Zaburi 48

Sayuni, mji wa Mungu

¹Bwana ni mkuu, anayestahili kusifiwa sana,

katika mji wa Mungu wetu,

mlima wake mtakatifu.

²Ni mzuri katika kuinuka juu kwake,

furaha ya dunia yote.

Kama vilele vya juu vya Safoni ni Mlima Sayuni,

mji wa Mfalme Mkuu.

³Mungu yuko katika ngome zake;

amejionesha mwenyewe kuwa ngome yake.

⁴Wafalme walipounganisha nguvu,

waliposonga mbele pamoja,

⁵walimwona, wakashangaa,

wakakimbia kwa hofu.

⁶Kutetemeka kuliwashika huko,

maumivu kama ya mwanamke

mwenye uchungu wa kuzaa.

⁷Uliwaangamiza kama meli za Tarshishi

zilizovunjwa na upepo wa mashariki.

⁸Kama tulivyokuwa tumesikia,

ndivyo tulivyoona

katika mji wa Bwana wa majeshi,

katika mji wa Mungu wetu:

Mungu ataufanya uwe salama milele.

⁹Ee Mungu, hekaluni mwako

tunatafakari upendo wako usiokoma.

¹⁰Ee Mungu, kama jina lako lilivyo,

sifa zako zinafika hadi miisho ya dunia,

mkono wako wa kuume umejazwa na haki.

¹¹Mlima Sayuni unashangilia,

vijiji vya Yuda vinafurahi

kwa sababu ya hukumu zako.

¹²Tembeeni katika Sayuni,

uzungukeni mji,

hesabuni minara yake;

¹³yatafakarini vyema maboma yake,

angalieni ngome zake,

ili mpate kusimulia habari zake

kwa kizazi kijacho.

¹⁴Kwa kuwa huyu Mungu ni Mungu wetu milele na milele;

atakuwa kiongozi wetu hata mwisho.