¹“Ee Bwana, Mungu Mwenye Nguvu, Mungu wa Israeli, tunakulilia wewe kwa moyo uliotaabika na hoi.

²Usikilize ee Bwana, na utuhurumie, maana sisi tumetenda dhambi mbele yako.

³Wewe wadumu milele, lakini sisi, tumeangamia milele!

⁴Ee Bwana, Mwenye Nguvu, Mungu wa Israeli! Usikilize sasa sala ya Waisraeli walio kama wafu, sala ya hao waliokukosea, waliokataa kutii sauti yako wewe Bwana Mungu wao, hata balaa zikatuandama.

⁵Usikumbuke maovu ya wazee wetu, bali ukumbuke uwezo wako na jina lako.

⁶Wewe ni Bwana Mungu wetu, nawe ndiwe tutakayekusifu peke yako.

⁷Wewe umeweka mioyoni hali ya uchaji wako ili tupate kukuomba kwa jina lako. Sisi tutakusifu huku uhamishoni tuliko, maana tumeweka mbali nasi uovu wote wa wazee wetu waliokukosea.

⁸Tazama, sisi sasa tumo uhamishoni ambamo wewe umetutawanya, tudharauliwe, tulaaniwe na kuadhibiwa kwa sababu ya maovu yote ya wazee wetu ambao walikuacha wewe Bwana Mungu wetu.”

Hekima mwongozo wa Israeli

⁹Sikiliza amri za uhai, ewe Israeli!

Tega sikio, ukajifunze hekima!

¹⁰Imekuwaje, ee Israeli,

imekuwaje uko nchini mwa maadui zako;

kwamba umezeeka katika nchi ya kigeni

na kutiwa unajisi kwa maiti?

¹¹Imekuwaje umehesabiwa pamoja na walio kuzimu?

¹²Wewe umeiacha chemchemi ya Hekima.

¹³Kama ungalifuata njia ya Mungu

ungalikuwa unaishi kwa amani milele.

¹⁴Jifunze palipo na Hekima,

mahali penye nguvu,

mahali penye maarifa, upate kugundua penye maisha marefu na uhai,

penye mwanga wa kuangazia macho na penye amani.

¹⁵Nani amewahi kugundua alipo Hekima,

Nani aliyefaulu kuingia katika ghala zake?

¹⁶Wako wapi watawala wa mataifa,

wale watawalao wanyama duniani kwa mabavu?

¹⁷Wako wapi wale wachezao na ndege wa angani,

wenye kurundika fedha na dhahabu

ambazo watu huzitegemea,

hata hawatosheki kuzitafuta?

¹⁸Wapi waliopanga na kuhangaika kupata fedha tu

na ambao kazi zao hazikuacha alama yoyote?

¹⁹Wote hao watoweka na kuishia chini kuzimu,

na wengine wamezuka mahali pao.

²⁰Kizazi kipya kimeikalia nchi,

nacho pia kikauona mwanga wa mchana,

lakini hakikujifunza njia ya maarifa

wala hakikuzijua njia zake, wala hakikufaulu kumpata Hekima.

²¹Wazawa wake walipotoka njiani mwa Hekima.

²²Hekima hajapata kusikika Kanaani,

wala kuonekana katika Temani.

²³Wazawa wa Hagari watafutao maarifa duniani,

wafanyabiashara wa Merani na Temani,

wasimulizi wa visa na wenye kutafuta maarifa,

hawajajifunza njia ya Hekima,

hawajui chochote juu ya njia zake.

²⁴Ee Israeli, jinsi gani ilivyo kubwa nyumba ya Mungu!

Na jinsi gani ilivyo kubwa nchi anayomiliki!

²⁵Ni kubwa na haina mipaka,

haina kimo na haipimiki.

²⁶Majitu maarufu ya kale yalizaliwa humo;

watu wakubwa kwa kimo na stadi vitani.

²⁷Mungu hakuwateua hao

wala kuwajulisha njia ya maarifa.

²⁸Hivyo waliangamia kwa kutokuwa na hekima;

waliangamia kwa upumbavu wao wenyewe.

²⁹Nani aliyepanda mbinguni akamchukua Hekima,

akamleta chini kutoka mawinguni?

³⁰Nani aliyewahi kusafiri baharini na kumpata?

Nani awezaye kumnunua kwa dhahabu?

³¹Hakuna mtu ajuaye njia ya kwenda kwake,

wala anayejali njia iendayo kwake.

³²Lakini yeye ajuaye kila kitu anamjua Hekima,

alimpata kutokana na maarifa yake.

Yeye aliyeitayarisha dunia tangu milele

aliijaza viumbe vyenye miguu minne.

³³Yeye huutuma mwanga nao huenda;

aliuita nao ukamtii kwa hofu.

³⁴Nyota huangaza mahali pao kwa furaha,

yeye huziita nazo husema, “Tupo hapa”.

Huangaza kwa furaha kwa ajili yake yeye aliyeziumba.

³⁵Huyu ni Mungu wetu,

hakuna awezaye kulinganishwa naye.

³⁶Mungu aliigundua njia yote ya maarifa

akampatia Yakobo mtumishi wake,

naam, akampatia Israeli aliyempenda.

³⁷Baadaye Hekima alitokea duniani

akaishi pamoja na binadamu.