Ujuzi wa Mungu na ujuzi wa ulimwengu huu.

¹Nami, ndugu, nilipokuja kwenu nalijia kuutangaza ushuhuda wa Mungu; sikuja kuwaambia maneno makuu ya werevu ulio wa kweli.[#1 Kor. 1:17.]

²Kwani kwenu sikuwaza werevu mwingine, asipokuwa Yesu Kristo, naye hivyo, alivyowambwa msalabani.[#Gal. 6:14.]

³Nami nalikaa kwenu mwenye unyonge na woga na matetemeko mengi.[#Tume. 18:9; 2 Kor. 10:1.]

⁴Hata nilipowaambia mbiu yangu, sikutumia maneno ya werevu yenye nguvu ya kushinda, ila nimetumia Roho yenye nguvu,[#1 Kor. 2:1; Mat. 10:20.]

⁵kusudi mmtegemee Bwana, ila visiwe kwa kushindwa na werevu wa kimtu, ila kwa kushindwa na nguvu yake Mungu.[#Ef. 1:17,19; 1 Tes. 1:5.]

⁶*Tena yako ya werevu wa kweli; tunawaambia wale wenye kuyatimiza yote. Lakini nayo siyo ya werevu wa ulimwengu huu, wala wa wakuu wa ulimwengu huu walio wenye kufa.

⁷Ila yaliyo ya werevu wa Mungu ulio wa kweli ndiyo, tunayoyasema, nayo yalikuwa hayajatokea bado, maana yalikuwa yamefichwa; huko kale, ulimwengu ulipokuwa haujawa bado, Mungu aliyachagua yayo hayo, yatokee sasa kututukuza sisi.[#Rom. 16:25; Kol. 2:3.]

⁸Kwao wanaoutawala ulimwengu huu hakuna aliyeyatambua. Maana kama wangaliyatambua, wasingalimwamba msalabani Bwana aliye mwenye utukufu.

⁹Ila ilikuwa, kama ilivyoandikwa:

Jicho lisiyoyaona, sikio lisiyoyasikia,

moyo wa mtu usiyoweza kuyatia mwake,

ndiyo, Mungu aliyowaandalia wale wampendao.

¹⁰Lakini sisi Mungu ametufunulia hayo alipotupa Roho wake. Kwani Roho huyapambanua mambo yote, hata vilindi vya Mungu[#Mat. 13:11; Ef. 1:9-10; Kol. 1:26-27.]

¹¹Kwani yuko mtu ayajuaye mambo ya mtu, isipokuwa roho yake yule mtu iliyomo mwake? Vivyo hivyo mambo ya Mungu nayo hakuna ayatambuaye, asipokuwa Roho wake Mungu.

¹²Lakini sisi hatukupewa roho ya ulimwengu huu, ila tumepewa Roho iliyotoka kwa Mungu, tupate kuyajua, tuliyogawiwa na Mungu.

¹³Nayo ndiyo, tuyasemayo; tena hatuyasemi kwa maneno, tuliyofundishwa na werevu wa kimtu, ila tulifundishwa na Roho; hivyo mambo ya Roho tunayapatia hata maneno ya Roho.[#1 Kor. 2:1,4.]

¹⁴Lakini mtu anayeutii moyo wake tu hayafumbui ya Roho wake Mungu; huyawazia kuwa mapumbavu tu, hawezi kuyatambua, kwani hayo sharti yachunguzwe kwa nguvu ya Roho.[#1 Kor. 1:23; Yoh. 8:47.]

¹⁵Lakini mtu anayemtii Roho huyachunguza yote, lakini mwenyewe hakuna, ambaye achunguzwa naye.[#1 Yoh. 2:20.]

¹⁶Maana:

Yuko aliyeyatambua mawazo ya Bwana, amjulishe jambo?

Lakini sisi tunayo mawazo yake Kristo.*