Watu wa Mungu wafarijiwa

¹Watulizeni mioyo, watulizeni mioyo, watu wangu, asema Mungu wenu.

²Semeni na moyo wa Yerusalemu, kauambieni kwa sauti kuu ya kwamba vita vyake vimekwisha, uovu wake umeachiliwa; kwa kuwa amepokea kwa mkono wa BWANA adhabu maradufu kwa dhambi zake zote.

³Sikiliza, ni sauti ya mtu aliaye,[#Mal 3:1; Lk 1:76; Mt 3:3; Mk 1:3; Yn 1:23]

Itengenezeni nyikani njia ya BWANA;

Nyosheni jangwani njia kuu kwa Mungu wetu.

⁴Kila bonde litainuliwa,

Na kila mlima na kilima kitashushwa;

Palipoinuka patakuwa pamenyoka,

Na palipoparuza patasawazishwa;

⁵Na utukufu wa BWANA utafunuliwa,[#Kut 16:7; Zab 72:19; Eze 36:23; Lk 2:10]

Na watu wote watauona pamoja;

Kwa kuwa kinywa cha BWANA kimenena haya.

⁶Sikiliza, ni sauti ya mtu asemaye, Lia![#Yak 1:10-11; 1 Pet 1:24-25]

Nikasema,

Nilie nini? Watu wote ni majani,

Na wema wake wote ni kama ua la shambani;

⁷Majani yakauka, ua lanyauka;

Kwa sababu pumzi ya BWANA yapita juu yake.

Hakika watu ni majani.

⁸Majani yakauka, ua lanyauka;

Bali neno la Mungu wetu litasimama milele.

⁹Wewe uuhubiriye Sayuni habari njema,

Panda juu ya mlima mrefu;

Wewe uuhubiriye Yerusalemu habari njema,

Paza sauti kwa nguvu;

Paza sauti yako, usiogope;

Iambie miji ya Yuda, Tazameni, Mungu wenu.

¹⁰Tazameni, Bwana Mungu atakuja kama shujaa,[#Isa 62:11; Ufu 22:12]

Na mkono wake ndio utakaomtawalia;

Tazameni, thawabu yake i pamoja naye,

Na fidia yake i mbele zake.

¹¹Atalilisha kundi lake kama mchungaji,[#Eze 34:15,23; Isa 49:10; Ebr 13:20; 1 Pet 2:25; Ufu 7:17; Yn 10:11]

Atawakusanya wana-kondoo mikononi mwake;

Na kuwachukua kifuani mwake,

Nao wanyonyeshao atawaongoza polepole.

¹²Ni nani aliyeyapima maji kwa konzi ya mkono wake, na kuzikadiria mbingu kwa shubiri, na kuyashika mavumbi ya dunia katika pishi, na kuipima milima kwa uzani, na vilima kama kwa mizani?

¹³Ni nani aliyemwongoza Roho ya BWANA, na kumfundisha kwa kuwa mshauri wake?[#Rum 11:34; 1 Kor 2:16]

¹⁴Alifanya shauri na nani, ni nani aliyemwelimisha na kumfunza njia ya hukumu, na kumfunza maarifa, na kumwonesha njia ya fahamu?

¹⁵Tazama, mataifa ni kama tone la maji katika ndoo, huhesabiwa kuwa kama mavumbi membamba katika mizani; tazama, yeye huvinyanyua visiwa kama ni kitu kidogo sana.

¹⁶Lebanoni nao hautoshelezi kwa kuni, wala wanyama wake hawatoshi kwa kafara.

¹⁷Mataifa yote huwa kama si kitu mbele zake; huhesabiwa kwake kuwa duni kabisa na batili.

¹⁸Basi, mtamlinganisha Mungu na nani? Au mtamfananisha na mfano wa namna gani?[#Mdo 17:29]

¹⁹Sanamu! Fundi mmoja huiyeyusha, na mfua dhahabu huifunika dhahabu, huifulia mikufu ya fedha.

²⁰Yeye aliye maskini sana hata hawezi kutoa sadaka ya namna hii, huchagua mti usiooza, hujitafutia fundi stadi wa kusimamisha sanamu ya kuchonga isiyoweza kutikisika.[#Yer 10:4]

²¹Je! Hamkujua? Hamkusikia? Hamkuambiwa tokea mwanzo? Hamkufahamu tangu kuwekwa misingi ya dunia?[#Zab 19:1; Mdo 14:17; Rum 1:19]

²²Yeye ndiye anayeketi juu ya duara ya dunia, na hao wanaokaa ndani yake huwa kama panzi; yeye ndiye azitandazaye mbingu kama pazia na kuzikunjua kama hema ya kukaliwa;[#Mwa 1:1,6; Ayu 9:8; Zab 104:2; Yer 10:12]

²³ndiye awatanguaye wakuu, na kuwabatilisha waamuzi wa dunia.[#Ayu 12:21]

²⁴Naam, hawakupandwa; hawakutiwa katika ardhi kama mbegu; naam, shina lao halikutia mizizi katika ardhi; tena awapuzia tu, wakanyauka, upepo wa kisulisuli wawaondoa kama mabua makavu.

²⁵Mtanifananisha na nani, basi, nipate kuwa sawa naye? Asema yeye aliye Mtakatifu.[#Kum 4:15; Isa 40:18; Mdo 17:24-29]

²⁶Inueni macho yenu juu, mkaone; ni nani aliyeziumba hizi; aletaye nje jeshi lao kwa hesabu; aziita zote kwa majina; kwa ukuu wa uweza wake, na kwa kuwa yeye ni hodari kwa nguvu zake; hapana moja isiyokuwapo mahali pake.[#Zab 147:4]

²⁷Mbona unasema, Ee Yakobo, mbona unanena, Ee Israeli, Njia yangu imefichwa, BWANA asiione, na hukumu yangu imempita Mungu wangu asiiangalie?

²⁸Je! Wewe hukujua? Hukusikia? Yeye Mungu wa milele, BWANA, Muumba miisho ya dunia, hazimii, wala hachoki; akili zake hazichunguziki.[#Zab 147:5; Rum 11:33]

²⁹Huwapa nguvu wazimiao, humwongezea nguvu yeye asiyekuwa na uwezo.

³⁰Hata vijana watazimia na kuchoka, na vijana wanaume wataanguka;

³¹bali wao wamngojeao BWANA watapata nguvu mpya; watapanda juu kwa mbawa kama tai; watakimbia, wala hawatachoka; watakwenda kwa miguu, wala hawatazimia.[#Ayu 17:9; Zab 25:3; Isa 8:17; Omb 3:25; 2 Kor 4:8-10,16]