Waisiraeli wanataka mfalme.

¹Ikawa, Samweli alipokuwa mzee, akawaweka wanawe wawili kuwa waamuzi wa Waisiraeli.[#1 Mambo 6:28.]

²Jina la mwanawe wa kwanza ni Yoeli, nalo lake wa pili ni Abia, nao walikaa Beri-Seba, walipokuwa waamuzi.

³Lakini wanawe hawakuendelea na kuzishika njia zake, maana waligeukia kutafuta mali, kwa hiyo wakachukua fedha za kupenyezewa, wakayapotoa mashauri.[#5 Mose 16:19.]

⁴Ndipo, wazee wote wa Waisiraeli walipokusanyika, wakaja Rama kwa Samweli,[#1 Sam. 7:17.]

⁵wakamwambia: Tazama! Wewe umekwisha kuwa mzee, nao wanao hawaendelei na kuzishika njia zako, sasa tuwekee mfalme wa kutuamulia, kama mataifa yote yanavyoamuliwa![#5 Mose 17:14; Hos. 13:10; Tume. 13:21.]

⁶Neno hili likawa baya machoni pake Samweli, kwa kuwa wamesema: Tupe mfalme wa kutuamulia! Kwa hiyo Samweli akamwomba Bwana.

⁷Bwana akamwambia Samweli: Viitikie vinywa vyao watu hawa ukiyafanya yote, waliyokuambia! Kwani hawakukatai wewe, ila ni mimi, waliyenikataa kuwa mfalme wao.

⁸Ndivyo, matendo yao yote yalivyo, waliyoyatenda tangu siku ile, nilipowatoa Misri, mpaka siku hii ya leo wakiniacha na kutumikia miungu mingine. Hivi ndivyo, wanavyokufanyia hata wewe.

⁹Sasa viitikie vinywa vyao! Lakini sharti uwashuhudie vema na kuieleza haki yake mfalme atakayewatawala.

Samweli anaieleza haki yake mfalme.

¹⁰Kisha Samweli akawaambia wale watu waliotaka mfalme haya maneno yote ya Bwana

¹¹akisema: Hii ndiyo haki yake mfalme atakayewatawala: atawachukua wana wenu wa kiume, awaweke katika magari yake wa kuyaendesha, wengine atawapandisha farasi, wengine atawaweka kuyatangulia magari yake kwa kupiga mbio.

¹²Wengine atawaweka kuwa wakuu wa maelfu na wakuu wa hamsini tu; wengine atawaweka kuyalima mashamba yake na kuyavuna mavuno yake na kuyatengeneza mata ya vita vyake na vyombo vya magari yake.

¹³Nao wana wenu wa kike atawachukua, wawe watengeneza manukato na wapishi na waoka mikate.

¹⁴Nayo mashamba na mizabibu na michekele yenu iliyo mizuri zaidi ataichukua na kuwapa watumishi wake.

¹⁵Tena mbegu zenu na mizabibu yenu atatoza mafungu ya kumi, awape watumishi wake wa nyumbani na watumishi wake wengine.

¹⁶Nao watumishi wenu wa kiume na wa kike na vijana wenu walio wazuri zaidi na punda wenu atachukua, awatumie katika kazi zake.

¹⁷Mbuzi na kondoo wenu atatoza mafungu ya kumi, nanyi sharti mmtumikie kitumwa.

¹⁸Tena siku hiyo, mtakapolia kwa ajili ya mfalme wenu, mliyejichagulia, siku hiyo Bwana hatawajibu.

¹⁹Lakini watu wakakataa kukiitikia kinywa cha Samweli, wakasema: Haidhuru, sharti tuwe na mfalme wa kututawala!

²⁰Nasi tunataka kuwa kama mataifa yote, mfalme wetu atukatie mashauri yetu, tena atutangulie, avipige vita vyetu.

²¹Samweli alipokwisha kuyasikia maneno yote ya watu, akaja kuyasema masikioni mwa Bwana.

²²Bwana akamwambia Samweli: Viitikie vinywa vyao na kuwapatia mfalme! Ndipo, Samweli alipowaambia waume wa Waisiraeli: Nendeni zenu kila mtu mjini kwake![#1 Sam. 8:7-9.]