Mkosaji aliyejuta aachiliwe.

¹Lakini moyoni naliwaza hivi: Nisije tena kwenu mwenye sikitiko![#1 Kor. 12:21; 1 Kor. 4:21.]

²Kwani mimi nikiwasikitisha ninyi, yuko nani atakayenichangamsha, asipokuwa yule aliyesikitishwa nami?

³Kwa sababu hii naliyaandika yale ya kwamba: Nitakapokuja nisisikitishwe nanyi mliopaswa na kunifurahisha; kwa maana ninyi nyote mmenipa moyo wa kwamba: Furaha yangu ni furaha yenu nyote.[#1 Kor. 5.]

⁴Kwani naliwaandikia kwa maumivu mengi, moyo ukanipotelea, vikanitoa machozi mengi, siko kwamba msikitishwe, ila mpate kuutambua upendo unaonikaza kuwapenda ninyi kuliko wengine.

⁵Lakini kama yuko aliyesikitisha, hakunisikitisha mimi; ila fungufungu, maana nisiseme na kuyapita ya kweli, amewasikitisha ninyi nyote.[#1 Kor. 5:1.]

⁶Aliye hivyo inamtosha, akionywa hivyo na wenzake walio wengi.

⁷Kisha imewapasa ninyi kumwendea kwa upole na kumtuliza moyo, asididimizwe, masikitiko yakimshinda.

⁸Kwa hiyo nawabembeleza ninyi, mmwonyeshe, ya kuwa mwampenda.

⁹Kwani kwa hiyo naliwaandikia, nipate kuutambua welekevu wenu, kama mnatii katika mambo yote.[#2 Kor. 7:15.]

¹⁰Lakini mmwachiliaye neno, hata mimi humwachilia. Kwamba hata mimi, ikiwa nimemwachilia mtu neno, nimemwachilia kwa ajili yenu machoni pa Kristo,[#Mat. 18:18; Luk. 10:16.]

¹¹maana tusidanganywe na Satani; kwani mizungu yake hatukosi kuijua.[#Luk. 22:31; 1 Petr. 5:8.]

Manukato yenye kufa nayo yenye uzima.

¹²Hapo, nilipofika Tiroa kuutangaza Utume mwema wa Kristo, nikafunguliwa mlango kwa nguvu ya Bwana;[#Tume. 14:27; 1 Kor. 16:9; Kol. 4:9.]

¹³lakini sikuona utulivu moyoni mwangu, kwa kuwa sikumkuta ndugu yangu Tito; kwa hiyo nikaagana nao, nikatoka kwenda Makedonia.[#Tume. 20:1.]

¹⁴Lakini Mungu atukuzwe anayetupa kushinda siku zote, tukiwa katika Kristo! Kwa hivyo, tunavyomtumikia yeye, hutokeza po pote waziwazi, ya kuwa wenye kumtambua wafanana na maua yanukayo vizuri.

¹⁵Kwani tukawa mbele yake Mungu kama manukato mazuri ya Kristo kwao wanaookoka, nako kwao wanaoangamia:[#1 Kor. 1:18.]

¹⁶hao tunawanukia kama wenye kutoka kufani wanaorudi kufani, lakini wale tunawanukia kama wenye kutoka uzimani wanaorudi uzimani. Yuko nani atakayeyaweza hayo.[#2 Kor. 3:5-6; Luk. 2:34.]

¹⁷Kwani sisi hatufanani nao wale wengi wanaolichuuzia Neno la Mungu, ila kwa ung'avu wa mioyo, tulioupata kwa Mungu, tunasema kama watu walio pamoja na Kristo mbele yake Mungu.[#2 Kor. 1:12.]