Mambo yaliyo mazuri kwa Watesalonike.

¹Kwa hiyo hatukuweza kuvumilia tena, tukapendezwa kuachwa peke yetu huko Atene,[#Tume. 17:14-15.]

²tukamtuma ndugu yetu Timoteo anayemtumikia Mungu na kuutangaza Utume mwema wa Kristo; tulimtuma, awashupaze ninyi na kuwatuliza mioyo kwa hivyo, mnavyomtegemea Mungu,[#Tume. 16:1-3.]

³mtu asitikisike katika maumivu ya siku hizi; kwani mwajua wenyewe: jambo tulilowekewa, ni hilo.[#Tume. 14:22; Ef. 3:13; 2 Tim. 3:12; Ebr. 10:39.]

⁴Kwani hata hapo, tulipokuwa kwenu, tuliwafumbulia kwamba: Inatupasa kuumizwa; ndivyo vilivyotimia sasa, kama mnavyojua.[#1 Kor. 6:19.]

⁵Kwa hiyo nami sikuweza kuvumilia tena, nikamtuma, nipate kutambua, kama mwamtegemea Mungu bado, au kama yule mwenye kujaribu amewajaribu, masumbuko yetu ya kwenu yakawa ya bure.[#Fil. 2:16.]

⁶Lakini sasa Timoteo amefika kwetu kutoka kwenu, akatusimulia vema mambo mema, mnavyomtegemea Mungu, mnavyopendana, mnavyotukumbuka vema siku zote mkitunukia kutuona sisi, kama sisi tunavyotunukia kuwaona ninyi.[#Tume. 18:5.]

⁷Kwa hayo, ndugu, tumetulizwa mioyo kwa ajili yenu katika mahangaiko na maumivu yetu yote, tuliposikia, mnavyomtegemea Mungu.

⁸Kwani sasa tumerudi uzimani tena, ikiwa ninyi mmesimama penye Bwana.

⁹Kwa shukrani gani, tutakazomtolea Mungu kwa ajili yenu, tutaweza kumlipa furaha zote, tulizozipata kwenu mbele yake yeye Mungu wetu?[#3 Mose 19:18.]

¹⁰Nasi twafuliza kuomba sanasana usiku na mchana, tupate kuonana nanyi uso kwa uso, tuweze kuziongeza nguvu zenu za kumtegemea Mungu, pakiwapo zilipokoseka.

¹¹Yeye Mungu aliye Baba yetu naye Bwana wetu Kristo na atuongoze njia ya kufika kwenu!

¹²Ninyi Bwana awaongezee upendano, mfurikiwe nao, mpate kupendana ninyi kwa ninyi, kisha mwapende nao wote wengine, kama sisi nasi tunavyowapenda ninyi!

¹³Hivyo mioyo yenu itashupaa, tena haitakosa kutakata kwa kuwa haina madoadoa, Mungu aliye Baba yetu akiitazama hapo, Bwana wetu Yesu atakapokuja pamoja na watakatifu wake wote.[#Fil. 1:10.]