Dawidi anamkimbilia Samweli kwa kunyatiwa na Sauli.

¹Sauli akala njama na mwanawe Yonatani na watumishi wake wote ya kumwua Dawidi. Lakini Yonatani, mwana wa Sauli, alikuwa amependezwa sana na Dawidi.[#1 Sam. 18:3.]

²Kwa hiyo Yonatani akampasha Dawidi habari kwamba: Baba yangu Sauli anatafuta njia ya kukuua; sasa ujiangalie kesho! Kaa mafichoni na kujificha kabisa!

³Mimi nitatoka, nisimame kando yake baba yangu huko shambani, utakakokuwa, niseme na baba yangu kwa ajili yako, nipate habari za kukupasha wewe.

⁴Kisha Yonatani akamsemea mema kwa baba yake Sauli kwamba: Mfalme asije kumkosea mtumishi wake Dawidi! Kwani hakukukosea neno, ila amekufanyizia mema sana.

⁵Alipokwenda kumwua yule Mfilisti alijitoa mwenyewe; ndipo, Bwana alipowapatia Waisiraeli wote wokovu mkubwa, nawe ukaviona, ukafurahi. Mbona unataka kujikosesha kwa kumwaga damu ya mtu asiyekosa ukimwua Dawidi bure tu?[#1 Sam. 17:50.]

⁶Sauli akakiitikia kinywa cha Yonatani, yeye Sauli akaapa kwamba: Hivyo, Bwana alivyo Mwenye uzima, hatauawa kabisa!

⁷Kisha Yonatani akamwita Dawidi, akamsimulia maneno haya yote; kisha Yonatani akampeleka Dawidi kwa Sauli, akakaa kwake kama siku zote za mbele.

⁸Vita vilipoendelea kuwapo, Dawidi akatoka kupigana na Wafilisti, akawapiga pigo kubwa, nao wakamkimbia.

⁹Ndipo, ile roho mbaya ya Bwana ilipomjia Sauli, naye alikuwa anakaa nyumbani mwake akishika mkuki wake mkononi, naye Dawidi alikuwa akimpigia zeze kwa mkono wake.[#1 Sam. 18:10-11.]

¹⁰Sauli akataka kumchoma Dawidi ukutani kwa mkuki, lakini Dawidi akajiepusha, Sauli asimpate, mkuki ukauchoma ukuta tu. Ndipo, Dawidi alipokimbia kwa hivyo, alivyopona. Usiku huo

¹¹Sauli akatuma wajumbe kwenda kuivizia nyumba ya Dawidi, wapate kumwua asubuhi. Lakini mkewe Mikali akampasha Dawidi habari kwamba: Usipojiponya usiku huu, utauawa kesho![#Sh. 59:1.]

¹²Kisha Mikali akamshusha Dawidi dirishani, akaenda zake na kukimbia; ndivyo, alivyopona.

¹³Kisha Mikali akakichukua kinyago cha nyumbani, akakilaza kitandani, kichwani pake akaweka mto wa manyoya ya mbuzi, akakifunika kwa nguo.

¹⁴Sauli alipotuma wajumbe kumchukua Dawidi, akawaambia: Ni mgonjwa.

¹⁵Sauli akawatuma wale wajumbe tena kumtazama Dawidi akiwaambia: Mleteni kwangu, akilala kitandani, nipate kumwua!

¹⁶Wajumbe walipoingia nyumbani wakakiona kile kinyago, kimelala kitandani, nao mto wa manyoya ya mbuzi uko kichwani pake.

¹⁷Sauli akamwuliza Mikali: Kwa sababu gani umenidanganya hivyo, ukamwacha mchukivu wangu, apone? Mikali akamwambia Sauli: Ameniambia: Niache, nijiendee! Mbona unataka nikuue?

¹⁸Naye Dawidi alipopona kwa kukimbia akaenda Rama kwa Samweli, akamsimulia yote, Sauli aliyomfanyizia, kisha wakaenda yeye na Samweli, wakakaa Nayoti.

Sauli anaingia kundini mwa wafumbuaji.

¹⁹Sauli akapashwa habari za kwamba: Tazama, Dawidi yuko Nayoti kule Rama!

²⁰Ndipo, Sauli alipotuma wajumbe kumchukua Dawidi. Hao walipoona kundi la wafumbuaji wakifumbua mambo, naye Samweli akisimama kwao kama kiongozi wao, ndipo, roho ya Mungu ilipowajia wajumbe wa Sauli, nao wakafumbua mambo.[#1 Sam. 10:10-12.]

²¹Walipompasha Sauli habari hizi, akatuma wajumbe wengine, lakini nao wakaja kufumbua mambo. Ndipo, Sauli alipoendelea kutuma wajumbe mara ya tatu, lakini nao wakaja kufumbua mambo.

²²Kisha naye mwenyewe akaenda Rama; alipofika penye shimo kubwa la maji lililoko Seku akauliza kwamba: Samweli na Dawidi wako wapi? Wakamwambia: Utawaona Nayoti kule Rama.

²³Alipokwenda Nayoti kule Rama, yeye naye roho ya Mungu ikamjia; ndipo, alipokwenda hapo njiani na kufumbua mambo, hata akifika Nayoti kule Rama.

²⁴Ndipo, yeye naye alipoyavua mavazi yake, naye akafumbua mambo mbele ya Samweli, akalala chini mwenye uchi mchana huo wote na usiku huo wote, kwa hiyo watu husema: Kumbe Sauli naye yumo katika wafumbuaji!