Waisiraeli nao wanamfanya Dawidi kuwa mfalme wao.

¹Mashina yote ya Waisiraeli wakaja Heburoni kwake Dawidi, wakamwambia kwamba: Tazama, sisi na wewe tu mifupa ya mmoja, nazo nyama za miili yetu ni za mmoja.[#2 Sam. 19:12.]

²Napo hapo kale, Sauli alipokuwa mfalme wetu bado, aliyewaongoza Waisiraeli kwenda na kurudi vitani ni wewe, naye Bwana alikuambia: Wewe utawachunga walio ukoo wangu wa Waisiraeli, nawe wewe utawatawala Waisiraeli.[#1 Sam. 13:14; 25:30.]

³Wazee wote wa Waisiraeli wakamjia mfalme huko Heburoni, mfalme Dawidi akafanya agano nao huko Heburoni mbele ya Bwana, wakampaka Dawidi mafuta, awe mfalme wao Waisiraeli.[#1 Sam. 16:13; 2 Sam. 2:4.]

⁴Dawidi alikuwa mwenye miaka 30 alipoupata ufalme, akawa mfalme miaka 40.[#1 Fal. 2:11; 1 Mambo 29:27.]

⁵Huko Heburoni alikuwa mfalme wa Wayuda miaka 7 na miezi 6, namo Yerusalemu alikuwa mfalme wa Waisiraeli na wa Wayuda wote miaka 33.

Yerusalemu unatekwa.

⁶Kisha mfalme na watu wake wakaenda Yerusalemu kwa Wayebusi waliokuwa bado wenyeji wa nchi hiyo, nao wakamwambia Dawidi kwamba: Humu hutaiangia kabisa usipowaondoa vipofu na viwete, ni kwamba: Dawidi hataingia humu.

⁷Lakini Dawidi akaliteka boma la Sioni, ndio mji wa Dawidi.

⁸Siku hiyo Dawidi alisema: Kila anayetaka kuwapiga Wayebusi na ashike njia ya kukwea katika mfereji, awafikie wale viwete na vipofu wanaochukizwa na roho yake Dawidi. Kwa hiyo husema fumbo la kwamba: Kipofu au kiwete alipo, mtu haingii nyumbani.

⁹Dawidi akakaa mle bomani, akaliita mji wa Dawidi, Dawidi akaujenga pande zote kuanzia Milo mpaka hapo penye nyumba za mji.

¹⁰Dawidi akaendelea kuwa mkuu, kwa sababu Bwana Mungu mwenye vikosi alikuwa naye.[#2 Sam. 3:1.]

Dawidi anajijengea nyumba.

¹¹Hiramu, mfalme wa Tiro, akatuma wajumbe kwa Dawidi na miti ya miangati na maseremala na waashi wa kujenga na mawe, wakamjengea Dawidi nyumba.

¹²Ndipo, Dawidi alipojua, ya kuwa Bwana amemweka kweli kuwa mfalme wao Waisiraeli, kwani ufalme wake ukaja kutukuka zaidi kwa ajili ya ukoo wake wa Waisiraeli.

Wakeze na wanawe Dawidi.

¹³Kisha Dawidi akachukua tena masuria na wake mle Yerusalemu alipokwisha kuingia humo na kutoka Heburoni, Dawidi akazaa tena wana wa kiume na wa kike.

¹⁴Haya ndiyo majina ya wana, waliozaliwa mle Yerusalemu: Samua na Sobabu na Natani na Salomo,[#Luk. 3:31; Mat. 1:6.]

¹⁵na Ibuhari na Elisua na Nefegi na Yafia,

¹⁶na Elisama na Eliada na Elifeleti.

Dawidi anawashinda Wafilisti.

¹⁷Wafilisti waliposikia, ya kuwa wamempaka Dawidi mafuta, awe mfalme wa Waisiraeli, ndipo, Wafilisti wote walipopanda kumtafuta Dawidi. Dawidi alipovisikia, akashuka kuja ngomeni.

¹⁸Wafilisti wakaja, wakajieneza Bondeni kwa Majitu.

¹⁹Dawidi akamwuliza Bwana kwamba: Nikipanda kupigana na Wafilisti, utawatia mkononi mwangu? Bwana akamwambia Dawidi: Panda! Kwani nitawatia Wafilisti mkononi mwako.[#1 Sam. 30:8.]

²⁰Ndipo, Dawidi alipokuja Baali-Perasimu; Dawidi alipowapiga huko akasema: Bwana amewaatua adui zangu mbele yangu, kama maji yanavyoatua ukingo. Kwa sababu hii akapaita mahali pale jina lake Baali-Perasimu (Maatuko).

²¹Wakaacha kule vinyago vyao, lakini Dawidi na watu wake wakavichukua.

²²Lakini Wafilisti wakapanda tena, wakajieneza kulekule Bondeni kwa Majitu.

²³Naye Dawidi alipomwuliza Bwana, akamwambia: Usipande, ila uzunguke migongoni kwao, upate kuwajia ukitoka juu, misandarusi iliko.

²⁴Hapo, utakaposikia vileleni kwa misandarusi shindo kama ya watu wapitao, basi, hapo piga mbio! Kwani ndipo, Bwana atakapotokea, akutangulie kuyapiga majeshi ya Wafilisti.

²⁵Dawidi akafanya, kama Bwana alivyomwagiza, akawapiga Wafilisti toka Geba, hata mtu afike Gezeri.