¹Paulo alipokwisha kuwakazia macho hao wakuu wa barazani, akasema: Waume ndugu, mimi mpaka siku hii ya leo nimekuwapo machoni pa Mungu, kwa hiyo moyo umening'aa wote.[#Tume. 22:1; 24:16.]

²Mtambikaji mkuu Anania alipowaagiza waliosimama hapo, alipokuwa, wampige kinywani,

³ndipo, Paulo alipomwambia: Mungu atakupiga wewe, ukuta wenye uzuri wa kupakwa tu! Wewe unakaa kunihukumu, kama yanavyolingana na Maonyo, tena unayabeza Maonyo kwa kuagiza, nipigwe?[#Mat. 23:27.]

⁴Nao waliosimama hapo waliposema: Unamtukana mtambikaji mkuu wa Mungu?

⁵Paulo akasema: Ndugu zangu, sikumjua, ya kuwa ndiye mtambikaji mkuu, kwani imeandikwa: Mtawala ukoo wako usimwambia maovu![#2 Mose 22:28.]

⁶Paulo alipowatambua, ya kuwa fungu ni Masadukeo, fungu ni Mafariseo, akapaza sauti mbele yao wakuu: Waume ndugu, mimi ni Fariseo, mwana wa Fariseo: ninasutwa hivyo, tunavyoungojea ufufuko wa wafu.[#Tume. 22:3; 26:5.]

⁷Aliposema hivi, Mafariseo na Msadukeo wakainukiana, nao wengi wakajitenga.

⁸Kwani Masadukeo hukana ya kwamba: Hakuna ufufuko, hakuna malaika, hakuna roho. Lakini Mafariseo huungama kwamba: Yote yapo.[#Mat. 22:23.]

⁹Yakawa makelele makubwa; palikuwa na waandishi waliokuwa wa upande wa Mafariseo, wakainuka, wakabishana wakisema: Mtu huyu hatumwoni kiovu cho chote. Kama yuko roho au malaika aliyesema naye, hatutaki kumgombeza Mungu.[#Tume. 5:39; 25:25.]

¹⁰Lakini matata yalipokaza, mkuu wa kikosi akaogopa, Paulo asiraruliwe nao akaagiza, askari washuke, wampokonye katikati yao, wampeleke bomani.

¹¹Usiku uliofuata Bwana akamjia na kusimama hapo, alipokuwa, akasema: Tulia! kwani kama ulivyoyashuhudia mambo yangu hapa Yerusalemu, hivyo imekupasa kuyashuhudia hata Roma.[#Tume. 18:9; 19:21; 28:16,23.]

Werevu wa Wayuda.

¹²Kulipokucha, Wayuda wakakusanyika, wakaapizana, kwamba wasile, wala wasinywe, mpaka wamwue Paulo;

¹³nao walioapizana hivyo walikuwa wengi kupita 40.

¹⁴Kisha wakaendea watambikaji wakuu na wazee, wakasema: Tumeapizana kwa kiapo ya kwamba: Tusionje kitu, mpaka tumwue Paulo!

¹⁵Sasa ninyi wakuu nyote, mmweleze mkuu wa kikosi, amshushe kesho kwenu, kwamba mnataka kutambua kwa welekevu, mambo yake yalivyo. Lakini sisi tuko tayari kumwua, akiwa hajawafikia ninyi.

¹⁶Mwana wa umbu lake Paulo alipoisikia njama hiyo, akaja, akaingia bomani, akamjulisha Paulo.

¹⁷Ndipo, Paulo alipoita bwana askari mmoja, akasema: Umpeleke kijana huyu kwa mkuu wa kikosi! Kwani yuko na habari ya kumpasha.

¹⁸Yule akamchukua akampeleka kwa mkuu wa kikosi, akasema: Mfungwa Paulo umeniita, akataka, nimpeleke kijana huyu kwako, yuko na neno la kukuambia.

¹⁹Mkuu wa kikosi akamshika mkono, akaondoka naye kwenda penye njama, akamwuliza: Una habari gani ya kunipasha?

²⁰Akasema: Wayuda wamepatana kukuomba wewe, umshushe Paulo kesho kwenye wakuu, kwamba wanataka kumwuliza kwa welekevu, mambo yake yalivyo.

²¹Basi, wewe usiwaitikie! Kwani watu wao wengi kupita 40 wanamwotea; hao wameapizana kwa kiapo, ya kwamba wasile, wala wasinywe, mpaka wamwue yeye. Sasa wako tayari na kuongoja, uwaitikie wewe.

²²Mkuu wa kikosi akamwaga yule kijana, akamkataza kwamba: Usimwambie mtu, ya kuwa umenieleza haya!

Paulo anapelekwa Kesaria.

²³Akaita wabwana askari wawili, akasema: Tengenezeni askari 200, waende mpaka Kesaria, na askari wapanda frasi 70 na wenye mikuki 200, wawe tayari saa tatu ya usiku!

²⁴Tandikeni na nyumbu za kumpandisha Paulo, wampeleke vema mpaka kwa Feliki aliye mtawala nchi!

²⁵Akamwandikia barua yenye maneno haya:

²⁶Mimi Klaudio Lisia nakuamkia wewe, mtawala nchi Feliki uliye na nguvu nyingi, salamu!

²⁷Mtu huyu alikamatwa na Wayuda; nao walipotaka kumwua, nikaenda na kikosi cha askari, nikamwokoa, kwani nalisikia, ya kuwa ni Mroma.[#Tume. 21:33; 22:25.]

²⁸Nami kwa hivyo, nilivyotaka kutambua, waliyomsuta, nikamshusha na kumweka barazani kwao wakuu wao.[#Tume. 22:30.]

²⁹Nikaona, ya kuwa anasutiwa mashindano ya Maonyo yao, lakini hakuna neno linalompasa kuuawa na kufungwa tu.[#Tume. 18:14-15; 23:6,9.]

³⁰Tena nilipoambiwa, ya kuwa mtu huyu anatunduiliwa, mara nikampeleka kwako, nikawaagiza hata wenye kumsuta, waseme mbele yako, wanayomsuta.[#Tume. 24:8.]

³¹Wale askari wakamchukua Paulo, kama walivyoagizwa, wakampeleka usiku mpaka mji wa Antipatiri.

³²Kesho yake wakawaacha wale wapanda frasi, waondoke pamoja naye, nao wenyewe wakarudi bomani.

³³Wale walipofika Kesaria wakampa mtawala nchi ile barua, wakamsimamisha Paulo mbele yake.

³⁴Alipokwisha kuisoma hiyo barua, akamwuliza upande wa nchi, aliotoka. Aliposikia, ya kuwa ni mtu wa Kilikia,[#Tume. 22:3.]

³⁵akasema: Nitakuuliza na kukusikiliza, wewe kukusuta watakapofika; kisha akaagiza, alindwe katika boma la Herode.