Paulo anawaonya, wasidanganyike.

¹Kwani nataka, mlijue shindano langu kubwa, nililo nalo kwa ajili yenu na ya Walaodikia na kwa ajili yao wote wasioniona uso kwa uso kimwili; nalo ni hili:

²mioyo yao ipate kutulizwa, ikaunganishwa na kupendana, wapate kuzitwaa nazo mali zote, mtu azipatazo akiwa mwenye ujuzi mwingi, ni kwamba: Nao walitambue fumbo la Mungu na la Kristo.

³Mwake yeye ndimo, malimbiko yote ya werevu wa kweli na ya utambuzi yalimofichwa.[#Fano. 2:3-4; 1 Kor. 1:24,30.]

⁴Navisema hivi, mtu asiwadanganye akiwaambia maneno mazuri ya kuwashinda.[#Rom. 16:18.]

⁵Kwani mwili ukiwa hauko kwenu, moyo uko pamoja nanyi, ukaning'aa ukiona, mwonyekavyo, tena mjishupazavyo kumtegemea Kristo.[#1 Kor. 5:3; 14:40; Fil. 1:27.]

Kutahiriwa Kikristo.

⁶Basi, kama mlivyompokea Bwana Kristo Yesu, hivyo mwendelee kuwa wake,

⁷mkishusha mizizi mumo humo mwake, mkajengwa mlemle na kuongezwa nguvu za kumtegemea, kama mlivyofundishwa; hivyo mtayavumisha yale mema, mliyogawiwa.[#Ef. 2:22; 3:17.]

⁸Mjiangalie, mtu asije, akawateka akiwafundisha maneno ya ujuzi yaliyo ya udanganyi wa bure tu, hufanana na masimulio ya watu kama ya mambo yaliyo ya kwanza humu ulimwenguni, lakini siyo ya Kikristo.[#Kol. 2:16,20.]

⁹Kwani mwake Kristo ndimo mkaamo kimwili wingi wao yote yaliyo ya Kimungu.[#Yoh. 1:14,16.]

¹⁰Nanyi mkiwa naye huyapata hayo yote, maana yeye ni kichwa cha kila ukuu na cha kila nguvu.[#Ef. 1:21.]

¹¹Tena mkiwa naye yeye hutahiriwa pasipo kutumia mikono ya mtu, maana huuvua mwili wa kimtu ulio wenye makosa, ndiko kutahiriwa Kikristo.[#Rom. 2:29; 1 Petr. 3:21.]

¹²Hapo, mlipobatizwa mmezikwa pamoja naye, tena papo hapo mmefufuliwa pamoja naye kwa nguvu ya kumtegemea, mwipatayo kwake, Mungu aliyemfufua katika wafu.[#Kol. 3:1; Rom. 6:4.]

¹³Nanyi mlikuwa wenye kufa kwa ajili ya makosa, nayo miili yenu ilikuwa haikutahiriwa hivyo, lakini aliwapa kuishi pamoja naye, akawaondolea makosa yote.[#Ef. 2:1-5.]

¹⁴Kisha akakifuta cheti kilichoandikwa maagizo, tusiyoyashika, ndicho kilichotusuta; akakiondoa hapo kati, akakipigilia msalabani.[#Ef. 2:15.]

¹⁵Nao wakuu wa wangavu akawavua ukuu wao na nguvu zao, akaonyesha waziwazi, walivyo, akawatembeza kama mateka.[#Kol. 1:13; 2:10.]

Kivuli cha mambo yanayokuja.

¹⁶Kwa hiyo mtu asiwaumbue kwa ajili ya kula au kunywa, wala kwa ajili ya kuacha kuzipa cheo sikukuu zo zote, ikiwa za miandamo ya mwezi au za mapumziko.[#Mat. 15:7-9; Rom. 14:1-12.]

¹⁷Mambo hayo ni kivuli tu cha mambo yaliyotaka kutokea, lakini yametimia kimwili, Kristo alipokuja.[#Ebr. 8:5; 10:1.]

¹⁸Mtu asiwanyang'anye tunzo lenu akiwataka, mfuatane naye kujinyenyekeza na kuwatambikia malaika! Hujiwazia kwamba: Yako, aliyoyaona, kisha hujikazia yayo hayo akijitutumua bure kwa mawazo ya mwili wake,[#Kol. 2:23.]

¹⁹asishikamane naye aliye kichwa, aliye mwenye kuuunganisha mwili wote, ukitiwa nguvu kwa fundo na viungo, upate kumkulia Mungu.[#Ef. 4:15-16.]

Miiko ni ya bure.

²⁰Kama mmekufa pamoja naye Kristo mkiyaacha yale mambo yaliyo ya kwanza humu ulimwenguni, kwa nini mwataka tena kupewa miiko kama wenye kuukalia ulimwengu huu?[#Gal. 4:3,9.]

²¹Mwaambiwa: Usivishike! wala: Usivionje! wala: Usiviguse hivi na hivi!

²²Navyo vyote vimewekwa, vitumike, kisha vioze. Kwa hiyo yale maagizo na mafundisho ni ya kimtu tu;[#Yes. 29:13; Mat. 15:9.]

²³kweli watu husema: Ni ya werevu wa kweli, wakiyachagua matumizi yao ya Mungu na unyenyekevu wao, tena wakiinyima miili yao yaipasayo, lakini yote ni kazi za bure tu, maana zikiisha, huzitimiza tamaa zote za miili.[#Rom. 13:14; 1 Tim. 4:3.]