Dawidi anakwenda kukaa kwa Wafilisti.

¹Dawidi akasema moyoni mwake kwamba: Siku moja nitaangamizwa kwa mkono wa Sauli; sitaona mema, nisipojiponya kabisa na kuikimbilia nchi ya Wafilisti, Sauli akate tamaa za kunitafuta tena katika mipaka yote ya Waisiraeli; ndivyo, nitakavyoponyoka mkononi mwake.

²Kwa hiyo Dawidi akaondoka, akapita mpaka yeye na watu 600 waliokuwa naye, wakaenda kwa Akisi, mwana wa Maoki, mfalme wa Gati.[#1 Sam. 21:10; 1 Fal. 2:39.]

³Dawidi akakaa kwa Akisi huko Gati yeye na watu wake, kila mtu na mlango wake. Yeye Dawidi alikuwa na wakeze wawili, Ahinoamu wa Izireeli na Abigaili, mkewe Nabali wa Karmeli.

⁴Sauli alipopashwa habari, ya kuwa Dawidi amekimbilia Gati, hakuendelea tena kumtafuta.

⁵Kisha Dawidi akamwambia Akisi: Kama nimeona upendeleo machoni pako, na wanipe pa kukaa katika mji mmoja wa porini, nikae huko! Inakuwaje, mtumishi wako akikaa kwako katika mji wa kifalme?

⁶Ndipo, Akisi alipompa Siklagi siku hiyo; ndivyo, Siklagi ulivyopata kuwa wao wafalme wa Wayuda mpaka siku hii ya leo.[#Yos. 15:31; Amu. 1:19.]

⁷Hesabu ya siku, Dawidi alizokaa katika nchi ya Wafilisti, ikawa mwaka na miezi minne.

⁸Ndipo, Dawidi na watu wake walipopanda, wakawashambulia Wagesuri na Wagirzi na Waamaleki, kwani hawa ndio waliokaa katika nchi hiyo tangu zamani zote, kufika Suri hata nchi ya Misri.

⁹Dawidi alipoipiga hiyo nchi, hakuacha mume wala mke, asimwue, akachukua mbuzi na kondoo na ng'ombe na punda na ngamia na nguo, kisha akarudi kufika kwa Akisi.

¹⁰Akisi alipomwuliza: Leo mmeshambulia wapi? Dawidi hujibu: Upande wa kusini wa Yuda, au: Upande wa kusini wa Wayerameli, au: Upande wa kusini wa Wakeni.

¹¹Dawidi asipoacha mume wala mke, asimwue, ni kwa kwamba asiwapeleke Gati, wakayasimulia matendo yetu kwamba: Hivi ndivyo, Dawidi alivyovifanya. Hii desturi yake Dawidi akaifuata siku zile zote, alizokaa katika nchi ya Wafilisti.

¹²Akisi akamtegemea Dawidi kwamba: Kwa kuwa amejipatia mnuko mbaya kwao walio ukoo wake wa Waisiraeli, atakuwa mtumishi wangu kale na kale.[#1 Mose 34:30; 2 Mose 5:21.]