Dawidi anachaguliwa kuwa mfalme.

¹Bwana akamwambia Samweli: Utamsikitikia Sauli mpaka lini? Nami ndiye niliyemtangua, asiwe mfalme wa kuwatawala Waisiraeli. Jaza pembe yako mafuta, nikutume kwa Isai wa Beti-Lehemu! Kwani nimejionea mfalme katika wanawe.[#1 Sam. 15:23,34.]

²Samweli akasema: Nitakwendaje? Sauli akivisikia ataniua. Bwana akasema: Chukua mori ya ng'ombe mkononi mwako, useme: Nimekuja kumtambikia Bwana!

³Mwalike Isai, naye aje kwenye tambiko hilo! Nami nitakujulisha utakayoyafanya, unipakie mafuta yeye, nitakayekuonyesha.

⁴Samweli akayafanya, Bwana aliyomwambia. Alipofika Beti-Lehemu, wazee wa mji wakamjia njiani na kutetemeka, wakamwamkia kwamba: Kuja kwako ni kwema?[#2 Fal. 9:18.]

⁵Akawaitikia: Ni kwema, nimekuja kumtambikia Bwana: jieueni, nanyi mje pamoja nami kutambika! Isai na wanawe akawaeua mwenyewe, alipowaalika nao kuja kutambika.

⁶Ikawa, walipokuja, alipomwona Eliabu akasema moyoni: Labda ni yeye atakayepakwa mafuta mbele yake Bwana.

⁷Lakini Bwana akamwambia Samweli: Usiitazame sura yake wala ukubwa wa umbo lake! Kwani nimemkataa; maana Bwana havitazami vile, mtu anavyovitazama, kwani mtu huvitazama vilivyopo machoni, lakini Bwana huvitazama vilivyomo moyoni.[#Tume. 10:34; Sh. 7:10.]

⁸Kisha Isai akamwita Abinadabu, akampitisha machoni pa Samweli, naye akasema: Huyu naye siye, Bwana aliyemchagua.

⁹Kisha Isai akampitisha Sama, lakini akasema: Huyu naye siye, Bwana aliyemchagua.

¹⁰Vivyo hivyo Isai akawapitisha wanawe wote saba machoni pa Samweli, lakini Samweli akamwambia Isai: Hawa sio, Bwana aliowachagua.[#1 Mambo 2:13-15.]

¹¹Kisha Samweli akamwuliza Isai: Wanao wote ni hao tu? Akasema: Amesalia yule mdogo, naye anachunga kondoo. Samweli akamwambia Isai: Tuma, wamlete! Kwani hatutakaa mezani, mpaka atakapofika hapa.[#1 Sam. 17:14.]

¹²Basi, akatuma, wakamleta, naye alikuwa mwekundu mwenye macho mazuri na umbo jema. Ndipo, Bwana alipomwambia: Haya! Umpake mafuta! Kwani huyu ndiye.

¹³Samweli akaichukua pembe yake ya mafuta, akampaka mafuta katikati ya kaka zake. Ndipo, Roho ya Bwana ilipomjia Dawidi kuanzia siku hiyo, ikamkalia siku zote. Kisha Samweli akaondoka kwenda Rama.[#2 Sam. 2:4; 5:3.]

Dawidi anampendeza Sauli kwa kupiga zeze.

¹⁴Royo yake Bwana ikaondoka mwake Sauli, nayo roho mbaya iliyotoka kwa Bwana ikamhangaisha.[#1 Sam. 18:10.]

¹⁵Ndipo, watumishi wa Sauli walipomwambia: Tazama, roho mbaya ya Mungu inakuhangaisha!

¹⁶Wewe bwana wetu na uwaagize watumishi wako wanaokutumikia, watafute mtu aliye fundi wa kupiga zeze. Napo, itakapokujia ile roho mbaya ya Mungu, basi, akikupigia zeze kwa mkono wake, utaona vema.[#2 Fal. 3:15.]

¹⁷Sauli akawaambia watumishi wake: Nitafutieni mtu anayejua vema kupiga zeze, kamleteni kwangu!

¹⁸Mmoja wao wale vijana akajibu akisema: Nimemwona mwana wa Isai wa Beti-Lehemu, ya kuwa anajua kupiga zeze, tena ni fundi wa vita menye nguvu za kupigana vitani na za kusemea watu, ni mtu mzuri wa kupendeza, naye Bwana yuko pamoja naye.

¹⁹Ndipo, Sauli alipotuma wajumbe kwa Isai na kumwambia: Mtume mwanao Dawidi achungaye kondoo, aje kwangu!

²⁰Isai akatoa punda wa kuchukua mzigo wa chakula na kiriba cha mvinyo, tena akampa mwana mbuzi mmoja, akavituma kwa Sauli mkononi mwa mwanawe Dawidi.

²¹Ndivyo, Dawidi alivyokwenda kwake Sauli, akamfanyizia kazi. Sauli akampenda sana, akawa mchukua mata yake.

²²Sauli akatuma kwa Isai kwamba: Dawidi na akae kwangu, kwani macho yangu yanamwona kuwa mpole.

²³Ikawa kila mara, ile roho ya Mungu ilipomjia Sauli, Dawidi akalichukua zeze lake, akalipiga kwa mkono wake; ndipo, Sauli alipotulia na kuona vema, ile roho mbaya ikaondoka kwake.[#1 Sam. 16:14.]