Mwombezi kwa Baba.

¹Ninyi vitoto, mlio wangu, haya nawaandikiani, msikose. Lakini kama yuko aliyekosa, tunaye mwombezi kwa Baba, ndiye Yesu Kristo aliye mwongofu.[#Rom. 8:34; Ebr. 7:25.]

²Naye ndiyo kole iliyotolewa kwa ajili ya makosa yetu, lakini si kwa ajili ya makosa yetu tu, ila hata kwa ajili ya makosa ya ulimwengu wote.[#Kol. 1:20.]

³Namo humu ndimo, tutambuamo, ya kuwa tumemtambua, tukiyashika maagizo yake.

⁴Mtu akisema: Nimemtambua, lakini maagizo yake hayashiki, mtu huyo ni mwongo, nayo kweli haimo mwake.

⁵Lakini mtu akilishika Neno lake, mwake yeye upendo wa Mungu umetimia kweli. Humu ndimo, tutambuamo, kama tumo mwake.[#Yoh. 14:21,23.]

⁶Mtu anayesema: Nafuliza kuwa mwake, huyo inampasa kufanya mwenendo, kama yeye alivyofanya mwenendo.[#Yoh. 13:15; 1 Petr. 2:22.]

Agizo jipya.

⁷Wapendwa, siwaandikii agizo jipya, ila agizo la kale, mlilokuwa nalo tangu mwanzo. Agizo hilo la kale ndilo Neno, mlilosikia.[#1 Yoh. 1:5; Yoh. 13:34; 2 Yoh. 5.]

⁸Tena nawaandikia agizo jipya lililo kweli mwake namo mwenu ninyi, kwamba: Giza hupita, nao mwanga wa kweli umekwisha kumulika.[#Yoh. 13:34; Rom. 13:12.]

⁹Mtu akisema: Nimo mwangani, akamchukia ndugu yake, yumo gizani hata sasa hivi.[#1 Yoh. 4:20.]

¹⁰Mwenye kumpenda ndugu yake hukaa mwangani, asiwe na kwazo lililomo mwake.

¹¹Lakini mwenye kumchukia ndugu yake yumo gizani na kuendelea gizani, asijue, anakokwenda, kwani giza imempofusha macho yake.

Msiupende ulimwengu huu!

¹²Nawaandikia ninyi mlio vitoto, kwani mmeondolewa makosa yenu kwa ajili ya jina lake.

¹³Nawaandikia ninyi mlio baba, kwani mmemtambua yeye aliye mwenye kuwapo tangu mwanzo. Nawaandikia ninyi mlio vijana, kwani mmemshinda yule Mbaya.

¹⁴Naliwaandikia ninyi mlio wana, kwani mmemtambua Baba. Naliwaandikia ninyi mlio baba, kwani mmemtambua yeye aliye mwenye kuwapo tangu mwanzo. Naliwaandikia ninyi mlio vijana, kwani mko na nguvu, hata Neno la Mungu linakaa mwenu, nanyi mmemshinda yule Mbaya.[#Ef. 6:10.]

¹⁵Msiupende ulimwengu huu, wala vilivyomo ulimwenguni! Mtu akiupenda ulimwengu huu, upendo wa Baba haumo mwake huyo.[#Yak. 4:4.]

¹⁶Kwani vyote vilivyomo ulimwenguni: tamaa za miili nazo tamaa za macho nayo mambo makuu, watu wanayojivunia, havikutoka kwake Baba, ila ulimwenguni.

¹⁷Ulimwengu huu utapita pamoja na tamaa zake; lakini ayafanyaye, Mungu ayatakayo, hukaa kale na kale.*

Mpinga Kristo.

¹⁸Vitoto, sasa ni saa ya mwisho. Kama mlivyosikia, ya kuwa Mpinga Kristo anakuja, sasa wapinga Kristo wamekwisha kuwapo wengi; kwa hiyo twatambua, ya kuwa ni saa ya mwisho.[#Mat. 24:5,24; 2 Tes. 2:3-4.]

¹⁹Walitoka kwetu sisi, lakini hawakuwa wa kwetu; kwani kama wangalikuwa wa kwetu, wangalikaa pamoja nasi. Lakini walitoka, kusudi waonekane waziwazi, ya kuwa hao wote sio wa kwetu.[#Tume. 20:30.]

²⁰Nanyi mmemiminiwa mafuta naye aliye Mtakatifu, mkayajua yote.[#1 Yoh. 2:27; Yoh. 16:13.]

²¹Sikuwaandikia ninyi, kwa sababu hamkuyajua yaliyo ya kweli, ila kwa sababu mmeyajua, tena mmejua, ya kuwa hakuna uwongo utokao kwenye ukweli.

Anayemkana Mwana hanaye Baba vilevile.

²²Tena yuko nani aliye mwongo, asipokuwa yeye anayekana kwamba: Yesu siye Kristo? Huyo ndiye mpinga Kristo anayemkana Baba na Mwana.

²³Kila anayemkana Mwana hata Baba hanaye vilevile; lakini anayemwungama Mwana anaye hata Baba.[#1 Yoh. 4:15; Yoh. 5:23; 1 Yoh. 2:7.]

²⁴Nanyi mliyoyasikia tangu mwanzo, sharti yakae mwenu! Hayo, mliyoyasikia tangu mwanzo, yakikaa mwenu, hata ninyi mtakaa mwake Mwana namo mwake Baba.

²⁵Nacho kiagio, alichotuagia mwenyewe, ndicho hiki: uzima wa kale na kale.

²⁶Haya nimewaandikia ninyi kwa ajili yao wanaowapoteza.[#1 Yoh. 2:20; Yer. 31:34; Yoh. 16:13; 2 Kor. 1:21-22.]

²⁷Yale mafuta, mliyomiminiwa naye, huwakalia, msifundishwe tena na mtu; ila kama mafuta yake yalivyowafundisha mambo yote, ndivyo, yalivyo kweli, huu si uwongo. Kwa hiyo yakalieni, kama yalivyowafundisha ninyi.

²⁸Sasa, vitoto, kaeni mwake yeye, tupate kushangilia, atakapotokea waziwazi, tusipatwe na soni naye hapo, atakaporudi![#1 Yoh. 4:17.]

²⁹Mkijua, ya kuwa yeye ni mwongofu, na mtambue, ya kuwa kila anayefanya wongofu amezaliwa naye yeye![#1 Yoh. 3:7,10.]