Yawapasayo wakaguzi.

¹Neno hili ni la kweli: Mtu akitaka kazi ya ukaguzi anataka kazi nzuri.[#Tume. 20:28.]

²Mkaguzi sharti awe mtu asiye na neno la kimkanya, mwenye mke mmoja, asiyekunywa kileo, mwerevu wa kweli, mwema, mpenda wageni, ajuaye kufundisha.[#Tit. 1:5-9.]

³Asikae na wanywaji, asiwe mgomvi, ila awe mpole, pasipo matata na pasipo choyo;

⁴ajue kuiangalia vizuri nyumba yake mwenyewe, hata watoto wake wawe wenye kutii na kuwapa watu wote macheo.[#1 Sam. 2:12.]

⁵Maana mtu asiyeweza kuiangalia nyumba yake mwenyewe atawezaje kuwatunza wateule wa Mungu?

⁶Mtu aliye Mkristo mpya asiwe mkaguzi, asijitutume, akaja kuanguka katika hukumu ya Msengenyaji.

⁷Nao walioko nje sharti wamshuhudie kuwa mwema, asije kusingiziwa mabaya, akanaswa na tanzi la Msengenyaji.[#1 Tim. 5:10; 1 Kor. 5:12-13.]

Yawapasayo watumikiaji wa wateule.

⁸Vivyo hivyo nao watumikiaji wa wateule wawe wenye macheo, wasiosema kuwili, wasio walewi, wasiofuata machumo mabaya,[#Tume. 6:3; Fil. 1:1.]

⁹ila waliangalie lile fumbo walitegemealo katika mioyo itakatayo kwa kujua tu yaliyo mema.

¹⁰Hao kwanza wajaribiwe! Ikijulikana, ya kuwa haliko neno la kuwakamia, basi, wawekwe kuwa watumikiaji.[#1 Kor. 1:8.]

¹¹Vivyo hivyo nao wake zao wawe wenye macheo wasiosengenya, wasiokunywa kileo, walio waelekevu katika mambo yote![#Tit. 2:3.]

¹²Watumikiaji sharti wawe kila mtu mume wa mke mmoja, wenye kuwaangalia vizuri watoto wao na nyumba zao wenyewe.[#1 Tim. 3:2.]

¹³Kwani waliotumika vizuri hujipatia fungu zuri, tena kwa hivyo, wanavyomtegemea Kristo Yesu, huona furaha nyingi kwa kumtangaza.

Fumbo la kumcha Mungu.

¹⁴Nakuandikia haya, ijapo nangojea, bado kidogo nifike kwako.

¹⁵Lakini kama nakawia, ujue mwenendo unaopasa katika nyumba ya Mungu! Hiyo nyumba ndio wateule wake Mungu aliye Mwenye uzima; nao ndio nguzo na msingi wa kuyashikiza yaliyo ya kweli.[#Ef. 2:19-22; 2 Tim. 2:19-20.]

¹⁶Kweli fumbo lililo kuu ni lile la kumcha Mungu: Mungu alitokea waziwazi mwilini, akapata wongofu kwa kuwa mwenye Roho, akaonekana penye malaika, akatangazwa kwa wamizimu, akategemewa ulimwenguni, akapazwa mbinguni kwenye utukufu.[#Mar. 16:19; Yoh. 1:14; 16:10; Rom. 1:3-4.]