Mungu anampatilizia kila mtu makosa yake.

¹Neno la Bwana likanijia la kwamba:[#Yer. 31:29.]

²Ninyi hulitumiaje katika nchi ya Isiraeli fumbo kama hilo la kwamba: Baba walipokula zabibu bichi, ndipo, wana alipokufa ganzi la meno.

³Ndivyo, asemavyo Bwana Mungu: Hivyo, nilivyo Mwenye uzima, hatakuwako tena kwenu atakayelitumia fumbo hili kwao Waisiraeli.

⁴Tazameni: Roho zote za watu ni zangu, kama ni roho za baba, au kama ni roho za wana, zote ni zangu; roho ya mtu atakayekosa ndiyo itakayokufa.

⁵Mtu akiwa mwongofu, afanye yaliyo sawa yaongokayo,

⁶asile vilimani juu, wala asiyatazamie kwa macho yake magogo ya kutambikia ya mlango wa Isiraeli, wala asimchafue mke wa mwenziwe, wala asimkaribie mwanamke mwenye siku zake,[#3 Mose 18:19-20.]

⁷wala asimtese mtu, ila aliyemkopa amrudishie aliyompa yeye ya kumwekea, asinyang'anye isiyo mali yake, wenye njaa awagawie vyakula vyake, wenye uchi awavike nguo,[#5 Mose 24:10-13; Sh. 15:3.]

⁸asikopeshee kupata faida, wala asichukue nyongeza za kupunja, mkono wake auzuie, usipotoe, aamue kwa kweli, mtu akigombana na mwenziwe,[#2 Mose 22:25.]

⁹ayafuate maongozi yangu na kuyashika mashauri yangu na kufanya yaliyo kweli, basi, mtu aliye hivyo ni mwongofu, naye atapata uzima wa kweli; ndivyo, asemavyo Bwana Mungu.

¹⁰Mtu kama huyo akizaa mwana aliye mkorofi, amwage damu, afanye moja tu la mabaya yale,

¹¹yeye baba yake asiyoyafanya yote, kama anakula vilimani juu, au kama anamchafua mke wa mwenziwe,

¹²au kama anawatesa wanyonge na wakiwa, au kama ananyang'anya mali yake, au kama harudishi aliyopewa ya kumwekea mtu, au kama anayatazamia kwa macho yake magogo ya kutambikia, ayafanye yachukizayo,

¹³au kama anakopeshea kupata faida, au kama anachukua nyongeza za kupunja, basi, yeye atapata kabisa uzima wa kweli, ila atakufa kweli kwa kuyafanya hayo machukizo yote akitwikwa manza zake za damu, alizozikora.

¹⁴Huyu akizaa mwana, naye akiyaona makosa yote, baba yake aliyoyatenda, lakini akiyaona tu, asiyafanye yaliyo kama hayo,

¹⁵asile vilimani juu, wala asiyatazamie kwa macho yake magogo ya kutambikia ya mlango wa Isiraeli, wala asimchafue mke wa mwenziwe,

¹⁶wala asimtese mtu, wala asimtoze mtu mali za kumwekea, wala asinyang'anye isiyo mali yake, ila wenye njaa awagawie vyakula vyake, wenye uchi awavike nguo,

¹⁷auzuie mkono wake, usipotoe mnyonge, wala usichukue faida wala nyongeza za kupunja, ayafanye mashauri yangu na kuyafuata maongozi yangu, basi aliye hivyo hata kufa kwa ajili ya manza, baba yake alizozikora, ila atapata uzima wa kweli.

¹⁸Lakini baba yake aliyekorofisha kwa ukorofi wake, aliyemnyang'anya ndugu mali isiyo yake, aliyefanya katikati ya wenziwe wa ukoo yasiyo mema, mtamwona, yeye akifa kwa ajili ya hizo manza, alizozikora.

¹⁹Mkiuliza: Sababu gani mwana hatwikwi naye manza za baba yake? ni hivyo: mwana alifanya yaliyo sawa yaongokayo, akayashika maongozi yangu yote na kuyafanya, kwa hiyo atapata uzima wa kweli.

²⁰Roho ya mtu atakayekosa ndiyo itakayokufa, lakini mwana hatatikwa manza za baba yake, wala baba hatatwikwa manza za mwanawe, nao wongofu wake mwongofu utamkalia, nao ubezi wake asiyemcha Mungu utamkalia.[#2 Mose 20:5; 4 Mose 26:11.]

Mungu hupendezwa, wasiomcha wakijuta.

²¹Lakini asiyemcha Mungu akirudi na kuyaacha makosa yake yote, aliyoyafanya, ayashike maongozi yangu yote na kufanya yaliyo sawa yaongokayo, basi, atapata uzima wa kweli, hatakufa.

²²Nayo mapotovu yake yote, aliyoyafanya, hayatakumbukwa, ila atapata uzima kwa wongofu wake, alioufanya.[#Yes. 43:25; 44:22.]

²³Ndivyo, asemavyo Bwana Mungu: Mnaniwaziaje kwamba: Nitapendezwa, asiyenicha akifa? Je? Sitapendezwa, akirudi na kuziacha njia zake, apate uzima?[#Ez. 18:32; 33:11.]

²⁴Lakini mwongofu akigeuka na kuuacha wongofu wake, afanye mapotovu, ayafanye hayo machukizo yote, wasiomcha Mungu wanayoyafanya, je? Atapata uzima? Sivyo, wongofu wote, alioufanya, hautakumbukwa, kwa kuwa amevunja maagano, naye kwa ajili ya makosa yake, aliyoyakosa, atakufa.[#Ez. 3:20.]

²⁵Mkisema: Kumbe njia ya Bwana hainyoki! Sikieni, ninyi wa mlango wa Isiraeli: Je? Njia yangu hainyoki? Sizo njia zenu zisizonyoka?[#Ez. 33:17-20.]

²⁶Mwongofu akirudi na kuuacha wongofu wake, afanya maovu, atakufa kwa ajili yao, kweli, kwa ajili ya hayo maovu, aliyoyafanya, atakufa.

²⁷Tena asiyemcha Mungu akirudi na kumcha Mungu afanye yaliyo sawa yaongokayo, huyu ataipatia roho yake uzima.

²⁸Akipata kuona, akirudi na kuyaacha mapotovu yake yote, aliyoyafanya, atapata uzima wa kweli, hatakfufa.

²⁹Wao wa mlango wa Isiraeli wakisema: Njia ya Bwana hainyoki, inakuwaje, njia zangu zisiponyoka? Ninyi wa mlango wa Isiraeli, sizo njia zenu zisizonyoka?

³⁰Kwa hiyo nitawapatiliza ninyi wa mlango wa Isiraeli kila mtu, kama njia zakezilivyo; ndivyo, asemavyo Bwana Mungu. Rudini na kujigeuza na kuyaacha mapotovu yenu yote, yasiwawie tena makwazo ya kuwakosesha![#Ez. 33:11; Yes. 55:7.]

³¹Yatupeni mapotovu yenu yote mliyoyafanya ya kuwapotoa wenzenu, yawatoke ninyi! Kisha jipatieni mioyo mipya! na roho mpya! Mbona mnataka kufa, ninyi wa mlango wa Isiraeli?[#Ez. 36:26.]

³²Kweli sipendezwi na kufa kwake mwenye kufa; ndivyo asemavyo Bwana Mungu. Kwa hiyo jigeuzeni, mpate uzima![#Ez. 18:23.]