Zaburi 112

Baraka za mwenye haki

¹Msifuni Mwenyezi Mungu.[#112:1 kwa Kiebrania ni Hallelu Yah.]

Heri mtu yule amchaye Mwenyezi Mungu,

mtu yule apendezwaye sana na amri zake.

²Watoto wake watakuwa wenye uwezo katika nchi,

kizazi cha watu waadilifu kitabarikiwa.

³Nyumbani mwake kuna mali na utajiri,

haki yake hudumu milele.

⁴Hata gizani nuru humzukia mtu mwadilifu,

yule mwenye rehema, huruma na haki.

⁵Mema yatamjia mtu yule aliye mkarimu na mwenye kukopesha bila riba,

anayefanya mambo yake kwa haki.

⁶Hakika hatatikisika kamwe,

mtu mwenye haki atakumbukwa milele.

⁷Hataogopa habari mbaya,

moyo wake ni thabiti, ukimtegemea Mwenyezi Mungu.

⁸Moyo wake ni salama, hatakuwa na hofu,

mwishoni ataona ushindi dhidi ya adui zake.

⁹Ametawanya vipawa vyake kwa ukarimu akawapa maskini;

haki yake hudumu milele;

pembe yake itatukuzwa kwa heshima.

¹⁰Mtu mwovu ataona na kuchukizwa,

atasaga meno yake na kutoweka,

kutamani kwa mtu mwovu kutaishia patupu.