Maagano ya Salomo na mfalme Hiramu.

¹Hiramu, mfalme wa Tiro, akatuma watumishi wake kwa Salomo, kwani alisikia, ya kuwa wamempaka mafuta, awe mfalme mahali pa baba yake, kwani Hiramu alikuwa akimpenda Dawidi siku zote.[#2 Sam. 5:11.]

²Salomo akatuma kwa Hiramu kumwambia:

³Wewe unajua, ya kuwa baba yangu Dawidi hakuweza kulijengea Jina la Bwana Mungu wake nyumba kwa ajili ya vita, adui zake walivyomletea toka pande zote, hata Bwana akawaweka chini ya nyayo za miguu yake.

⁴Sasa Bwana Mungu wangu amenipa kutulia pande zote, hakuna mpingani wala jambo baya.

⁵Kwa hiyo nimesema, nilijengee Jina la Bwana Mungu wangu nyumba, kama Bwana alivyomwambia baba yangu Dawidi kwamba: Mwanao, nitakayempa kukaa mahali pako katika kiti chako cha kifalme, ndiye atakayelijengea Jina langu nyumba.[#2 Sam. 7:13.]

⁶Sasa agiza, watu wanikatie miangati huko Libanoni! Watu wangu na wachanganyike na watu wako, nao mshahara wote wa watu wako nitakupa, kama utakavyosema, kwani mwenyewe unajua, ya kuwa kwetu hakuna ajuaye kuchonga miti kama watu wa Sidoni.

⁷Ikawa, Hiramu alipoyasikia haya maneno ya Salomo akafurahi sana, akasema: Bwana na atukuzwe leo hivi, kwani amempa Dawidi mwana mwenye werevu wa kweli wa kuwatawala wale watu wengi.[#1 Fal. 10:9.]

⁸Ndipo, Hiramu alipotuma kwa Salomo kumwambia: Nimeyasikia maneno yako, uliyotuma kuniambia. Mimi nitayafanya yote, uyatakayo, nikupatie miti ya miangati na miti ya mivinje.

⁹Watu wangu wataitelemsha toka Libanoni hata baharini; kisha mle baharini nitaifunga, ielee; ndivyo, nitakavyoifikisha mahali pale, utakaponiambia; hapo nitaifungua tena, wewe upate kuichukua. Nawe na uyafanye, niyatakayo, ukiwapa watu wa kwangu vyakula.

¹⁰Kisha Hiramu akampa Salomo miti ya miangati na miti ya mivinje, yote kama alivyoitaka.

¹¹Naye Salomo akampa Hiramu kori 20000, ndio frasila 200000 za ngano kuwa posho za watu wa kwake na kori 20, ndio frasila 200 za mafuta mazuri mno; hivi ndivyo, Salomo alivyompa Hiramu mwaka kwa mwaka.

¹²Bwana akampa Salomo werevu wa kweli, kama alivyomwambia. Kwao Hiramu na Salomo yakawako matengemano, wakafanya agano hao wawili.[#1 Fal. 3:12; 4:29.]

¹³Kisha mfalme Salomo akawatoza Waisiraeli wote watu wa kazi za nguvu, nao hao watu wa kazi za nguvu wakawa watu 30000.

¹⁴Akatuma kila mwezi watu 10000 kwenda Libanoni, wapokeane hivyo: mwezi mmoja wakae Libanoni, kisha nyumbani kwao miezi miwili. Naye Adoniramu alikuwa mkuu wao hao watu wa kazi za nguvu.[#1 Fal. 4:6.]

¹⁵Salomo akawa nao wachukuzi wa mizigo 70000, tena wachonga mawe 80000 milimani.

¹⁶Tena Salomo akawa na wasimamizi 3300 waliowekwa naye kuwa wakuu wa wafanya kazi na kuwasimamia, wakifanya kazi.

¹⁷Mfalme akaagiza, wavunje mawe yaliyo makubwa na mazuri mno ya kuchonga ya kuwekea misingi ya nyumba.

¹⁸Waashi wa Salomo na waashi wa Hiramu na Wagebali wakayachonga. Ndivyo, walivyotengeneza miti na mawe, wapate kuijenga hiyo nyumba.[#Yos. 13:5; Ez. 27:9.]