Sauli anakwenda kwa mwaguaji wa kike wa Endori.

¹Siku zile Wafilisti wakavikusanya vikosi vyao kwenda vitani kupigana na Waisiraeli. Ndipo, Akisi alipomwambia Dawidi: Sharti ujue kabisa, ya kuwa huna budi kwenda pamoja nami vitani kupigana na Waisiraeli; wewe na watu wako.

²Dawidi akamwambia Akisi: Kweli na uyajue, mtumishi wako atakayoyafanya. Naye Akisi akmwambia Dawidi: Kweli nitakuweka kukiangalia kichwa changu siku zote.

³Hapo Samweli alipokufa, nao Waisiraeli wote walipomwombolezea na kumzika mjini kwake huko Rama, Sauli alikuwa amewaondoa wote waliojua kukweza mizimu pamoja na wachawi katika hiyo nchi.[#2 Mose 22:18; 1 Sam. 25:1.]

⁴Wafilisti walipokusanyika, kisha walipokuja kupiga makambi yao Sunemu, Sauli naye akawakusanya Waisiraeli, wakapiga makambi Gilboa.

⁵Sauli alipoyaona makambi ya Wafilisti akashikwa na woga, moyo wake ukastuka kabisa.

⁶Lakini Sauli alipomwuliza Bwana, Bwana hakumjibu kwa ndoto, wala kwa Urimu wa mtambikaji mkuu, wala kwa wafumbuaji.[#1 Sam. 14:37; 23:9; 2 Mose 28:30.]

⁷Kisha Sauli akawaambia watumishi wake: Nitafutieni mwaguaji wa kike, niende kwake kuulizana naye! Watumishi wake wakamwambia: Kule Endori yuko mwanamke anayejua kukweza mizimu.[#Tume. 16:16.]

⁸Ndipo, Sauli alipojitendekeza kuwa mwingine kwa kuvaa nguo nyingine, akachukua watu wawili wa kwenda naye; wakafika kwa yule mwanamke usiku, akamwambia: Niagulie kwa kukweza mizimu, ukinipandishia mzimu, nitakayekuambia!

⁹Yule mwanamke akamwambia: Tazama! Unayajua wewe, Sauli aliyoyafanya alipowatowesha watiisha mizimu pamoja na wachawi katika nchi hii; mbona unanitegea tanzi, upate kuniua?

¹⁰Sauli akamwapia na kumtaja Bwana kwamba: Hivyo, Bwana alivyo Mwenye uzima, kwa jambo hili hutakora manza kabisa!

¹¹Ndipo, yule mwanamke alipomwuliza: Nikupandishie nani? Akasema: Unipandishie Samweli!

¹²Yule mwanamke alipomwona Samweli akalia kwa sauti kuu, naye mwanamke akamwambia Sauli kwamba: Mbona umenidanganya? Ndiwe Sauli.

¹³Mfalme akamwambia: Usiogope! Sema tu: Unaona nini? Ndipo, mwanamke alipomwambia Sauli: Ninaona, wa Kimungu akipanda kutoka ndani ya nchi.

¹⁴Akamwuliza: Sura yake nini? Akasema: Yuko mtu mzee anayepanda, amevaa kanzu ya mtambikaji. Ndipo, Sauli alipotambua, ya kuwa ndiye Samweli, akamwinamia mara mbili na kumwangukia chini.

¹⁵Samweli akamwuliza Sauli: Mbona unanisumbua kwa kunipadisha? Sauli akasema: Nimesongeka sana, kwani Wafilisti wameniletea vita, naye Mungu ameondoka kwangu, hanijibu tena, wala kwa wafumbuaji, wala kwa ndoto. Kwa hiyo nimekuita, unionyeshe, nitakayoyafanya.

¹⁶Samweli akamwuliza: Mbona unaniuliza, Bwana akiwa ameondoka kwako na kugeuka kuwa mpingani wako?

¹⁷Bwana atakufanyizia, kama alivyosema kinywani mwangu: Bwana atauondoa ufalme mkononi mwako, ampe mwenzio Dawidi,

¹⁸kwa kuwa hukukitii kinywa chake Bwana, usipowafanyizia Waamaleki, makali yake yenye moto yaliyoyataka. Kwa sababu hiyo Bwana atakufanyizia jambo hili siku hii ya leo:[#1 Sam. 15:18-19.]

¹⁹Bwana atawatia wao Waisiraeli pamoja na wewe mikononi mwa Wafilisti; kesho wewe na wanao mtakuwa pamoja nami. Navyo vikosi vya Waisiraeli Bwana atawatia mikononi mwa Wafilisti.[#1 Sam. 31:6.]

²⁰Papo hapo Sauli akaanguka chini kifudifudi, akashikwa na woga kabisa kwa ajili ya maneno ya Samweli, hata nguvu haikuwamo mwake, kwani alikuwa hakula chakula mchana kutwa na usiku kucha.

²¹Kisha yule mwanamke akamjia Sauli; alipoona, ya kuwa amezimia kwa woga, akamwambia: Tazama! Kijakazi wako amekiitikia kinywa chako, nikaiweka roho yangu mkononi mwako, nikayaitikia maneno yako, uliyoniambia;

²²sasa wewe nawe kiitikie kinywa cha kijakazi wako, nikuandalie chakula kidogo, ule, upate nguvu ukienda zako.

²³Akakataa akisema: Sitakula. Lakini watumishi wake walipomhimiza pamoja na yule mwanamke, akaviitikia vinywa vyao, akainuka hapo chini, akakaa kitandani.

²⁴Yule mwanamke alikuwa na ndama mnono nyumbani, akamchinja upesi, akachukua nao unga, akaukanda, akaoka vikate visivyochachwa.

²⁵Kisha akamletea Sauli na watumishi wake, wakala. Walipokwisha kula wakaondoka, wakaenda zao usiku uleule.