Jukumu la watawala

¹Sikilizeni basi, enyi wafalme, mkaelewe;[#6:1 Kuwa na hekima ni bora kuliko kuwa na nguvu; afadhali kuwa mwenye busara kuliko kuwa shujaa!]

jifunzeni, enyi waamuzi popote duniani.

²Tegeni sikio nyinyi mnaotawala watu wengi,

na kujisifia wingi wa mataifa.

³Mamlaka hayo mlipewa na Bwana;

na utawala mliupata kwa Mungu Mkuu.

Atazipima kazi zenu na kuchunguza mipango yenu.

⁴Maana, kama watumishi katika utawala wake, hamtawali kwa uadilifu,

kama hamshiki sheria,

wala kufuata mwongozo wa Mungu,

⁵yeye atawajia ghafla na kuwapeni adhabu kali,

maana adhabu kali huwapata aghalabu wenye madaraka.

⁶Watu wa kawaida wanaweza kusamehewa kutokana na huruma;

lakini wenye madaraka watakabiliwa na uchunguzi mkali.

⁷Maana Bwana wa wote hamwogopi mtu yeyote,

ukuu wa mtu hauwezi kumfanya apendelee;

Yeye mwenyewe aliwafanya wote, wakubwa na wadogo

na huangalia mahitaji ya wote kwa usawa.

⁸Lakini wenye madaraka watakabiliwa na uchunguzi mkali.

⁹Basi, maneno yangu yawahusu nyinyi wafalme,

ili mjifunze kuwa na hekima, msije mkakosa.

¹⁰Maana wanaozingatia mambo matakatifu

watakubaliwa kuwa watakatifu.

Waliofunzwa hayo watapata humo cha kujitetea hukumuni.

¹¹Basi, muwe na hamu ya mafundisho yangu;

yatamani yawaongoze nanyi mtapata nidhamu.

Thamani ya Hekima

¹²Hekima huangaza wala hafifii.

Wanaompenda Hekima humwona kwa urahisi,

wanaomtafuta Hekima humpata.

¹³Hekima hutangulia kujionesha kwa wale wanaomtaka.

¹⁴Ukiamka mapema asubuhi kumtafuta, hutataabika;

utamkuta anakungojea mlangoni pake.

¹⁵Kumsikiliza Hekima kwa makini ni kupata maarifa kamili.

Ukimtafuta usiku na mchana hutapata masumbuko.

¹⁶Hekima daima huwatafuta wale wanaomstahili;

njiani hujidhihirisha kwao kwa upendo,

yu pamoja nao katika kila wazo.

¹⁷Mwanzo wa Hekima ni hamu kubwa ya kufunzwa;

kujali mafundisho ni kumpenda Hekima,

¹⁸kumpenda ni kushika sheria zake;

kushika sheria zake ni uhakika wa kutokufa.

¹⁹na kutokufa kwamleta mtu karibu na Mungu.

²⁰Hivyo hamu ya kumpata Hekima huongoza kwenye ufalme.

²¹Basi, enyi watawala wa watu,

kama mwafurahia viti vyenu vya enzi

na alama za mamlaka juu ya watu,

mheshimuni Hekima mpate kutawala milele.

Nia ya kuwashirikisha wengine Hekima

²²Nitawaambieni Hekima ni nani na chanzo chake.

Sitawaficheni siri yoyote ile;

nitawaambieni historia yake yote tangu mwanzo wake,

na kudhihirisha wazi habari zake

bila kuacha ukweli wowote ule.

²³Wivu ule mbaya kamwe hautakuwa mwenzangu,

maana Hekima hapatani na hali ya wivu.

²⁴Wingi wa wenye Hekima ni wokovu kwa ulimwengu,

mfalme mwenye busara ni uthabiti wa watu wake.

²⁵Kwa hiyo basi, mfunzwe na maneno yangu,

nanyi mtapata faida.