Bwana anamwita Samweli.

¹Mtoto Samweli alipomtumikia Bwana machoni pa Eli, Neno la Bwana lilimkalia mmojammoja tu, hayakuwako maono ya wachunguzaji yaliyoenea po pote.[#Amo. 8:11.]

²Ikawa siku zile, Eli alikuwa amelala mahali pake, nayo macho yalikuwa yameanza kuguiwa na giza, asiweze kuona vema.

³Nayo taa ya Mungu ilikuwa haijazimika bado, naye Samweli alikuwa amelala Jumbani mwa Bwana, Sanduku la Mungu lilimokuwa.

⁴Ndipo, Bwana alipomwita Samweli, naye akaitikia: Mimi hapa!

⁵Akamtokea Eli upesi, akamwambia: Mimi hapa! kwani umeniita. Akajibu: Sikukuita, rudi, ulale! Akaenda zake, akalala.

⁶Bwana akaita tena mara ya pili: Samweli! Samweli akaamka, akaja kwake Eli na kumwambia: Mimi hapa! kwani umeniita. Akajibu: Sikukuita, mwanangu; rudi, ulale!

⁷Naye Samweli alikuwa hajamjua Bwana bado, nalo Neno la Bwana halijamtokea bado.

⁸Bwana akaendelea kuita mara ya tatu: Samweli! Akaamka, akaenda kwake Eli na kumwambia: Mimi hapa! kwani umeniita. Ndipo, Eli alipotambua, ya kuwa ni Bwana aliyemwita mtoto.

⁹Kisha Eli akamwambia Samweli: Nenda, ulale! Itakapokuwa, akuite tena, itikia kwamba: Sema, Bwana! kwani mtumishi wako anasikia. Samweli akaenda, akalala mahali pake.

¹⁰Bwana akaja, akasimama, akaita, kama alivyoita mara za kwanza: Samweli! Samweli! Samweli akaitikia: Sema! kwani mtumishi wako anasikia.

¹¹Bwana akamwambia Samweli: Utaniona, nikifanya jambo kwao Waisiraeli, nao wote watakaolisikia masikio yao yote mawili yatawavuma.

¹²Siku hiyo nitamtimilizia Eli yote, niliyoyasema ya mlango wake, toka mwanzo hata mwisho.

¹³Kwani nimempasha habari, ya kuwa nitauhukumu mlango wake kale na kale kwa ajili ya manza, walizozikora; kwani alijua, ya kuwa wanawe wanajipatia kiapizo, lakini hakuwakaripia.[#1 Sam. 2:27-36.]

¹⁴Kwa hiyo nimeuapiza mlango wa Eli kwamba: Manza, walizozikora wao wa mlango wa Eli, hazitawezekana kale na kale kupatiwa upozi, wala kwa ng'ombe ya tambiko, wala kwa kipaji cha tambiko cho chote.

¹⁵Kisha Samweli akaja kulala, mpaka kuche, kisha akaifungua milango ya Nyumba ya Bwana; lakini Samweli akaogopa kumsimulia Eli, aliyoyaona.

¹⁶Eli akamwita Samweli, akasema: Mwanagu, Samweli! Akaitikia: Mimi hapa!

¹⁷Eli akamwuliza: Ni neno gani, alilokuambia? Usinifiche kamwe! Mungu na akufanyizie hivi na hivi, ukinificha neno moja tu la hayo maneno yote, aliyokuambia.

¹⁸Ndipo, Samweli alipomsimulia hayo maneno yote, hakumficha. Akajibu: Yeye ni Bwana, na ayafanye yaliyo mema machoni pake.[#2 Sam. 15:26.]

¹⁹Samweli akakua, Bwana akiwa pamoja naye; nayo maneno yake yote hakuna hata moja, aliloliangusha chini.

²⁰Waisiraeli wote toka Dani hata Beri-Seba wakatambua, ya kuwa Samweli amekwisha kuelekezwa kuwa mfumbuaji wa Bwana.

²¹Bwana akaendelea kuonekana huko Silo, kwani Bwana alimtokea Samweli huko Silo, kama Bwana alivyosema; kisha neno la Samweli likawajia Waisiraeli wote.