Wake wawatii waume wao!

¹Vivyo hivyo nanyi wake sharti mwatii waume wenu! Maana kama wako wasiolitii Neno, watatekwa kwa mwenendo wa wake zao pasipo kuambiwa maneno,[#Ef. 5:22.]

²wakiona kwa macho yao, mnavyoendelea king'avu kwa kuwaogopa.

³Nayo marembo yao yasiwe ya miili, kama misuko ya nywele na mapambo ya dhahabu na mavazi ya nguo nzuri![#Yes. 3:18-24; 1 Tim. 2:9.]

⁴Ila uzuri wao uwe wa mioyoni unaojificha mle ndani pasipo kuangamia, maana ni wa mtu mwenye roho ya upole na ya utulivu, naye Mungu huuona kuwa mali kweli.

⁵Kwani hata kale wanawake watakatifu waliomngojea Mungu walijipamba hivyo wakiwatii waume wao,

⁶kama Sara alivyomtii Aburahamu akimwita bwana. Nanyi wanawake, mnakuwa watoto wake mkitenda mema pasipo kuogopa vituko vyo vyote.[#1 Mose 18:12.]

Waume wawape wake zao macheo!

⁷Vilevile nanyi waume, mwendeleane na wake zenu na kuwatambua kuwa viumbe vinyonge kuliko ninyi! Tena waheshimuni! Maana nao watagawiwa urithi wao wa uzimani pamoja nanyi; fanyeni hivyo, msizuiliwe kuomba![#Ef. 5:25.]

⁸*Kisha nyote mioyo yenu sharti iwe mmoja, mpate kuvumiliana na kupendana kama ndugu walio wenye uororo na unyenyekevu!

⁹Msimlipe mtu uovu kwa uovu, wala matukano kwa matukano! Ila wafanyao hivyo mwaombee mema! Kwani hayo ndiyo, mliyoitiwa, mwirithi mbaraka.[#1 Tes. 5:15.]

¹⁰Maana

atakayependa kuwa uzimani naye atakaye kuona siku njema

aulindie ulimi wake, usiseme mabaya,

nayo midomo yake, isiseme madanganyifu!

¹¹Yaliyo mabaya ayaepuke, afanye mema,

atafute penye utengemano, apakimbilie!

¹²Maana macho ya Bwana huwatazama walio waongofu,

masikio yake huyasikia maombo yao.

Lakini uso wa Bwana huwapingia wafanyao mabaya.

Kristo alivyokwenda kuzimuni.

¹³Yuko nani atakayewaponza ninyi, mkijikaza kufanya mema?

¹⁴Lakini ijapo mteswe kwa ajili ya wongofu mtakuwa wenye shangwe. Lakini msiyaogope maogopesho yao, wala msiyahangaikie![#1 Petr. 2:20; Yes. 8:12; Mat. 5:10.]

¹⁵Ila mtakaseni Bwana Kristo mioyoni mwenu!* Tena po pote mwe tayari kumjibu kila mtu anayewauliza kwa ajili ya kingojeo chenu kilichomo mwenu! Lakini wajibuni kwa upole na kuwaogopa![#Yes. 8:13.]

¹⁶Mioyo yenu sharti ijulike kuwa miema! Hivyo wenye kuwasengenya kwamba: M waovu, wataingiwa na soni kwa ajili ya mwenendo wenu, ukiwa mzuri kwa nguvu ya Kristo.

¹⁷Kwani kuteswa kwa ajili ya kutenda mema, Mungu akivitaka, ni vizuri kuliko kuteswa kwa ajili ya kutenda maovu.[#1 Petr. 2:20; 3:14.]

¹⁸Kwani naye Kristo alikufa mara moja kwa ajili ya makosa yetu; yeye aliyekuwa mwongofu alikufa kwa ajili yetu tulio wapotovu, atupeleke kwake Mungu. Aliuawa kimwili, lakini alirudishwa uzimani Kiroho.[#1 Petr. 2:21-24; Ef. 2:18.]

¹⁹Hapo aliwaendea wazimu nao mle, waliomo kifungoni, akawapigia mbiu[#1 Petr. 4:6.]

²⁰wale waliokataa kutii kale, Mungu alipowangoja na kuwavumilia siku zile za Noa, kile chombo kikubwa kilipotengenezwa; lakini miongoni mwao wakaokoka wachache, watu wanane tu katika kondo ile ya maji.[#1 Mose 7:7,17.]

²¹Maji hayo ni mfano wa maji ya ubatizo yanayowaokoa sasa hata ninyi; kweli hayaondoi machafu ya miili, ila ya mioyo, ipate kuwa miema na kupatana naye Mungu kwa nguvu ya ufufuko wake Yesu Kristo.[#Ef. 5:26; Ebr. 10:22.]

²²Yeye yuko kuumeni kwa Mungu, maana amekwenda mbinguni, atiiwe nao malaika na wenye nguvu na wenye uwezo.[#Ef. 1:20-21.]