Elia anapazwa mbinguni.

¹Bwana alipotaka kumpaza Elia mbinguni kwa nguvu za upepo wenye ngurumo, Elia na Elisa walikuwa wakienda njiani kutoka Gilgali.

²Elia akamwambia Elisa: Kaa hapa! Kwani Bwana amenituma kwenda Beteli. Elisa akajibu: Hivyo, Bwana alivyo Mwenye uzima, tena hivyo, wewe mwenyewe ulivyo mzima, sitakuacha kabisa. Wakatelemka kwenda Beteli.

³Ndipo, wanafunzi wa wafumbuaji waliomo Beteli walipomtokea Elisa, wakamwambia: Unajua, ya kuwa leo Bwana atamwondoa bwana wako kichwani pako? Akasema: Nami nayajua, nyamazeni tu!

⁴Elia akamwambia: Elisa, kaa hapa! Kwani Bwana amenituma kwenda Yeriko. Akajibu: Hivyo, Bwana alivyo Mwenye uzima, tena hivyo, wewe mwenyewe ulivyo mzima, sitakuacha kabisa. Wakaja Yeriko.

⁵Ndipo, wanafunzi wa wafumbuaji waliomo Yeriko walipomjia Elisa, wakamwambia: Unajua, ya kuwa leo Bwana atamwondoa bwana wako kichwani pako? Akasema: Nami nayajua, nyamazeni tu!

⁶Elia akamwambia: Kaa hapa! Kwani Bwana amenituma kwenda Yordani. Akajibu: Hivyo, Bwana alivyo Mwenye uzima, tena hivyo, wewe mwenyewe ulivyo mzima, sitakuacha kabisa. Wakaenda wote wawili.

⁷Watu hamsini waliokuwa wanafunzi wa wafumbuaji wakaja, wakasimama mbali ng'ambo ya huku, wao wawili waliposimama Yordani.

⁸Ndipo, Elia alipolishika joho lake, akalizinga, akalipigisha maji; ndipo, yalipogawanyika huku na huko, nao wote wawili wakapita pakavu.[#2 Mose 14:21-22; Yos. 3:16.]

⁹Walipokwisha pita, Elia akamwambia Elisa: Omba unayoyataka, nikufanyizie, nikiwa sijaondolewa kwako! Elisa akasema: Ninataka, mafungu mawili ya roho yako yaje kunikalia.[#5 Mose 21:17.]

¹⁰Elia akajibu: Umeomba neno gumu. Utakaponiona, nikiondolewa kwako, na ulipate! Usipoviona, hutalipata.

¹¹Ikawa, wangaliko njiani na kusema, mara gari la moto likatokea pamoja na farasi wa moto, likawatenga wale wawili. Ndivyo, Elia alivyopaa mbinguni kwa nguvu za upepo wenye ngurumo.[#1 Mose 5:24.]

¹²Elisa alipoviona akalia kwamba: Baba yangu! Baba yangu! Wewe gari la Waisiraeli na wapanda farasi wake! Lakini hakumwona tena; kisha akazishika nguo zake, akazirarua, zitoke vipande viwili.[#2 Fal. 13:14.]

Roho na nguvu za Elia zinamkalia Elisa.

¹³Kisha akaliokota joho lake Elia lililokuwa limeanguka, akarudi, akasimama kando ya mto wa Yordani.[#2 Fal. 2:8.]

¹⁴Akalishika hilo joho la Elia lililokuwa limeanguka, akalipigisha maji akisema: Bwana Mungu wa Elia yuko wapi? Basi; hapo, yeye naye alipoyapiga maji, mara maji yakagawanyika huku na huko, naye Elisa akapita.

¹⁵Wanafunzi wa wafumbuaji waliokuwako Yeriko ng'ambo ya huku walipomwona wakasema: Roho yake Elia inamkalia Elisa. Wakamwendea, wakamwangukia chini.[#2 Fal. 2:5,7; Luk. 1:17.]

¹⁶Wakamwambia: Tazama, huku wako watu hamsini wenye nguvu; acha, tuwatume, waende kumtafuta bwana wako! Labda roho ya Bwana imemchukua, ikamweka juu ya mlima mmoja au katika bonde moja. Akawaambia: Msiwatume!

¹⁷Walipomhimiza sana, mpaka akilegea, akasema: watumeni! Ndipo, walipowatuma wale watu hamsini, wakamtafuta siku tatu, lakini hawakumwona.

¹⁸Waliporudi kwake, yeye alikuwa angaliko Yeriko, akawaambia: Sikuwaambia, msiende?

¹⁹Kisha watu wa huo mji wakamwambia Elisa: Tazama, hapa, mji huu unapokaa, ni pema, kama wewe bwana unavyoona, lakini maji ni mabaya, kwa hiyo nchi hii hupoozesha mimba, ziharibike.

²⁰Akasema: Nileteeni bakuli jipya, kisha tieni chumvi humo! Walipomletea,

²¹akaenda nje kufika hapo, maji yalipotokea, akaitupa ile chumvi papo hapo akisema: Hivi ndivyo, Bwana anavyosema: Nimeyapatia maji haya uzima, hayataua tena, wala hayatapoozesha tena mimba.

²²Ndipo, yale maji yalipopona hata siku hii ya leo, kama Elisa alivyosema.

²³Toka huko akapanda kwenda Beteli; alipokuwa akipanda njiani, watoto wakatoka mjini, wakamfyoza wakimwambia: Panda, Chakipara! Panda, Chakipara!

²⁴Alipogeuka nyuma akawaona, akawaapiza katika Jina la Bwana. Ndipo, chui wawili walipotoka mwituni, wakararua kwao watoto 42.

²⁵Kisha akatoka huko kwenda mlimani kwa Karmeli, toka huko akarudi Samaria.[#2 Fal. 4:25.]