Wema na wabaya hupatwa na mambo yale yale mamoja.

¹Hayo yote nikayaweka moyoni mwangu na kuyachunguza haya yote, ya kuwa waongofu na werevu wa kweli pamoja na kazi zao zote wamo mkononi mwa Mungu. Hakuna mtu ajuaye, kama ni kupenda au kama ni kuchukia kumpasako, yote pia yako yamefichika bado mbele yake.

²Kwani yote huwapata wote sawasawa, jambo lao la mwisho ni lilo hilo moja, humpata mwongofu naye asiyemcha Mungu, vilevile mwema atakataye naye mchafu, atambikaye naye asiyetambika, mwema na mkosaji, aapaye naye aogopaye kuapa;[#Mbiu. 2:14; Iy. 9:22.]

³yote yanayofanywa chini ya mbingu yako na ubaya huu, jambo la mwisho likiwa lilelile moja kwao wote; tena ni huu, mioyo ya wana wa Adamu ikijaa mabaya, mumo humo mioyoni mwao mkikaa upumbavu siku za maisha yao, kisha huenda kwao wafu, ndio mwisho wao.[#Mbiu. 8:11.]

⁴Mtu akingali mwenye bia nao wote walio hai hutegemeka, kwani mbwa aliye hai hupata mema kuliko simba aliyekufa.

⁵Kwani walio hai hujua, ya kuwa watakufa, lakini wafu hawajui cho chote, tena hakuna mshahara wo wote, watakaoupata, kwani hawakumbukwi tena, wamekwisha kusahauliwa.

⁶Nao upendo wao na uchukivu wao na wivu wao ulitoweka kale, kale na kale hawana fungu lo lote tena katika mambo yote yanayofanywa chini ya jua.

Vya kula tulivyopewa.

⁷Jiendee, ule chakula chako kwa kufurahi, kanywe mvinyo yako kwa kuwa na moyo mwema! Kwani kazi zako zilimpendeza Mungu tangu kale.[#Mbiu. 5:18.]

⁸Kavae nguo nyeupe siku zote, nacho kichwa chako kisikose mafuta!

⁹Kazifurahie siku za kuwapo pamoja na mkeo, umpendaye, siku zote za maisha yako zilizo za bure, Mungu alizokupa chini ya jua; kavifanye siku zako zote zilizo za bure! Kwani haya ndiyo, unayojipatia huku nchini kwa masumbuko yako, unayoyasumbuka chini ya jua.[#Fano. 5:18.]

¹⁰Yote, mkono wako utakayoyaona ya kuyafanya kwa nguvu yako, yafanye! Kwani kuzimuni, unakokwenda wewe, hakuna matendo wala mawazo wala ujuzi wala werevu wa kweli.

¹¹Nilipoyatazama tena yaliyoko chini ya jua, nikaona, ya kuwa sio wepesi washindao katika mashindano ya mbio, wala sio mafundi wa vita washindao vitani, wala sio werevu wa kweli wapatao vilaji, wala sio watambuzi wapatao mali, wala sio wajuzi wapendezao, kwani wao wote kila mmoja wao huwa na siku zake na mambo yake yatakayompata.[#Yer. 10:23.]

¹²Mtu hazijui siku zake zimfaazo, huwa kama samaki wanaokamatwa katika wavu mbaya au kama videge wanaonaswa tanzini; vivyo hivyo nao wana wa Adamu hunaswa, siku zao zikiwa mbaya, nayo mabaya yakiwaangukia na kuwastusha.

Werevu wa kweli hushinda.

¹³Nilipoutazama tena werevu wa kweli ulioko chini ya jua, nikauona kuwa mkubwa.

¹⁴Kulikuwa na mji mdogo, nao waume waliomo walikuwa wachache; kisha mfalme akaujia, akauzinga, akaujengea maboma makubwa.

¹⁵Basi, mle mjini akaonekana maskini mwenye werevu wa kweli, akauponya ule mji kwa huo werevu wake uliokuwa wa kweli; lakini baadaye hakuwako mtu aliyemkumbuka huyo maskini.

¹⁶Nikasema: Werevu wa kweli hufaa kuliko nguvu, lakini werevu wa maskini, ijapo uwe wa kweli, hubezwa, nayo maneno yake hayasikilizwi.

¹⁷Maneno ya werevu wa kweli wakiyasikiliza na kutulia hufaa kuliko makelele, mtawalaji anayoyapiga kwa wajinga.

¹⁸Werevu wa kweli hufaa kuliko vyombo vya vita, naye mkosaji mmoja huangamiza mema mengi.