Shauri mbele ya Feliki.

¹Siku tano zilipopita, mtambikaji mkuu Anania akatelemka pamoja nao wazee wengine na msemaji aliyitwa Tertulo, wakamsuta Paulo mbele ya mtawala nchi.

²Yule alipoitwa, Tertulo akaanza kumsuta akisema: Kwa nguvu yako, bwana Feliki, tunapata kutengemana sana; na kwa utunzaji wako wewe hili taifa letu limetengenezewa mambo mazuri mengi.

³Hayo yote twayapokea na kukushukuru sana kila siku na kila mahali.

⁴Lakini nisikuchokeshe kwa maneno mengi; nakuomba utusikilize kidogo kwa utu wako.

⁵Kwani tumemwona mtu huyu kuwa mwangamizi, akiwaletea kondo Wayuda wote waliopo ulimwenguni po pote, tena ni mkubwa wa chama cha Wanasareti.[#Tume. 17:6.]

⁶Alipojaribu kupachafua napo Patakatifu, ndipo, tulipomkamata tukitaka kumhukumu kwa Maonyo yetu.[#Tume. 21:28.]

⁷Lakini mkuu wa kikosi Lisia akamwondoa na nguvu nyingi mikononi mwetu, akaagiza, wenye kumsuta waende kwako wewe.

⁸Hayo yote, tunayomsuta, utaweza kuyatambua mwenyewe ukimwulizauliza.[#Tume. 23:30.]

⁹Wayuda nao wakamwitikia wakisema: Hivyo ndivyo, yalivyo.

¹⁰Mtawala nchi alipomkonyeza Paulo, aseme, akajibu: Ninakujua, ya kuwa wewe ndiwe mwamuzi wa hili taifa letu tangu miaka mingi; kwa hiyo nitajikania haya mambo yangu na kuchangamka.

¹¹Kwani wewe unaweza kutambua, ya kuwa siku, nilizopanda kwenda Yerusalemu kuombea hapo, hazijapita kumi na mbili.[#Tume. 21:17.]

¹²Tena hawakuniona hapo Patakatifu, nikiongea na mtu au nikiwachokoza watu, wainukiane, kama ni nyumbani mwa kuombea au mjini pengine.

¹³Tena wanayonisuta sasa, hawawezi kuyatokeza kuwa ya kweli mbele yako.

¹⁴Lakini mbele yako naungama waziwazi: Njia ile, wanayoiita ya chama, ndiyo yangu ya kumtumikia Mungu wa baba zetu, nikayategemea yote yaliyoandikwa penye Maonyo na katika vyuo vya Wafumbuaji.[#Tume. 24:5.]

¹⁵Tena liko jambo, ninalolingojea kwa Mungu, nalo ndilo, wanaloliitikia nao hawa wenyewe, la kwamba: Utakuwapo ufufuko wa waongofu na wa wapotovu.[#Dan. 12:2; Yoh. 5:28-29.]

¹⁶Kwa hiyo nami mwenyewe nakaza kuulinda moyo wangu, uwe umeng'aa mbele ya Mungu, hata mbele ya watu katika mambo yote.[#Tume. 23:1.]

¹⁷Mika ilipopita mingi, nikafika kwao wa taifa langu niwapelekee sadaka ya vipaji.[#Rom. 15:25-26; Gal. 2:10.]

¹⁸Hapo ndipo, waliponiona, nikieuliwa Patakatifu; hawakuniona, nikikusanya watu au nikipiga kelele.[#Tume. 21:26-27.]

¹⁹Lakini walioniona ndio Wayuda wengine waliotoka Asia; hao ingewapasa kuwapo hapa, wanisute mbele yako, waliyonionea.

²⁰Nao hawa na waseme wenyewe, kama wameona upotovu kwangu, niliposimama mbele yao wakuu,

²¹lisipokuwa neno lile moja, nililolipazia sauti kabisa nikiinuka katikati yao na kusema: Ufufuko wa wafu ndio, ninaohukumiwa leo mbele yenu![#Tume. 23:6.]

²²Feliki alipoyasikia haya akawakawilisha, kwani alipata kuelewa na mambo ya njia hiyo. Kwa hiyo akasema: Mkuu wa kikosi Lisia atakapotelemka, nitayatambulisha naye mambo yenu.[#Tume. 23:26.]

²³Akamwagiza bwana askari, Paulo alindwe, lakini asifungwe, wala asiwazuie wenziwe kumtumikia au kumjia.[#Tume. 27:3.]

²⁴Siku zilipopita, Feliki akaja pamoja na mkewe Dirusila aliyekuwa Myuda, akatuma kumwita Paulo, akamsikiliza, akimwonyesha, kumtegemea Kristo Yesu kulivyo.

²⁵Lakini alipoeleza mambo ya kupata wongofu na ya kuziepuka tamaa na ya hukumu itakayokuwapo, Feliki akaingiwa na woga, akajibu: Sasa hivi jiendee tu!

²⁶Hapo, nitakapopata mapumziko, nitakuita tena. Vile vile alingojea kupenyezewa fedha na Paulo, amfungue. Kwa hiyo akamwita mara kwa mara, aongee naye.

²⁷Lakini miaka miwili ilipopita, Porkio Festo akampokea Feliki kazi yake. Feliki akataka kuwapendelea Wayuda, kwa hiyo akamwacha Paulo kifungoni.