Mifano mitatu ya mapatilizo ya Isiraeli na ya mlango wa Yoroboamu.

¹Haya ndiyo maono, Bwana Mungu aliyonionyesha: Nimemwona, alivyotengeneza nzige hapo, mimea ya vuli ilipoanza kuchipuka; nayo ilikuwa ya majani ya vuli iliyochipuka, watu walipokwisha kumkatia mfalme majani ya ng'ombe.

²Ikawa, nzige walipokwisha kula majani ya nchi, nikasema: Bwana Mungu, waachilie! Yakobo atawezaje kusimama? Kwani yeye ni mdogo.

³Ndipo, Bwana Mungu alipoigeuza roho kwa ajili ya hayo naye Bwana akasema: Hayatakuwa.

⁴Hili ndilo ono, Bwana Mungu alilonionyesha: Nimeona, Bwana Mungu alivyouita moto kuja kumgombea. Nao ukala vilindi vikubwa vya maji, ukataka kula napo pa kulimia.

⁵Ndipo, niliposema: Bwana Mungu, acha hapo! Yakobo atawezaje kusimama? Kwani yeye ni mdogo.

⁶Ndipo, Bwana alipoigeuza roho kwa ajili ya hayo, naye Bwana Mungu akasema: Haya nayo hayatakuwa.

⁷Hili ndilo ono, alilonionyesha: Nimemwona Bwana Mungu, alivyosimama juu ya ukuta uliosimama sawasawa kwa kujengwa kwa kipimo cha timazi, naye alishika kipimo cha timazi mkononi mwake.

⁸Bwana akaniuliza: Unaona nini, Amosi? Nilipojibu: Kipimo cha timazi, Bwana akaniambia: Utaniona, nitakavyowapima walio ukoo wangu wa Isiraeli, sitaendelea tena kuwapita tu.[#Amo. 8:2; Yes. 34:11.]

⁹Vilima vya Isaka vitaangamizwa, napo patakatifu pote pa Isiraeli patabomolewa, nami nitawainukia walio mlango wa Yoroboamu kwa upanga.

Mapatilizo ya Amasia.

¹⁰Ndipo, Amasia, mtambikaji wa Beteli, alipotuma kwa Yoroboamu, mfalme wa Isiraeli, kumwambia: Amosi anakuvurugia watu humu katika mlango wa Isiraeli, nchi haiwezi tena kuyavumilia maneno yake yote.[#Yer. 38:4.]

¹¹Kwani haya ndiyo, Amosi anayoyasema: Yoroboamu atakufa kwa upanga, nao Waisiraeli watatekwa na kuhamishwa, watoke katika nchi yao.

¹²Kisha Amasia akamwambia Amosi: Wewe mchunguzaji, nenda zako kukimbia katika nchi ya Yuda, ukajilie mkate huko na kuwafumbulia maneno![#1 Sam. 9:9.]

¹³Lakini huku Beteli usitufumbulie tena maneno, kwani hapa ndipo patakatifu pa mfalme, nayo nyumba hii ni ya ufalme wote.

¹⁴Amosi akamjibu Amasia na kumwambia: Mimi si mfumbuaji wala mwana wa mfumbuaji, kwani nalikuwa mchunga ng'ombe, nikajitunzia mikuyu.[#Amo. 1:1.]

¹⁵Ndipo, Bwana aliponichukua, akanitoa penye ng'ombe, Bwana akaniambia: Nenda, uwafumbulie walio ukoo wangu wa Isiraeli!

¹⁶Sasa lisikie neno la Bwana! Wewe unasema: Usiwafumbulie Waisiraeli! Wala usiwahubiri walio mlango wa Isaka yatakayokuwa![#Amo. 2:12; 7:13.]

¹⁷Ni kwa sababu hii, Bwana akisema hivyo: Mkeo atakuwa mgoni humu mjini, nao wanao wa kiume na wa kike watauawa kwa upanga, nalo fungu lako la nchi litagawanywa kwa kupimwa na kamba. Nawe wewe utakufa katika nchi iliyo na mwiko wa kuikaa, nao Waisiraeli watatekwa na kuhamishwa, watoke katika nchi yao.