Vitu vyote vya huku nchini ni vya bure.

²Mpiga mbiu asema: Yote ni ya bure kabisa, kweli yote ni ya bure kabisa, yote pia ni ya bure.

³Mtu hupata nini kwa masumbuko yake yote, anayojisumbua chini ya jua?[#Mbiu. 2:22.]

⁴Kizazi kimoja kikienda zake, kingine huja, lakini nchi hukaa kale na kale.[#Sh. 90:3.]

⁵Jua hucha, tena huchwa, kisha hupakimbilia pake pa macheo yake.

⁶Upepo ukienda kusini, kisha hugeuka kwenda kaskazini; ndivyo, upepo unavyojiendea na kugeukageuka. Kwa kugeukageuka kwake upepo hurudia hapo, ulipotokea.

⁷Mito yote huenda baharini, lakini bahari haijai; papo hapo, mito inaposhika njia zao, ndipo, inapojiendea na kuishika njia ileile.

⁸Mambo yote huchokesha, mtu asiweze kuyasema yote, wala macho hayashibi kwa kuyatazama, wala masikio hayajai kwa kuyasikia.[#Sh. 90:10.]

⁹Yaliyokuwako ndiyo yatakayokuwako tena, nayo yaliyofanywa ndiyo yatakayofanywa tena; hakuna jipya litakalotokea chini ya jua.

¹⁰Kama litatokea, watu wanalotaka kulisema kwamba: Hili ni jipya kweli, limekwisha kuwako siku za kale kabisa zilizokuwako mbele yetu.

¹¹Ni hivyo tu, wa kwanza hawakumbukwi, vivyo nao wa nyuma watakaokuwako hawatakumbukwa kwao watakaokuwako nyuma yao.

¹²Mimi Mpiga mbiu nilikuwa mfalme wa Isiraeli huko Yerusalemu.[#Mbiu. 1:1.]

¹³Nikajipa moyo, kuyatafuta na kuyapeleleza kwa werevu wa kweli yote pia yanayofanyika chini ya mbingu; ni sumbuko baya, Mungu alilowapa wana wa Adamu kulisumbukia.

¹⁴Nikayatazama yote yanayofanywa chini ya jua, nikayaona yote kuwa ya bure, kuwa kuukimbilia upepo.

¹⁵Yapotokayo hayanyosheki, wala yasiyokuwako hayahesabiki.

¹⁶Naliwaza moyoni mwangu kwamba: Mimi nimejipatia werevu wa kweli mwingi, nikauongeza kuwa mwingi zaidi kuupita wa watu wote waliokuwako mbele yangu Yerusalemu, kweli moyo wangu ulipata werevu wa kweli na juzi mwingi.[#Mbiu. 7:13.]

¹⁷Lakini nilipojipa moyo kujua, jinsi werevu wa kweli ulivyo, tena kujua, jinsi upumbavu na ujinga ulivyo, ndipo, nilipojua, ya kuwa hayo nayo ni kuukimbilia upepo.[#Mbiu. 2:12; 7:25.]

¹⁸Kwani werevu mwingi ulipo, yapo nayo masikitiko mengi, naye aongoezaye ujuzi huongeza nayo maumivu.