Dawidi anapewa mikate aliyowekewa Bwana.

¹Dawidi akaja Nobe kwa mtambikaji Ahimeleki; Ahimeleki akashikwa na woga, akamwendea Dawidi njiani, akamwuliza: Mbona unakuja peke yako, usiwe na mtu wa kufuatana na wewe?

²Dawidi akamwambia mtambikaji Ahimeleki: Mfalme ameniagiza neno na kuniambia: Mtu asilijue hili neno, ninalokutuma nililokuagiza! Wako vijana, niliowaagiza, waje mahali fulani.

³Una chakula gani sasa? Kama ni mikate mitano, nipe, niende nayo, au cho chote kingine kinachoonekana!

⁴Mtambikaji akamjibu Dawidi akisema: Sinayo mikate ya kula, ila iko mikate mitakatifu tu; ingewezekana, kama vijana wale wangalijiangalia, wasiguse wanawake.[#2 Mose 19:15; 3 Mose 22:3-7; 24:5-9.]

⁵Dawidi akamjibu mtambikaji akimwambia: Tangu jana na juzi tumenyimwa wanawake; napo, nilipotoka, miili ya vijana hao ilikuwa mitakatifu, nayo hii njia yetu ni ya kujiendea tu, pasipo shaka wametakata miili yao hata leo.

⁶Ndipo, mtambikaji alipompa ile mikate mitakatifu, kwani haikuwako mikate mingine, isipokuwa ile mikate, aliyowekewa Bwana, nayo huondolewa machoni pa Bwana, wakiweka hapo mikate mingine yenye moto; ni siku ileile, hiyo ya mbele inapochukuliwa.[#Mat. 12:3.]

⁷Siku ile kukawako mmoja wao watumishi wa Sauli, naye alikuwa ametengwa, akae machoni pa Bwana, jina lake Doegi wa Edomu aliyekuwa mkuu wa wachungaji wa Sauli.[#1 Sam. 22:9,18.]

⁸Kisha Dawidi akamwuliza Ahimeleki: Hunao mkuki au upanga? Kwani sikuchukua upanga wangu wala mata yangu mengine, kwani shauri la mfalme lilikuwa la haraka.

⁹Mtambikaji akamwambia: Upanga wa yule Mfilisti Goliati, uliyemwua katika Bonde la Mkwaju, uko, umezingwa na nguo, uko nyuma ya kisibau cha mtambikaji; kama unataka kuuchukua, jichukulie! Kwani hakuna mwingine, usipokuwa huo. Dawidi akasema: Hakuna mwingine wa kufanana nao, nipe, niuchukue![#1 Sam. 17:50-51.]

Dawidi anamkimbilia Akisi, mfalme wa Gati.

¹⁰Kisha Dawidi akaondoka, akamkimbia Sauli siku hiyo, akaja kwa Akisi, mfalme wa Gati.[#Sh. 56:1.]

¹¹Watumishi wa Akisi wakamwambia: Kumbe huyu siye Dawidi, mfalme wa nchi ile? Siye yeye, waliyemwimbia na kuitikiana na kumchezea kwamba:

Sauli ameua elfu lake, lakini Dawidi ameua maelfu yake kumi?

¹²Dawidi alipoyafikisha maneno haya moyoni mwake, akamwogopa sana Akisi, mfalme wa Gati.

¹³Kwa hiyo akayageuza mawazo yake mbele yao, akawa kama mwenye wazimu huko kwao, akaipiga milango ya lango la mji kama ngoma, nayo mate yake akayachuruzisha madevuni mwake.[#Sh. 34:1.]

¹⁴Akisi akawaambia watumishi wake: Mnamwona mtu huyu kuwa mwenye kichaa, sababu gani mmemleta kwangu?

¹⁵Je? Mimi nimekosa wenye kichaa, mkimleta huyu, anitolee wazimu wake? Ananijiliaje nyumbani mwangu?