Sauli anawashinda Waamoni.

¹Nahasi wa Waamoni akapanda, akapiga makambi huko Yabesi katika nchi ya Gileadi. Ndipo, watu wote wa Yabesi walipomwambia Nahasi: Fanya agano nasi, tukutumikie![#1 Sam. 31:11.]

²Mwamoni Nahasi akawaambia: Basi, nitapatana nanyi hivyo: nitawachoma ninyi kila mtu jicho lake la kuume, niwatweze Waisiraeli wote.[#Yer. 39:7.]

³Wazee wa Yabesi wakamwambia: Tupe siku saba, tutume wajumbe kwenda katika mipaka yote ya Waisiraeli! Asipopatikana mwokozi wetu, tutakutokea.

⁴Wajumbe walipofika Gibea kwa Sauli na kuyasema maneno hayo masikioni pa watu, watu wote wakalia na kupaza sauti zao.

⁵Naye Sauli alikuwa anarudi malishoni akiwafuata ng'ombe; hapo Sauli akauliza: Watu wanalilia nini? Wakamsimulia habari, watu wa Yabesi walizozileta.

⁶Ndipo, roho ya Mungu ilipomjia Sauli, alipozisikia habari hizo, makali yake yakawaka moto.[#Amu. 14:6.]

⁷Akakamata ng'ombe wawili, akawakatakata, akawatuma wale wajumbe kwenda katika nchi zote za Waisiraeli na kuwapelekea watu vipande vya nyama kwamba: Kila mtu asiyetoka kumfuata Sauli na Samweli ng'ombe wake watafanyiziwa hivyo. Ndipo, watu walipoguiwa na kituko cha Bwana, wakatoka kama mtu mmoja.[#Amu. 19:29.]

⁸Alipowakagua huko Bezeki, wana wa Isiraeli walikuwa 300000, nao watu wa Yuda 30000.

⁹Wakawaambia wale wajumbe waliokuja: Hivi ndivyo, mtakavyowaambia watu wa Yabesi katika nchi ya Gileadi: Kesho, jua likianza kuwa kali, mtaona wokovu. Hao wajumbe waliporudi na kuwapasha habari hii, watu wa Yabesi wakafurahi.

¹⁰Nao watu wa Yabesi wakawaambia wale: Kesho tutawatokea, mtufanyizie yote yaliyo mema machoni penu.

¹¹Kesho yake Sauli akawagawanya watu wake kuwa vikosi vitatu, wakaingia katikati ya makambi penye zamu ya kungoja, kuche, wakawapiga Waamoni, hata jua lilipokuwa kali mchana huo. Nao waliosalia wakatawanyika, wasisalie kwao wawili tu waliokuwa pamoja.

¹²Ndipo, watu walipomwambia Samweli: Wako wapi waliosema: Huyu Sauli awe mfalme wetu? Watoeni watu hawa, tuwaue![#1 Sam. 10:27.]

¹³Lakini Sauli akasema: Asiuawe mtu wa kwetu siku hii ya leo! Kwani leo Bwana amewapatia Waisiraeli wokovu.[#1 Sam. 14:45.]

¹⁴Samweli akawaambia watu: Njoni, twende Gilgali, tuurudishie ufalme upya![#1 Sam. 10:8.]

¹⁵Watu wote wakaja Gilgali, kisha wakamweka Sauli machoni pake Bwana huko Gilgali kuwa mfalme wao wakachinja huko machoni pake Bwana ng'ombe za tambiko za shukrani, naye Sauli akachangamka sanasana pamoja na Waisiraeli wote.