1 Wakorinto 15

Kristo amekufa na kufufuka tena.

¹*Ndugu, nataka kuwatambulisha vena huo Utume mwema, niliowatangazia; ndio, mlioupokea na kuukalia,

²tena ndio, ambao mnaokolewa nao, ikiwa mmeyashika maneno ya hiyo mbiu njema, niliyowapigia, isipokuwa mmeitegemea bure.

³Kwani kwanza nimewatolea, niliyoyapokea hata mimi ya kwamba: Kristo alikufa kwa ajili ya makosa yetu, kama alivyoandikiwa;[#Yes. 53:8-9; Luk. 24:27,44-47.]

⁴nayo ya kwamba: Alizikwa, akafufuliwa siku ya tatu, kama alivyoandikiwa.[#Sh. 16:10.]

⁵Kisha alimtokea Kefa, kisha akawatokea wale kumi na wawili.[#Mar. 16:14; Luk. 24:34; Yoh. 20:19-29.]

⁶Kisha akawatokea ndugu waliopita mia tano, walipokuwa pamoja; namo miongoni mwao wengi wako wazima hata sasa, lakini wengine wamelala.

⁷Kisha akamtokea Yakobo, kisha mitume wote.[#Luk. 24:50.]

⁸Hayo yote yakiisha, akanitokea hata mimi, ijapo sikuzaliwa, siku zilipotimia.[#1 Kor. 9:1; Tume. 9:3-6.]

⁹Kwani mimi ni mdogo kuliko mitume wote, hainipasi kuitwa mtume, kwa sababu naliwafukuza wateule wake Mungu.[#Ef. 3:8.]

¹⁰Lakini ni gawio la Mungu nikiwa hivyo, nilivyo, nalo gawio lake, nililopewa, halikuwa la bure; ila nimejisumbua kuwapita wao wote, lakini si mimi, ila ni gawio lake Mungu lililofuatana nami.*[#2 Kor. 11:5,23.]

¹¹Basi, nikiwa mimi, au wakiwa wale, hivyo ndivyo, tunavyovitangaza, tena ndivyo, mlivyovitegemea.

Pasipo kufufuka kwake Kristo kumtegemea kwetu ni kwa bure.

¹²*Lakini Kristo akitangazwa, ya kuwa amefufuka katika wafu, kwenu wengine husemaje: Hakuna ufufuko wa wafu?

¹³Kama hakuna ufufuko wa wafu, hata Kristo hakufufuka.

¹⁴Lakini kama Kristo hakufufuka, matangazo yetu ni ya bure, nako kumtegemea kwenu ni kwa bure.

¹⁵Tena sisi tungeonekana kuwa mashahidi wa Mungu wa uwongo, kwa sababu tulimshuhudia Mungu, ya kuwa alimfufua Kristo, asiyemfufua, ikiwa watu hawafufuki.[#Tume. 1:22.]

¹⁶Kwani kama wafu hawafufuki, hata Kristo hakufufuka.[#1 Kor. 6:14.]

¹⁷Lakini kama Kristo hakufufuka, kumtegemea kwenu ni kwa bure, nayo makosa yenu mkingali mnayo bado.[#1 Kor. 15:14.]

¹⁸Basi, nao waliolala katika Kristo wangekuwa wamepotea.

¹⁹Vikiwa hivyo, nasi katika maisha yetu ya huku nchini, kama kingojeao chetu ni Kristo tu, tungekuwa wakiwa kuliko watu wote.

Kristo amefufuka kweli.

²⁰Lakini sasa Kristo amekwisha fufuka katika wafu, ni limbuko lao waliolala.*[#1 Kor. 11:30; Kol. 1:18.]

²¹Kwani kama kufa kulivyoletwa na mtu, vivyo hivyo hata kufufuka kwa wafu kuliletwa na mtu.[#1 Mose 3:17-19; Rom. 5:12,18.]

²²Kwani kama wanavyokufa wote kwa kuwa wana wa Adamu, vivyo hivyo wote watarudishwa uzimani kwa kuwa wake Kristo,

²³lakini kila mmoja mahali pake: limbuko ndio Kristo; pafuatana walio wake Kristo hapo, atakapojia;[#1 Kor. 15:20; 1 Tes. 4:16-17; Ufu. 20:5.]

²⁴mwisho ni hapo, atakapompa Mungu Baba ufalme, ni hapo, atakapokuwa amekwisha kuutangua ukubwa wote na nguvu na uwezo wote.[#Dan. 2:44.]

²⁵Kwani yeye sharti ashike ufalme, mpaka awaweke adui zake wote chini miguuni pake.[#Sh. 110:1; Mat. 22:44.]

²⁶Adui wa mwisho atakayeshindwa ni kifo.[#Sh. 8:7; Ufu. 20:14; 21:4.]

²⁷Kwani aliyaweka yote chini miguuni pake. Lakini pakisemwa: Yote yaliwekwa chini yake, iko waziwazi, ya kuwa ndiyo yote pasipo yule aliyeyaweka yote chini yake.

²⁸Lakini hapo, yote yatakapokuwa yamekwisha kuwekwa chini yake, ndipo, naye Mwana mwenyewe atajiweka chini yake yule aliyeyaweka yote chini yake. Maana yote yawe yake Mungu po pote.

²⁹Kama sivyo, wale wanaobatizwa kwa ajili ya wafu wangewapatia nini? Kama wafu hawafufuki kamwe, hubatizwaje?

³⁰Nasi tunajiponzaje saa zo zote?[#Rom. 8:36.]

³¹Ndugu, ninakufa siku kwa siku; ndivyo, ninavyotukuzwa kwenu, tena ndivyo, na Bwana wetu Yesu Kristo anavyonitukuza.[#2 Kor. 4:10-11.]

³²Kama nimeshindana na nyama wakali kimtu tu huko Efeso, vingenifaliaje? Wafu wasipofufuka, basi:

Na tule, na tunywe! Kwani kesho tutakufa!

³³Msipotelewe! Maongezi maovu huangamiza mazoezo mazuri.

³⁴Levukeni kweli, msikose! Kwani wengi hawamtambui Mungu. Haya nayasemea kuwatia soni ninyi.[#1 Kor. 6:5; Tume. 26:8; Rom. 13:11; Ef. 5:14.]

Miili ya ufufuko.

³⁵Lakini labda yuko atakayeuliza: Wafu watafufukaje? Nao watakuja wenye miili gani?

³⁶Mjinga wee! Unachokipanda, hakirudi uzimani, isipokuwa kife kwanza.[#Yoh. 12:24.]

³⁷Tena ukipanda hupandi mwili utakaokuwapo, ila unapanda kipunje kitupu, ikiwa cha ngano au cha mbegu nyinginyingine.

³⁸Lakini Mungu hukipa mwili, kama anavyotaka, kila mbegu hupewa mwili wake mwenyewe.[#1 Mose 1:11.]

³⁹Nyama zote si nyama moja tu, ila nyingine ni ya watu, nyingine ni ya ng'ombe, nyingine ni ya ndege, nyingine ni ya samaki.

⁴⁰Tena iko miili ya mbinguni na miili ya nchini. Lakini uzuru wao ya mbinguni uko mbali, nao uzuri wao ya nchini uko mbali.

⁴¹Uzuri wa jua uko mbali, nao uzuri wa mwezi uko mbali, nao uzuri wa nyota uko mbali, kwani nazo nyota na nyota zinapitana uzuri.

⁴²Nao ufufuko wa wafu utakuwa vivyo hivyo. Hupandwa yenye kuoza, hufufuliwa isiyooza.

⁴³Hupandwa yenye kubezwa, hufufuliwa yenye kutukuzwa. Hupandwa yenye unyonge, hufufuliwa yenye nguvu.[#Fil. 3:20-21.]

⁴⁴Hupandwa miili ya kimtu, hufufuliwa miili ya kiroho. Kama iko miili ya kimtu, nayo ya kiroho iko.

⁴⁵Kwani ndivyo, vilivyoandikwa kwamba: Adamu, yule mtu wa kwanza, alipata kuwa mwenye roho ya uzima. Naye Adamu wa mwisho amepata kuwa roho yenye kurudisha uzimani.[#1 Mose 2:7; 2 Kor. 3:17.]

⁴⁶Lakini mwili wa kiroho sio wa kwanza, ila wa kimtu ndio uliotangulia, kisha kukafuata wa kiroho.

⁴⁷Mtu wa kwanza alitoka nchini, ni wa nchini; mtu wa pili alitoka mbinguni.

⁴⁸Yule wa nchini alivyo, ndivyo, wa nchini walivyo nao. Naye yule wa mbinguni alivyo, ndivyo, wa mbinguni watakavyokuwa nao.

⁴⁹Nasi tulivyokuwa wenye sura ya yule wa nchini, ndivyo, tutakavyokuwa hata wenye sura ya yule wa mbinguni.[#1 Mose 5:3.]

⁵⁰Ndugu, hili nalisema waziwazi: Yenye nyama na damu haiwezi kuurithi ufalme wa Mungu, wala yenye kuoza haitairithi isiyooza.[#1 Kor. 6:13.]

⁵¹Tazameni, ninawaambieni neno lililokuwa limefichika siku zote: Hatutalala sisi sote, lakini sote tutageuzwa.[#1 Tes. 4:15-17.]

⁵²Itakuwapo katika kitambo kidogo tu kama cha kufumba jicho tu; ni hapo, baragumu la mwisho litakapolia.[#Mat. 24:31; 1 Tes. 4:16.]

⁵³Kwani miili hii yenye kuoza sharti ivae isiyooza, nayo yenye kufa sharti ivae isiyokufa.[#2 Kor. 5:4.]

⁵⁴*Lakini hapo, hii miili yenye kuoza itakapovaa isiyooza, nayo yenye kufa itakapovaa isiyokufa, ndipo, litakapokuwapo lile neno lililoandikwa:

⁵⁵Kufa kumemezwa, kukashindwa!

Wewe kifo, kushinda kwako kuko wapi?

Wewe kuzimu, uchungu wako luko wapi?

⁵⁶Kwani uchungu wa kufa ndio ukosaji, lakini nguvu ya ukosaji ndiyo Maonyo.[#Rom. 7:7-8,13; 6:14.]

⁵⁷Lakini Mungu atukuzwe atupaye kushinda kwa nguvu ya Bwana wetu Yesu Kristo!

⁵⁸Kwa hiyo, ndugu zangu wapendwa, mjishupaze, msitukutike! Jikazeni kuendelea kazini mwa Bwana po pote, kwa kuwa mmejua, ya kama masumbuko yenu, mnayoyaona kwa ajili ya Bwana, siyo ya bure!*