰Akajibu, “Hapana, sitaenda; nitarudi kwenye nchi yangu mwenyewe na watu wangu mwenyewe.”

³¹Lakini Musa akasema, “Tafadhali usituache. Wewe unajua mahali yatupasa kupiga kambi jangwani, nawe unaweza kuwa macho yetu.

³²Ikiwa utafuatana nasi, tutashirikiana nawe mema yoyote tutakayopewa na Bwana .”

³³Hivyo waliondoka kutoka mlima wa Bwana , nao wakasafiri kwa siku tatu. Sanduku la Agano la Bwana liliwatangulia kwa zile siku tatu ili kuwatafutia mahali pa kupumzika.

³⁴Wingu la Bwana lilikuwa juu yao wakati wa mchana walipoondoka kambini.

³⁵Wakati wowote Sanduku lilipoondoka, Musa alisema,

“Ee Bwana , inuka!

Watesi wako na watawanyike;

adui zako na wakimbie mbele zako.”

³⁶Wakati wowote Sanduku liliposimama, alisema,

“Ee Bwana , rudi,

kwa maelfu ya Waisraeli wasiohesabika.”