Dawidi anamwua mpasha habari za kufa kwake Sauli.

¹Ikawa, Sauli alipokwisha kufa, Dawidi akarudi kwa kuwapiga Waamaleki; kisha Dawidi akakaa Siklagi siku mbili.

²Ilipokuwa siku ya tatu, mara akaja mtu aliyetoka makambini kwa Sauli, nguo zake zilikuwa zimeraruliwa, napo kichwani pake palikuwa na vumbi; naye alipofika kwake Dawidi akajitupa chini na kumwangukia.

³Dawidi alipomwuliza: Unatoka wapi? akamwambia: Nimekimbia makambini kwa Waisiraeli.

⁴Ndipo, Dawidi alipomwambia: Nisimulie yaliyofanyika huko! Akamwambia, ya kuwa watu walikimbia penye mapigano, kwa maana wengi wa kwao waliangushwa, wakafa, naye Sauli na mwanawe Yonatani wamekufa.

⁵Dawidi akamwuliza huyo kijana aliyempasha habari hizi: Umejuaje, ya kuwa Sauli amekufa na mwanawe Yonatani?

⁶Yule kijana aliyempasha hizi habari akamwambia: Ikanitukia, nifike mlimani kwa Gilboa, mara nikamwona Sauli, akiuegemea mkuki wake, nayo magari pamoja na wapanda farasi wakamsonga.[#1 Sam. 31:1-3.]

⁷Alipogeuka nyuma, akaniona, akaniita; nami nikamwitikia kwamba: Nipo hapa!

⁸Akaniuliza: Wewe nani? Nikamjibu: Mimi Mwamaleki.

⁹Akaniambia: Njoo hapa, nilipo, uniue! Kwani kizunguzungu kimenipata, nayo roho yangu ingali nzima.

¹⁰Ndipo, nilipokuja hapo, alipokuwa, nikamwua, kwani nilijua, ya kuwa hawezi kupona kwa hivyo, alivyoanguka;. kisha nikakichukua kilemba chake kichwani pake na kikuku chake mkononi pake, nimevileta hapa kwa bwana wangu, ni hivi!

¹¹Ndipo, Dawidi alipoyakamata mavazi yake, akayararua, nao watu wote waliokuwa naye wakafanya hivyo.[#1 Mose 37:29.]

¹²Wakaomboleza na kulia machozi, wakafunga mfungo mpaka jioni kwa ajili ya Sauli na kwa ajili ya mwanawe Yonatani na kwa ajili ya watu wa Bwana na kwa ajili yao wa mlango wa Isiraeli, kwa kuwa wameangushwa na panga.[#1 Sam. 31:13.]

¹³Kisha Dawidi akamwuliza huyo kijana aliympasha habari hizi: Wewe u mtu wa wapi? Akasema: Mimi ni mwana wa mtu mgeni wa Amaleki.

¹⁴Dawidi akamwambia: Kumbe hukuogopa kuuinua mkono wako, umwangamize aliyepakwa mafuta na Bwana?[#1 Sam. 24:7.]

¹⁵Ndipo, Dawidi alipomwita mmoja wao vijana, akamwambia: Njoo, umpige! Naye alipompiga, akafa;[#2 Sam. 4:10,12.]

¹⁶kisha Dawidi akamwambia: Damu yako na ikujie kichwani pako! Kwani kinywa chako kimekuponza na kusema kwamba: Mimi nimemwua aliyepakwa mafuta na Bwana.[#1 Fal. 2:23,33.]

Dawidi anamwombolezea Sauli na Yonatani.

¹⁷Kisha Dawidi akatunga ombolezo hili la kumwombolezea Sauli na mwanawe Yonatani.

¹⁸Akaagiza kuwafundisha wana wa Yuda wimbo huu wa upindi, nao utaukuta, umeandikwa katika kitabu cha Mnyofu:[#2 Sam. 1:22; Yos. 10:13.]

¹⁹Isiraeli, waliokuwa pambo lake wameuawa vilimani kwako!

Imekuwaje, wakiangushwa hao mafundi wa vita?

²⁰Msiyasimulie Gati, wala msiyatangaze njiani kwa[#Mika 1:10; 1 Sam. 18:6.]

Askaloni, wasipate kufurahi wanawake wa Wafilisti, wasipige

vigelegele wao wanawake wa kimizimu!

²¹Msione tena umande wala mvua, ninyi milima ya Gilboa,[#4 Mose 15:18-21.]

yasiwe tena kwenu mashamba yenye malimbuko! Kwani ndiko,

zilikoachwa ngao zao hao mafundi wa vita, ngao yake Sauli

naye, kama hakupakwa mafuta.

²²Upindi wake Yonatani ulikuwa hauponyi, ijapo wawe

mafundi wa vita wenye unono, uliotaka kuwaua; upanga wake Sauli haukurudi alani, usipokuwa umeua.

²³Sauli na Yonatani walipatana kwa kupendana mioyoni,

hawakutengeka walipoishi, wala walipokufa. Walikuwa wepesi

kuliko kozi, walikuwa wenye nguvu kuliko simba.

²⁴Ninyi wanawake wa Kiisiraeli, mwombolezeeni Sauli!

Kwani aliwavika mavazi ya kifalme yenye urembo mwingi, kisha

hizo nguo zenu akazipamba kwa mapambo ya dhahabu.

²⁵Imekuwaje, wakiangushwa vitani hao mafundi wa vita?

Yonatani akiuawa vilimani kwako?

²⁶Moyo wangu umesongeka kwa ajili yako, maana wewe

ulinipendeza sana, ndugu yangu Yonatani, upendo wako

ulinifurahisha kuliko upendo wa wanawake.

²⁷Imekuwaje, wakiangushwa hao mafundi wa vita? hayo mata

makali ya kupigia vita yakiangamia hivyo?