Ezekieli anauona utukufu wa Mungu.

¹Nilipotazama penye ukingo uliokuwa juu ya vichwa vyao Makerubi nikaona kilichokuwa kama kito cha Safiro, kikafanana sura yake kuwa kama kiti cha kifalme, kikaonekana kuwa juu yao.[#Ez. 1:22,26.]

²Akamwambia yule mtu aliyevaa vazi la ukonge, akasema: Ingia katikati ya magurudumu yaliyo chini ya Makerubi, uvijaze viganja vyako makaa ya moto yaliyoko katikati ya Makerubi, kisha yamwagie mji huu! Ndipo, alipopaingia machoni pangu.[#Ez. 9:2; Ufu. 8:5.]

³Makerubi yalikuwa yamesimama kuumeni penye hiyo Nyumba, yule mtu alipoingia, nalo lile wingu lilikuwa limeujaza ua wa ndani.

⁴Utukufu wa Bwana ukaondoka kwa Makerubi kwenda penye kizingiti cha kuiingilia hiyo Nyumba, hiyo Nyumba ikajazwa na lile wingu, ua nao ukajaa ung'avu wa utukufu wa Bwana.[#Ez. 1:4-28; Yes. 6:4.]

⁵Uvumi wa mabawa ya Makerubi ukasikilika mpaka kwenye ua wa nje, ukawa kama sauti ya Mwenyezi Mungu, akisema.

⁶Ikawa, alipomwagiza yule mtu aliyevaa vazi la ukonge kwamba: Chukua moto penye magurudumu katikati ya Makerubi, naye alipoingia na kusimama kando ya gurudumu,

⁷ndipo, Kerubi alipokunjua mkono wake kwenye Makerubi na kuupeleka penye moto uliokuwa katikati ya Makerubi, akautwaa, akampa mwenye vazi la ukonge na kuutia katika viganja vyake, naye akauchukua, akatoka.

⁸Kisha kukaoneka kwa Makerubi chini ya mabawa yao mfano wa mkono wa mtu.

⁹Nilipotazama mara nikaona magurudumu manne kando ya Makerubi, gurudumu moja kando ya Kerubi mmoja, vivyo hivyo gurudumu moja kando ya kila Kerubi mmoja; nilipoyatazama hayo nagurudumu, jinsi yalivyokuwa, yalikuwa kama kito cha Tarsisi.[#Ez. 1:15-16.]

¹⁰Yote manne mfano wao ulionekana kuwa mmoja, ulikuwa kama gurudumu moja lililomo ndani ya gurudumu lenziwe.

¹¹Yalipokwenda yalikwenda pande zote nne pasipo kugeuka katika mwendo wao, kwani mahali hapo, kichwa kilipoelekea, ndipo, walipopafuata pasipo kugeuka katika mwendo wao.

¹²Nayo miili yao na migongo yao na mikono yao na mabawa yao, nayo magurudumu yalikuwa yamejaa macho po pote, penye magurudumu yote manne vilikuwa hivyo.

¹³Hayo magurudumu yakaitwa masikioni pangu Kimbunga.

¹⁴Kila Kerubi mmoja alikuwa na nyuso nne: Uso mmoja ulikuwa wa Kerubi, uso wa pili ulikuwa wa mtu, wa tatu ulikuwa wa simba, wa nne ulikuwa wa tai.

¹⁵Kisha Makerubi wakaenda juu. Hawa ndio nyama, niliyemwona kwenye mto wa Kebari.

¹⁶Makerubi walipokwenda, magurudumu yakaenda kando yao; tena Makerubi walipoyakunjua mabawa yao, waondoke katika nchi kwenda juu, magurudumu nayo hayakugeuka kuondoka kando yao.

¹⁷Waliposimama, nayo yakasimama; walipoinuka kwenda juu, nayo yakajiinua kwenda juu pamoja nao, kwani roho ya huyo nyama ilikuwa namo katika hayo magurudumu.

¹⁸Kisha utukufu wa Bwana ukatoka kwenye kizingiti cha kuiingilia hiyo Nyumba, ukasimama juu ya Makerubi.

¹⁹Makerubi wakayakunjua mabawa yao, wakaondoka katika nchi kwenda juu machoni pangu; ndivyo, walivyotoka hapo, hayo magurudumu hayo yakawa kandokando yao; wakasimama tena kwenye lango la Nyumba ya Bwana lielekealo maawioni kwa jua, nao utukufu wa Mungu wa Isiraeli ulikuwa juu yao.[#Ez. 10:1.]

²⁰Huyo ndiye nyama, niliyemwona chini yake Mungu wa Isiraeli kwenye mto wa Kebari, nikajua, ya kuwa hao ndio Makerubi.

²¹Kila mmoja wao alikuwa na nyuso nne, tena kila mmoja alikuwa na mabawa manne, tena iliyofanana na mikono ya watu ilikuwa chini ya mabawa yao.

²²Nazo nyuso zao hao zilikuwa zimefanana na zile nyuso, nilizoziona kwenye mto wa Kebari; ndivyo, zilivyoonekana kuwa, nao wenyewe walikuwa hivyo. Kila mmoja wakaenda na kufuata hapo, uso wake ulipoelekea.