Shauri mbele ya Festo.

¹Festo alipokwisha kuupata utawala nchi, siku zilipopita tatu, akaondoka Kesaria, akapanda kwenda Yerusalemu.

²Ndipo, watambikaji wakuu na Wayuda wenye cheo walipomtokea kumsuta Paulo, wakambembeleza[#Tume. 24:1.]

³na kumwomba, awapendeze akiagiza, aletwe Yerusalemu, kwani walikwisha kula njama ya kumwua njiani.[#Tume. 23:15.]

⁴Festo akajibu: Paulo analindwa huko Kesaria, nami mwenyewe nitaondoka upesi kwenda huko.

⁵Kisha akasema: Wenzenu wanaoweza wafuatane nami, wamsute huko mtu huyo, akiwa ametenda neno lisilopasa!

⁶Alipokwisha kukaa kwao siku zisizopita nane au kumi, akatelemka kwenda Kesaria. Kesho yake akaketi katika kiti cha uamuzi, akaagiza, Paulo aletwe.

⁷Alipofika, Wayuda waliotelemka toka Yerusalemu wakamsimamia pande zote, wakamsingizia mambo mengi yaliyokuwa magumu, wasiweze kuyaonyesha kuwa ya kweli.

⁸Lakini Paulo akajikania akisema: Sikukosa wala Maonyo ya Wayuda, wala Patakatifu, wala Kaisari.

⁹Kwa kutaka kuwapendeza Wayuda Festo akamwuliza Paulo akisema: Unataka kupanda kwenda Yerusalemu, uhukumiwe huko mbele yangu kwa ajili ya mambo hayo?

¹⁰Paulo akasema: Ninasimama hapa penye kiti cha uamuzi cha Kaisari; ndipo panaponipasa kuhukumiwa. Wayuda hakuna, nilichowapotolea, kama nawe mwenyewe unavyojua.

¹¹Basi, nikiwa mpotovu, nikatenda linalopasa kuuawa, sikatai kufa. Lakini masingizio yao hawa yakiwa hayana maana, hakuna tena anayeweza kunitia mikononi mwao, kwamba awapendeze. Nataka, nihukumiwe na Kaisari.

¹²Hapo Festo akasemezana nao wakuu, akajibu: Umetaka kuhukumiwa na Kaisari, utakwenda kwake Kaisari.

Mfalme Agripa.

¹³Siku zilipopita, mfalme Agripa na Berenike wakafika Kesaria, wamwamkie Festo.

¹⁴Walipokaa huko siku nyingi, Festo akamwelezea mfalme mambo ya Paulo akisema: Yuko mtu aliyeachwa na Feliki kifungoni.[#Tume. 24:27.]

¹⁵Nilipokuwa Yerusalemu, watambikaji wakuu na wazee wa Wayuda walinitokea kwa ajili yake, wakataka mapatilizo yake yeye.

¹⁶Nikawajibu: Si desturi ya Kiroma kutoa mtu ye yote kwa mapenzi ya wengine; sharti kwanza mwenye kusutwa aonane uso kwa uso nao wasutaji wake, naye apate pa kujikania alilosutwa.

¹⁷Basi, walipokusanyika huku, sikuwakawilisha, ila kesho yake nikaketi katika kiti cha uamuzi, nikaagiza, yule mtu aletwe.

¹⁸Wasutaji walipomwinukia, vibaya nilivyoviwaza moyoni, hakuna, walichomsingizia hata kimoja;

¹⁹wakabishana naye tu kwa ajili ya tambiko lao wenyewe na kwa ajili ya mfu anayeitwa Yesu, kwani Paulo alisema: Yupo, anaishi.[#Tume. 18:15.]

²⁰Nami kwa hivyo, nisivyojua mabishano kama hayo, nikamwuliza: Unataka kwenda Yerusalemu, uhukumiwe huko mambo hayo?

²¹Lakini Paulo akasema waziwazi, ya kuwa anataka kuwekwa, mpaka ahukumiwe na mfalme aliye mkuu peke yake; kwa hiyo nikaagiza, awekwe, mpaka nitakapomtuma kwake Kaisari.

²²Agripa alipomwambia Festo: Nami mwenyewe nataka kumsikia mtu huyu akasema: Kesho utamsikia.[#Luk. 23:8.]

²³Basi, kesho yake wakaja Agripa na Berenike, walikuwa wamejipamba kifalme vizuri, wakaingia penye hukumu pamoja na mabwana wakubwa na watu wenye cheo wa mjini. Festo alipoagiza, Paulo akaletwa.

²⁴Ndipo, Festo aliposema: Mfalme Agripa, nanyi waume nyote mliopo hapa pamoja nasi, mtazameni mtu huyu! Kwa ajili yake yeye kundi lote zima la Wayuda limenitokea huko Yerusalemu na hapa vilevile; wakanipigia makelele ya kwamba: Haifai kabisa, huyu akiwapo vivyo hivyo![#Tume. 22:22; 25:2,7.]

²⁵Lakini mimi nikaona, ya kuwa hakufanya neno lo lote linalopasa, auawe, naye mwenyewe akasema waziwazi: Nataka, nihukumiwe na mfalme aliye mkuu peke yake; kwa hiyo nikataka kumtuma huko.

²⁶Lakini sinalo neno la kweli la kumwandikia bwana wangu la kwamba: Amekosa hivi na hivi. Kwa hiyo nimemleta mbele yenu, kwanza mbele yako wewe, mfalme Agripa, nipate la kuandika, mkiisha kuulizana naye.

²⁷Kwani naona, ni upambavu kutuma mfungwa, pasipo kuyaeleza makosa yake.