Dawidi anakuwa mfalme wa Wayuda.

¹Ikawa, Dawidi alipomwuliza Bwana baadaye kwamba: Nipande kukaa katika mji mmoja wa Yuda? Bwana akamwambia: Panda! Dawidi akauliza tena: Nipande kukaa wapi? Akamwambia: Heburoni.[#1 Sam. 30:8.]

²Ndipo, Dawidi alipopanda kukaa huko pamoja na wakeze wawili, Ahinoamu wa Izireeli na Abigaili, mkewe Nabali wa Karmeli.[#1 Sam. 25:42-43.]

³Nao wale watu waliokuwa naye Dawidi akawapandisha kila mtu na mlango wake, wakakaa katika miji ya Heburoni.

⁴Kisha waume wa Yuda wakaja, wakampaka Dawidi mafuta, awe mfalme wa mlango wa Yuda. Nao wakampasha Dawidi habari, ya kuwa watu wa Yabesi wa Gileadi wamemzika Sauli.[#1 Sam. 16:13; 31:12; 2 Sam. 5:3.]

⁵Dawidi akatuma wajumbe kwa watu wa Yabesi wa Gileadi, akawaambia: Na mbarikiwe na Bwana ninyi, kwa kuwa bwana wenu Sauli mmemfanyizia tendo lililo jema la kumzika!

⁶Sasa Bwwana na awafanyizie nanyi matendo yanayoelekea kuwa mema kweli, mimi nami na niwarudishie wema huo, kwa kuwa mmefanya jambo hilo.

⁷Sasa na mwikaze mikono yenu, mpate nguvu, kwani bwana wenu Sauli amekufa, tena mimi nami wao wa mlango wa Yuda wamenipaka mafuta, niwe mfalme wao.

Isiboseti anakuwa mfalme wa Waisiraeli.

⁸Naye Abineri, mwana wa Neri, aliyekuwa mkuu wa vikosi vya Sauli, akamchukua Isiboseti, mwana wa Sauli, akampeleka Mahanaimu,[#1 Sam. 14:50.]

⁹akamfanya kuwa mfalme wa Gileadi na wa Asuri na wa Izireeli na wa Efuraimu na wa Benyamini na wa Waisiraeli wote.

¹⁰Isiboseti, mwana wa Sauli, alikuwa mwenye miaka 40 alipoupata ufalme wa Waisiraeli, akawa mfalme miaka 2; ni wao wa mlango wa Yuda tu waliomfuata Dawidi.

¹¹Nayo hesabu ya siku, Dawidi alizokuwa mfalme wa mlango wa Yuda huko Heburoni, ikawa miaka 7 na miezi 6.

Vita vya Dawidi na Isiboseti.

¹²Abineri, mwana wa Neri, akatoka Mahanaimu na watumishi wa Isiboseti, mwana wa Sauli, kwenda Gibeoni.

¹³Ndipo, Yoabu, mwana wa Seruya, alipotoka naye na watumishi wake Dawidi, wakakutana penye ziwa la Gibeoni; hao wakakaa ng'ambo ya huku ya hilo ziwa, nao wale wakakaa ng'ambo ya pili ya hilo ziwa.

¹⁴Abineri akamwambia Yoabu: Na waondokee vijana, wacheze mbele yetu! Yoabu akaitikia: Haya! Na waondokee!

¹⁵Basi, wakaondoka, wakaja kusimama huku na huko kwa kuhesabiwa: 12 wa Benyamini na wa Isiboseti, mwana wa Sauli, tena 12 watumishi wa Dawidi.

¹⁶Wakakamatana kila mtu kichwa cha mwenzake, wakachomana panga kila mtu ubavuni mwa mwenzake, kwa hiyo wakaanguka wote pia, wakafa. Wakapaita mahali pale Fungu lenye Mapanga Makali lililoko Gibeoni.

¹⁷Kisha mapigano yakawa makali sanasana siku hiyo, Abineri na watu wa Waisiraeli wakashindwa na watumishi wake Dawidi.

¹⁸Wakawako wana watatu wa Seruya, Yoabu na Abisai na Asaheli; naye Asaheli alikuwa mwepesi kwa kupiga mbio kama paa wanaokaa porini.[#1 Mambo 2:16.]

¹⁹Naye Asaheli akamkimbiza Abineri na kumfuata, hakujielekeza kwenda kuumeni wala kushotoni, asiache kumfuata Abineri.

²⁰Abineri akageuka nyuma, akamwuliza: Wewe siwe Asaheli? Akasema: Ndimi!

²¹Abineri akamwambia: Geuka kuumeni kwako au kushotoni kwako, ukamate kijana mmoja, uchukue mata yake! Lakini Asaheli akakataa kuondoka kwake na kuacha kumfuata.

²²Abineri akamwambia Asaheli mara ya pili: Ondoka, uache kunifuata! Kwa nini nikupige, uanguke chini? Nitawezaje kutokea usoni pa kaka yako Yoabu?

²³Alipokataa kabisa kumwondokea, Abineri akamchoma tumboni kwa ncha ya chini ya mkuki, mkuki ukatokea mgongoni; ndipo, alipoanguka chini, akafa papo hapo. Ikawa, wote waliofika hapo, Asaheli alipoanguka chini akifa, wakasimama hapo.[#2 Sam. 3:27.]

²⁴Kisha Yoabu na Abisai wakamkimbiza Abineri; jua lilipokuchwa walikuwa wamefika kwenye kilima cha Ama kielekeacho Gia penye njia ya kwenda nyikani kwa Gibeoni.

²⁵Ndipo, wana wa Benyamini walipokusanyika, wamfuate Abineri, wakawa kikosi kimoja, wakasimama juu ya kilima kimoja.

²⁶Hapo Abineri akamwita Yoabu kwamba: Je? Upanga na ule kale na kale? Hujui, ya kuwa mwisho wake utakuwa uchungu? Utangoja mpaka lini, uwaambie hao watu, warudi na kuacha kuwafuata ndugu zao?

²⁷Yoabu akasema: Hivyo, Mungu alivyo Mwenye uzima, kama ungalisema hivyo asubuhi, watu wangalikwenda zao na kuacha kukimbizana kila mtu na ndugu yake.

²⁸Kisha Yoabu akapiga baragumu; ndipo, watu wote waliposimama, hawakuwakimbiza tena Waisiraeli, wala hawakuendelea kupigana nao.

²⁹Abineri na watu wake wakashika njia ya kupita jangwani usiku kucha, kisha wakavuka Yordani, wakapita Bitironi yote, kisha wakafika Mahanaimu.

³⁰Yoabu naye akarudi, akaacha kumfuata Abineri, akawakusanya watu wake wote; ndipo, ilipoonekana kwa watumishi wa Dawidi, ya kuwa watu 19 hawako, tena Asaheli.

³¹Lakini watumishi wa Dawidi walipiga kwao Wabenyamini na kwa watu wa Abineri watu 360; ndio waliokufa.

³²Wakamchukua Asaheli, wakamzika katika kaburi la baba yake lililoko Beti-Lehemu; kisha Yoabu na watu wake wakaenda usiku kucha, nao walipofika Heburoni, kukapambazuka.