Kuuombolezea mji wa Tiro.

¹Neno la Bwana likanijia la kwamba:[#Yes. 23.]

²Wewe mwana wa mtu, utungie mji wa Tiro ombolezo![#Hos. 9:13.]

³Uambie Tiro: Wewe ulikaa paingiapo bahari, ukachuuza katika nchi nyingi za baharini; hivi ndivyo, Bwana Mungu anavyosema: Wewe Tiro ulisema: Mimi nimetimiza uzuri wote.

⁴Kweli mipaka yako imo baharini ndani, nao waliokujenga walikutengeneza kuwa chombo chenye uzuri wote.

⁵Walikujenga pande zote mbili kwa mbao za mivinje ya Seniri, wakachukua mwangati huko Libanoni wa kukutengenezea mlingoti.[#5 Mose 3:8-9.]

⁶Mivule ya Basani waliitumia ya kukufanyizia makasia, vyumba vyako walivifanya kwa mbao za misagawi zilizopangiliwa kwa meno ya tembo, zilizotoka visiwani kwa Wakiti.

⁷Nguo za rangi zilizotoka Misri zilikuwa tanga lako zikawa hata bendera yako. Nguo za kifalme nyeusi na nyekundu zilizotokavisiwa vya Elisa zilikuwa chandalua chako cha kujifunika juu.[#1 Mose 10:4.]

⁸Waliokaa Sidoni na Arwadi walikuwa mabaharia wako, nao werevu wa kweli wa kwako, Tiro, ndio waliokuwa waelekeza chombo.

⁹Wazee wa Gebali na mafundi wake walikuwa kwako wa kuziziba nyufa zako. Merikebu zote za baharini zikafika kwako na mabaharia wao, wakauziana na wewe.[#1 Fal. 5:18.]

¹⁰Wapersia na Waludi na Waputi walikuwamo katika vikosi vyako vya askari wa kukupigia vita vyako; walipotundika ngao na kofia kwako waliuongea utukufu wako.

¹¹Wana wa Arwadi na askari wako walizunguka penye kuta zako za boma, tena Wagamadi walikuwa katika minara yako; walipozitundika ngao zao po pote katika kuta zako, waliutimiza uzuri wako.

¹²Watarsisi wakaja kuchuuza kwako kwa ajili ya wingi wa vitu vya kwako, wakazinunua bidhaa zako kwa fedha na kwa vyuma na kwa bati na kwa risasi.

¹³Wagriki na Watubali na Wameseki walikuwa wachuuzi wako, wakatoa watumwa na vyombo vya shaba, wapate vitu vya kwako.[#Ez. 38:2.]

¹⁴Walio wa mlango wa Togarma walitoa farasi na farasi wa vita na nyumbu, wapate bidhaa zako.

¹⁵Wana wa Dedani walikuwa wachuuzi wako, watu wa nchi nyingi za baharini wakaja kuchuuza mikononi mwako: walikuletea meno ya tembo na mipingo kuwa malipo yao.

¹⁶Washami nao wakaja kuchuuza kwako kwa ajili ya wingi wa kazi zako, wakazinunua bidhaa zako kwa vito vyekundu na kwa nguo za kifalme na kwa nguo za rangi na kwa bafta nzuri na kwa marijani na kwa vijiwe vya yaspi.

¹⁷Wayuda nao wa nchi ya Isiraeli walikuwa wachuuzi wako, wakanunua vitu vya kwako kwa ngano za Miniti na kwa vikate vitamu na kwa asali na kwa mafuta na kwa uvumba.

¹⁸Wadamasko wakaja kuchuuza kwako kwa ajili ya wingi wa kazi zako na kwa ajili ya wingi wa mali, wakaleta mvinyo za Helboni na manyoya meupe sana ya kondoo.

¹⁹Wawedani na Wayawani walijipatia bidhaa zako na kuleta toka Uzali vyuma vilivyofuliwa vema, hata dalasini na vichiri vilikuwa malipo yao ya kukulipa.

²⁰Wadedani walikuwa wachuuzi wako, wakanunua vyako kwa nguo nzuri za kuweka chini ya matandiko.

²¹Waarabu na wakuu wote wa Kedari nao wakaja kuchuuza mikononi mwako, wakanunua kwako kwa wana kondoo na kwa madume ya kondoo na kwa mbuzi.[#1 Mose 25:13.]

²²Wachuuzi wa Saba na wa Raama nao walikuwa wachuuzi wako, wakazinunua bidhaa zako kwa manukato mazuri mno kupita yote mengine na kwa vito vya namna zote vyenye kiasi kikubwa na kwa dhahabu.

²³Waharani na Wakane na Waedeni, nao wachuuzi wa Saba na Waasuri na Wakilmadi walikuwa wachuuzi wako.

²⁴Hao walifanya biashara na wewe wakiuza nguo za urembo kama mablanketi makubwa ya kifalme yenye rangi nzuri na mazulia yenye machorochoro yaliyofungwa vema kwa kamba katika sanduku za miangati, wakanunua vitu vilivyouzwa kwako.

²⁵Merikebu za Tarsisi zilikuwa kama wapangazi wako wa kupeleka vitu vya kwako, ukafurikiwa, ukatukuka sana huko ndani baharini.

²⁶Wavutao makasia wakikupeleka kwenye vilindi vya maji, lakini upepo utokao maawioni kwa jua utakuvunja baharini kati.

²⁷Ndipo, mali zako na bidhaa zako na vitu vya kwako na mabaharia wako na waelekeza chombo nao wazibao nyufa zako nao wachuuzi waliovichuuzia vya kwako nao wote, ulio nao wa kukupigia vita vyako, pamoja na mkutano wote wa watu wako waliomo mwako watakapoanguka kule baharini kati; itakuwa siku ile, utakapoangamizwa.

²⁸Kwa sauti za makelele ya waelekeza vyombo vyako vitatetemeka viunga vyako.

²⁹Ndipo, wote wavutao makasia watakaposhuka na kutoka merikebuni mwao mabaharia nao wote waelekezao vyombo baharini wasimame pwani,

³⁰wakupalizie sauti zao na kukulilia kwa uchungu; watajitupia mavumbi vichwani pao na kujigaagaza majivuni.

³¹Watajikata nywele kwa ajili yako, vichwa viwe vyenye vipara, kisha watajifunga magunia, wakulilie kwa uchungu wa roho zao na kukuombolezea kwa kuliwa na uchungu.

³²Watakapokulilia watakutungia ombolezo, wakuombolezee kwamba: Pako mahali gani panaponyamaza kimya kama Tiro ulioko baharini kati?

³³Bidhaa zako zilipotoka baharini ulishibisha makabila mengi ya watu, kwa wingi wa mali zako na wa vitu vya kwako uliwapatia wafalme wa nchi mali nyingi.

³⁴Lakini sasa umevunjwa, utoweke baharini kwa kutoswa vilindini penye maji mengi, navyo vitu vya kwako vya kuuza nao mkutano wa watu wako waliokuwamo mwako wamezama.

³⁵Kwa hiyo wote wakaao kwenye bahari wanakustukia wafalme wao wakapigwa na bumbuazi, nazo nyuso zao zikatetemeka.

³⁶Wachuuzi walioko kwenye makabila ya watu hukuzomea, kwa kuwa umegunduliwa na maangamizo, wala hutakuwapo tena kale na kale.[#Ez. 28:19.]