Ufalme wa Waisiraeli: Hosea, mfalme wa mwisho. Uhamisho wa Asuri.

¹Katika mwaka wa 12 wa Ahazi, mfalme wa Wayuda, Hosea, mwana wa Ela, akapata kuwa mfalme wa Waisiraeli mle Samaria miaka 9.[#2 Fal. 15:30.]

²Akayafanya yaliyo mabaya machoni pake Bwana, lakini hakuzidi kama wafalme waliokuwa mbele yake.

³Yeye ndiye, Salmaneseri, mfalme wa Asuri, aliyemjia, naye Hosea, hakuwa na budi kumtumikia na kumtolea mahongo.[#2 Fal. 18:9-12.]

⁴Kisha mfalme wa Asuri akamwona Hosea kuwa mwenye njama mbaya, kwa kuwa alituma wajumbe kwa So, mfalme wa Misri, akaacha kumpelekea mfalme wa Asuri mahongo, aliyoyapeleka mwaka kwa mwaka; ndipo, mfalme wa Asuri alipomfunga na kumtia kifungoni.[#Hos. 12:2.]

⁵Kisha mfalme wa Asuri akaipandia hiyo nchi yote akiupandia mji wa Samaria, akausonga kwa kuuzinga miaka mitatu.

⁶Katika mwaka wa tisa wa Hosea mfalme wa Asuri akauteka mji wa Samaria, akawahamisha Waisiraeli kwenda Asuri, akawakalisha katika miji ya Hala, tena Habori penye mto wa Gozani na katika miji ya Wamedi.

Makosa ya Waisiraeli yaliyowatenga na Mungu.

⁷Ikawa hivyo, kwa kuwa wana wa Isiraeli walimkosea Bwana Mungu wao aliyewatoa utumwani katika nchi ya Misri mkononi mwa Farao, mfalme wa Misri, lakini wao wakacha miungu mingine.

⁸Wakaendelea na kuyafuata maongozi ya wamizimu, Bwana aliowafukuza mbele ya wana wa Isiraeli, nayo maongozi, wafalme wa Waisiraeli waliyoyatoa.[#2 Fal. 16:3.]

⁹Hivyo wana wa Isiraeli walimkosea Bwana Mungu wao na kufanya mafichoni mambo yasiyopasa kuyafanya, wakijijengea pa kutambikia vilimani katika miji yao yote iliyokuwa yenye minara tu ya kungojea, namo mijini mlimo na maboma.

¹⁰Wakajisimamishia nguzo za kutambikia na miti ya Ashera katika vilima virefu vyote na chini ya kila mti wenye majani mengi,[#1 Fal. 14:23; 2 Fal. 16:4.]

¹¹wakavukiza vilimani po pote pa kutambikia kama wamizimu, Bwana aliowaondoa mbele yao. Kweli walifanya mambo mabaya ya kumkasirisha Bwana,[#2 Fal. 17:8.]

¹²wakiitumikia migogo ya kutambikia, naye Bwana alikuwa amewakataza kwamba: Msilifanye jambo hilo![#2 Mose 20:2-3; 23:13.]

¹³Tena Bwana aliwashuhudia Waisiraeli na Wayuda vinywani mwa wafumbuaji wote na wachunguzaji wote kwamba: Rudini na kuziacha njia zenu mbaya, myaangalie maagizo yangu na maongozi yangu na kuyafuata Maonyo yote, niliyowaagiza baba zenu, niliyoyatuma kwenu vinywani mwa watumishi wangu waliokuwa wafumbuaji.

¹⁴Lakini hawakusikia, ila walizishupaza kosi zao kuwa kama kosi za baba zao wasiomtegemea Bwana Mungu wao.

¹⁵Wakayakataa maongozi yake na Agano lake, aliloliagana na baba zao, nao ushuhuda wake, aliowashuhudia, wakafuata mambo yasiyo na maana wakifanya yaliyo ya bure kabisa, wakawafuata wamizimu waliokaa na kuwazunguka pande zote, naye Bwana alikuwa amewaagiza, wasifanye kama wao.[#2 Mose 23:24.]

¹⁶Wakayaacha maagizo yote ya Bwana Mungu wao, wakajitengenezea vinyago viwili vya ndama kwa shaba zilizoyeyushwa, tena wakajitengenezea vinyago vya Ashera, wakaviangukia navyo vikosi vyote vya mbinguni, wakamtumikia hata Baali.[#1 Fal. 12:28; 16:33.]

¹⁷Hata wana wao wa kiume na wa kike wakawatumia kuwa ng'ombe za tambiko za kuteketezwa motoni, wakaagua maaguaji kwa kutabana, wakajiuza katika utumwa wa kuyafanya yaliyo mabaya machoni pake Bwana, wamkasirishe.[#2 Fal. 16:3.]

¹⁸Ndipo, Bwana alipowachafukia sana Waisiraeli, akawaondoa usoni pake, hakusalia mtu, ila shina la Wayuda peke yake.

¹⁹Lakini Wayuda nao hawakuyaangalia maagizo ya Bwana, nao wakaendelea kuyafuata maongozi, Waisiraeli waliyoyatoa.

²⁰Ndipo, Bwana alipokikataa kizazi chote cha Isiraeli, akawatesa na kuwatia mikononi mwa wanyang'anyi, mpaka akiwatupa, waondoke kabisa usoni pake.

²¹Kwani Waisiraeli walipojitenga nao wa mlango wa Dawidi na kumfanya Yeroboamu, mwana wa Nebati, kuwa mfalme wao, Yeroboamu akawahimiza Waisiraeli, wasimfuate Bwana, akawakosesha kosa kubwa mno.[#1 Fal. 12:20.]

²²Wana wa Isiraeli wakaendelea kuyafanya makosa yote, Yeroboamu aliyoyafanya, hawakuyaepuka,

²³mpaka Bwana akiwaondoa Waisiraeli usoni pake, kama alivyosema vinywani mwa watumishi wake wafumbuaji, akawatoa Waisiraeli katika nchi yao na kuwahamisha kwenda Asuri mpaka siku hii ya leo.[#5 Mose 28:63-64.]

Kabila la Wasamaria linatokea.

²⁴Kisha mfalme wa Asuri akatoa watu mle Babeli na Kuta na Awa na Hamati na Sefarwaimu, akawakalisha katika miji ya Samaria mahali pao wana wa Isiraeli, wakaitwaa nchi ya Samaria, iwe yao, wakakaa katika miji yao.

²⁵Ikawa, walipoanza kukaa huko, hawakumcha Bwana, naye Bwana akatuma simba kwao, wakaua watu wengine wengine.

²⁶Ndipo, walipotuma kumwambia mfalme wa Asuri kwamba: Wamizimu, uliowahamisha na kuwakalisha katika miji ya Samaria, hawayajui yampasayo Mungu wa nchi hii, kwa sababu hii ametuma simba kwao, nao wakawaua, kwa kuwa hawajui yampasayo Mungu wa nchi hii.

²⁷Mfalme wa Asuri akaagiza kwamba: Pelekeni huko mmoja wao watambikaji, mliowatoa huko na kuwahamisha! Na aende, akae huko na kuwafundisha yampasayo Mungu wa nchi hiyo.

²⁸Ndipo, mmoja wao watambikaji, waliowatoa Samaria na kuwahamisha, alipokuja, akakaa Beteli, akawa akiwafundisha njia za kumcha Bwana.

²⁹Lakini kila kabila moja wakajitengenezea miungu ya kwao, wakaiweka katika zile nyumba, Waisiraeli walizozijenga vilimani za kutambikia mle; kila kabila moja wakafanya hivyo katika miji yao, walimokaa.

³⁰Watu wa Babeli wakatengeneza vinyago vya Sukoti-Benoti, watu wa Kuta wakatengeneza vinyago vya Nergali, watu wa Hamati wakatengeneza vinyago vya Asima,

³¹watu wa Awa wakatengeneza vinyago vya Nibuhazi na vya Tarkati, nao wa Sefarwaimu wakawateketeza wana wao motoni, wawe ng'ombe za tambiko za Adarameleki na za Anameleki, ndiyo miungu yao wa Sefarwaimu.[#2 Fal. 17:17.]

³²Basi, hivyo walikuwa wakimcha Bwana, lakini wakajipatia miongoni mwao watambikaji wa vilimani, ndio waliowafanyia kazi za kutambika katika nyumba za vilimani.

³³Hivyo walikuwa wenye kumcha Bwana pamoja na kuitumikia miungu ya kwao, kama ilivyowapasa wamizimu wa kwao, walikotolewa na kuhamishwa kuja huku.

³⁴Hata siku hii ya leo hufanya, kama hizo desturi zao za kwanza zilivyokuwa: hawamchi Bwana kwa kweli, wala hawafanyi kwa kweli, maongozi yao na desturi zao zilivyo, wala hawaishiki njia ya Maonyo na ya maagizo, Bwana aliyowaagiza wana wa Yakobo, aliyempa jina la Isiraeli.

³⁵Naye Bwana alikuwa amefanya agano nao na kuwaagiza kwamba: Msiche miungu mingine, wala msiiangukie, wala msiitumikie, wala msiitambikie![#2 Mose 23:24.]

³⁶Ila Bwana aliyewatoa katika nchi ya Misri kwa nguvu kuu za mkono wake, alioukunjua, yeye sharti mmche, mmwangukie na kumtambikia!

³⁷Nayo maongozi na maamuzi na Maonyo na maagizo, aliyowaandikia ninyi, sharti myaangalie, myafanye siku zote! Msiche kabisa miungu mingine!

³⁸Wala msilisahau Agano, nililolifanya nanyi, wala msiche miungu mingine![#5 Mose 6:12-19.]

³⁹Ila Bwana Mungu wenu sharti mmche! Naye atawaponya mikononi mwa adui zenu wote.

⁴⁰Lakini hawakusikia, ila wao wakafanya, kama hizo desturi zao za kwanza zilivyokuwa.

⁴¹Hivyo ndivyo, hao wamizimu walivyomcha Bwana pamoja na kuvitumikia vinyago vyao. Hata wana wao na wana wa wana wao wakayafanya mpaka siku hii ya leo, kama baba zao walivyoyafanya.