Sisi tu wana wa Mungu.

¹*Tazameni, jinsi Baba alivyotupenda sana, tuitwe watoto wa Mungu! Nasi ndio. Kwa hiyo ulimwengu haututambui, kwani haukumtambua yeye.[#Yoh. 1:12-13; 16:3.]

²Wapendwa, sasa tu watoto wa Mungu, lakini havijafunuliwa bado, tutakavyokuwa; twajua tu, ya kuwa vitakapofunuliwa tutafanana naye, tumwone, alivyo.[#Rom. 8:17; 1 Kor. 15:49; Kol. 3:4.]

³Kila mwenye kumngojea hivyo hujing'aza, kama yeye alivyo mng'avu.

⁴Kila mwenye kukosa hukataa kuonyeka, nako kukosa ndiko kukataa kuonyeka.

⁵Nanyi mwajua, ya kuwa yule ametokea waziwazi, ayaondoe makosa, maana mwake yeye hamna kosa.*[#Yes. 53:4-5,9; 1 Petr. 2:24.]

⁶Kila mwenye kukaa mwake hakosi; lakini kila mwenye kukosa hakumwona yeye, wala hakumtambua.[#1 Yoh. 3:24; Rom. 6:14; 2 Kor. 5:17; 3 Yoh. 11.]

⁷Vitoto, pasioneke mwenye kuwapoteza! Mwenye kufanya wongofu ni mwongofu, kama yeye alivyo mwongofu.[#1 Yoh. 2:29.]

⁸Mwenye kukosa ametoka kwake Msengenyaji, kwani Msengenyaji hukosa tangu mwanzo. Kwa hiyo mwana wa Mungu alitokea waziwazi, azivunje kazi zake Msengenyaji.[#Yoh. 8:44.]

⁹Kila aliyezaliwa naye Mungu hakosi, kwani mbegu zake hukaa mwake; kwa hiyo hawezi kukosa, maana alizaliwa naye Mungu.[#1 Yoh. 3:6; 5:18; Rom. 6:11.]

¹⁰Hapo ndipo panapoonekana wazi walio watoto wa Mungu nao walio watoto wa Msengenyaji: kila asiyefanya wongofu hakutoka kwake Mungu, naye asiyempenda ndugu yake vilevile.

¹¹Kwani huu ndio utume, mliousikia tangu mwanzo: Tupendane sisi kwa sisi![#Yoh. 13:34.]

¹²Tusiwe kama Kaini aliyekuwa wa yule Mbaya, akamwua nduguye. Naye alimwua kwa sababu gani? Kwa sababu matendo yake yeye yalikuwa mabaya, lakini yake nduguye yalikuwa yenye wongofu.[#1 Mose 4:8.]

Anayemchukia ndugu yake ni mwua watu.

¹³*Msistaajabu, ndugu, ulimwengu ukiwachukia ninyi![#Mat. 5:11; Yoh. 15:18-19.]

¹⁴Sisi twajua, ya kuwa tumetoka kwenye kufa na kuingia kwenye uzima, kwani twawapenda ndugu; asiyewapenda yuko kufani bado.[#1 Yoh. 2:11; Yoh. 5:24.]

¹⁵Kila amchukiaye ndugu yake ni mwua watu, nanyi mwajua: hakuna mwua watu aliye mwenye uzima wa kale na kale, atakaoukalia.[#Mat. 5:21-22.]

¹⁶Hapo ndipo, tulipoutambua upendo: Yeye aliitoa roho yake kwa ajili yetu; nasi imetupasa kuzitoa roho zetu kwa ajili ya ndugu.[#Yoh. 15:13.]

¹⁷Lakini mtu mwenye mali za humu ulimwenguni akimtazama tu ndugu yake aliyekosa chakula, akamfungia moyo ake, asimgawie, upendo wa Mungu unamkaliaje?[#1 Yoh. 4:20; 5 Mose 15:7.]

¹⁸Vitoto, tusipendane kwa maneno, wala kwa ndimi, ila kwa matendo na kwa kweli!*[#Yak. 1:22; 2:15-16.]

¹⁹Hapo tutatambua, kama sisi tu wenye kweli, tena hivyo tutaituliza mioyo yetu mbele yake yeye.

²⁰Kwani mioyo yetu ikituchafukia, Mungu ni mkubwa kuliko mioyo yetu, naye huyatambua yote.

²¹Wapendwa, mioyo yetu isipotuchafukia, sisi humshangilia Mungu.[#Rom. 5:1-2; Ebr. 4:16.]

²²Ndipo, tutakapopewa naye lolote, tutakaloliomba, kwani twayashika maagizo yake kwa kuyafanya yanayompendeza.[#Mar. 11:24.]

²³Hili ndilo agizo lake, tulitegemee Jina la Mwana wake Yesu Kristo na kupendana sisi kwa sisi, kama yeye alivyotuagiza.[#Yoh. 6:29; 15:17.]

²⁴Naye mwenye kuyashika maagizo yake hukaa mwake yeye, naye yeye mwake huyo. Hapo twatambua, ya kuwa yumo mwetu, tukiwa na Roho, aliyetupa sisi.[#1 Yoh. 4:13; Rom. 8:9.]