Mfano wa maumivu na wa makosefu yatakayoupata Yerusalemu.

¹Wewe mwana wa mtu jipatie tofali, uliweke mbele yako! Kisha chora humo mji wa Yerusalemu!

²Kisha uuzungushie boma! Hilo boma ulijengee minara, ulizungushie hata ukingo wa mchanga! Tena uupigie po pote makambi ya askari, uweke nayo magogo ya kuvunjia boma!

³Kisha jipatie bati la chuma, kalisimamishe kuwa ukuta wa chuma wa kukutenga wewe nao mji! Kisha uuelekezee uso wako, kwamba uwe ukisongwa, nawe uwe mwenye kuusonga! Hiki ndicho kielekezo, mlango wa Isiraeli utakachokipata.

⁴Tena wewe ulalie ubavu wako wa kushoto, ukiisha ziweke manza za mlango wa Isiraeli juu yake; siku, utakazoulalia, zitahesabiwa kuwa siku za kuzichukua manza zao.

⁵Nami nitakupa miaka ya manza zao kuwa hesabu ya hizo siku, zitakuwa 390; ndizo, utakazozichukua manza za mlango wa Isiraeli.

⁶Utakapozimaliza hizo siku, uulalie ubavu wako wa kuume mara ya pili, uzichukue manza za mlango wa Yuda siku 40; kwa kila mwaka mmoja nimekupa siku moja.

⁷Tena uso wako utauelekezea Yerualemu uliosongwa, hata mkono wako, ukiisha kuuondoa nguo. Kisha sharti uufumbulie huo mji yatakayokuwa.

⁸Tena utaniona nikikufunga kwa kamba, usiweze kugeuka na kuulalia ubavu wa pili, mpaka uzimalize siku za kusongwa kwako.

⁹Tena jipatie ngano na mawele na maharagwe na choroko na mtama mweupe na mwekundu, uzitie zote katika chombo kimoja! Ndizo ujitengenezee mikate, kama hesabu ilivyo ya siku, utakazoulalia ubavu wako; siku 390 utaila hio mikate.[#Ez. 4:5.]

¹⁰Hicho chakula chako, utakachokila, utapimiwa kwa mizani kila siku ratli moja kaso robo muda kwa muda.

¹¹Maji nayo utakunywa kwa kupimiwa, nusu kibaba kila siku moja, nayo utayanywa muda kwa muda.

¹²Hiyo mikate utaila, ikitengenezwa kama mikate ya mofa ya mawele, nawe sharti uichome kwa mavi ya choo cha mtu machoni pao.

¹³Bwana akasema: Kwenye mataifa, nitakakowatupa, wana wa Isiraeli, watavila vyakula vyao, vikiwa vichafu vivyo hivyo.

¹⁴Nikasema: E Bwana Mungu, tazama, roho yangu haijatiwa uchafu; tangu hapo, nilipokuwa mtoto, mpaka sasa sijala kibudu wala makombo ya nyama wa porini, wala yenye uvundo hayajaingia kinywani mwangu.[#Tume. 10:14.]

¹⁵Akaniambia: Tazama, nimekupa mavi ya ng'ombe penye mavi ya mtu, ndiyo utumie ya kuchomea mikate yako.

¹⁶Akaniambia: Mwana wa mtu, utaniona, nikilivunja shikizo la chakula mle Yerusalemu, wale vyakula vyao kwa kupimiwa na mizani na kwa kuvihangaikia; nayo maji watakunywa kwa kupimiwa na kwa kupigwa na bumbuazi,[#Ez. 5:16.]

¹⁷kwani watakosa vyakula na maji, wapigwe na bumbuazi wote pamoja, wakitoweshwa kwa ajili ya manza zao walizozikora.