Kwa majuto yao Waisiraeli wanawashinda Wafilisti huko Ebeni-Ezeri.

¹Watu wa Kiriati-Yearimu wakaja, wakalichukua Sanduku la Bwana kwao, wakaliingiza nyumbani mwa Abinadabu kilimani juu, naye mwanawe Elazari wakamweua, aliangalie Sanduku la Bwana.

²Tangu siku hiyo, Sanduku la Bwana lilipokuja kukaa Kiriati-Yearimu, siku zikapita nyingi, zikawa miaka 20. Kisha mlango wote wa Waisiraeli wakageuka kumfuata Bwana na kumlilia.[#1 Mambo 13:6.]

³Ndipo, Samweli alipouambia mlango wote wa Waisiraeli kwamba: Ninyi mkimgeukia Bwana kwa mioyo yote, iondoeni miungu migeni kwenu pamoja na Maastaroti! Kisha ielekezeni mioyo yenu kwake Bwana na kumtumikia yeye peke yake! Ndivyo, atakavyowaponya mikononi mwa wafilisti.[#1 Mose 35:2; Yos. 24:23.]

⁴Ndipo, wana wa Isiraeli walipoyaondoa Mabaali na Maastaroti, wakamtumikia Bwana peke yake.[#Amu. 10:6,16.]

⁵Kisha Samweli akasema: Wakusanyeni Waisiraeli wote Misipa, niwaombee kwake Bwana![#1 Sam. 10:17; Amu. 11:11; 20:1.]

⁶Wakakusanyika Misipa, wakachota maji, wakayamwaga mbele ya Bwana na kufunga mfungo siku hiyo na kusema huko: Tumemkosea Bwana! Kisha Samweli akawakatia wana wa Isiraeli mashauri huko Misipa.

⁷Wafilisti waliposikia, ya kuwa wana wa Isiraeli wamekusanyika Misipa, wakuu wa Wafilisti wakawapandia Waisiraeli; nao Waisiraeli walipovisikia, wakawaogopa Wafilisti.

⁸Ndipo, wana wa Isiraeli walipomwambia Samweli: Usikome kumlilia Bwana Mungu wetu kwa ajili yetu, atuokoe mikononi mwa Wafilisti![#1 Sam. 12:23.]

⁹Samweli akachukua mwana kondoo mwenye kunyonya, akamatolea Bwana kuwa ng'ombe ya tambiko ya kuteketezwa nzima; samweli alipomlilia Bwana hivyo kwa ajili ya Waisiraeli, Bwana akamwitikia.

¹⁰Ikawa, Samweli alipoiteketeza hiyo ng'ombe ya tambiko, Wafilisti wakafika kupigana nao Waisiraeli. Papo hapo Bwana akanguruma kwa sauti kubwa sana juu ya Wafilisti; ndivyo, alivyowastusha sana, kwa hiyo wakapigwa mbele yao Waisiraeli.

¹¹Kisha waume wa Waisiraeli wakatoka Misipa, wakawakimbiza na kuwapiga hata chini ya Beti-Kari.

¹²Ndipo, Samweli alipotwaa jiwe moja, akalisimika katikati ya Misipa na Seni, akaliita jina lake Ebeni-Ezeri (Jiwe la Msaada) akisema: Bwana ametusaidia mpaka hapa.

¹³Ndivyo, Wafilisti walivyonyenyekezwa, hawakurudi tena kuingia katika mipaka ya Waisiraeli, nao mkono wa Bwana ukawapinga Wafilisti siku zote za Samweli.

¹⁴Nayo miji, Wafilisti waliyoichukua kwa Waisiraeli, ikarudi tena kuwa yao Waisiraeli toka Ekroni hata Gati, nazo nchi zao Waisiraeli wakaziponya mikononi mwa Wafilisti. Tena Waisiraeli na Waamori walikuwa wakipatana.

¹⁵Naye Samweli akawa mwamuzi wa Waisiraeli siku zote za maisha yake.

¹⁶Mwaka kwa mwaka akaenda kuzunguka Beteli na Gilgali na Misipa, akikata mashauri yao Waisiraeli mahali hapo pote.

¹⁷Kisha hurudi Rama, kwani ndiko, nyumba yake ilikokuwa, tena ndiko, alikowaamulia Waisiraeli. Kisha akajenga huko pa kumtambikia Bwana.