Wongofu hupatikana kwa kumtegemea Mungu.

¹Enyi Wagalatia, hamna akili? Ni uganga gani uliowashinda, msiyatii yaliyo ya kweli? Mmeonyeshwa Yesu Kristo, mmtazame kwa mambo yenu, alivyowambwa msalabani.

²Neno hili tu nataka kuambiwa nanyi: Mmempokea Roho kwa kuyafanya Maonyo au kwa kuyategemea, mliyoyasikia?

³Imekuwaje, akili zikiwapotea hivyo? Mliyoyaanza Rohoni, mwataka kuyamaliza sasa miilini?

⁴Yale yote mmeteswa bure? Kweli siyo ya bure![#Gal. 6:12.]

⁵Ilikuwaje? Aliyewapa Roho na kufanya yenye nguvu kwenu aliyafanyia kwamba: Mmeyafanya Maonyo? au kwamba: Mmeyategemea, mliyoyasikia?

⁶Ndivyo, yalivyokuwa nayo ya Aburahamu:

Akamtegemea Mungu,

kwa hiyo akawaziwa kuwa mwenye wongofu.

⁷Kwa hiyo yatambueni: wenye kumtegemea Mungu hao ndio wana wa Aburahamu!

⁸Lakini Maandiko yaliona kale, ya kuwa Mungu huwapatia wamizimu wongofu, wakiwa wanamtegemea. Kwa hiyo alimpigia Aburahamu kale mbiu ile njema:

Mwako ndimo, mataifa yote yatakamobarikiwa.

⁹Kwa hiyo wenye kumtegemea Mungu hubarikiwa pamoja na Aburahamu aliyekuwa mtegemevu.[#Rom. 4:16.]

¹⁰Kwani wote walio wenye kuyafanya Maonyo hawajatoka bado kwenye kuapizwa. Kwani imeandikwa:

Na awe ameapizwa kila mtu asiyeandamana nayo yote

yaliyoandikwa katika chuo cha Maonyo, ayafanye!

¹¹Lakini neno hili ni waziwazi, ya kuwa hakuna mtu atakayepata wongofu kwake Mungu, kwa kuyafanya Maonyo, kwani:

Mwongofu atapata uzima kwa kumtegemea Mungu.

¹²Lakini Maonyo hayakutoka kwenye kumtegemea Mungu, ila:

Atakayeyafanya atapata uzima kwa njia hiyo.

¹³Kristo alitukomboa, tusiapizwe na Maonyo, alipoapizwa kwa ajili yetu, kwani imeandikwa:

Kila aliyetundikwa mtini ameapizwa.

¹⁴Hivyo mbaraka yake Aburahamu imewafikia wamizimu hapo, Yesu Kristo alipotokea, nasi tukipokee kiagio cha Roho tukiwa twamtegemea.

Kiagio kimeyatangulia Maonyo.

¹⁵Ndugu, niseme kimtu: Agano la mtu aliyekufa hakuna alitanguaye, likiisha kusimikwa, wala aliongezaye neno.

¹⁶Lakini Aburahamu alikuwa amepewa viagio vile yeye nao uzao wake. Hasemi: Wazao, kama ni wengi, ila kama ni mmoja, asema: Nao uzao wako, nao huo ndiye Kristo.[#1 Mose 22:18; 26:4; Tume. 3:25.]

¹⁷Kwa hiyo nasema: Agano limetangulia kusimikwa na Mungu, Maonyo yakatokea nyuma, miaka 430 ilipopita; hayawezi kulitangua agano, wala hayawezi kukikomesha nacho kiagio.[#2 Mose 12:40.]

¹⁸Kwani huo urithi kama ungalipatikana kwa kuyafanya Maonyo usingepatikana tena kwa kupewa kiagio. Lakini Mungu alimgawia Aburahamu huohuo alipompa kiagio.

Kiagio cha wamtegemeao Kristo.

¹⁹Basi, Maonyo yako na maana gani? Yalitolewa siku za kati kwa ajili ya mapitano, mpaka atakapokuja yule mzao aliye mwenye kiagio. Nayo Maonyo hapo, yalipotolewa, yalitumikiwa na malaika, yakawekwa mkononi mwa mpatanishaji.[#5 Mose 5:25-27; Tume. 7:38,53; Rom. 5:20.]

²⁰Lakini mpatanishaji siye wa mmoja tu, lakini Mungu ni mmoja.

²¹Tena je? Maonyo huvikataa viagio vya Mungu? La, sivyo! Kwani kama yangekuwako Maonyo yaliyotolewa kuwa yenye nguvu ya kuwapa watu uzima, wongofu ungepatikana kweli kwa kuyafanya maonyo.[#Rom. 8:2-4.]

²²Lakini Maandiko yamewafunga wote pamoja kuwa watumwa wa makosa kwamba: Wote watakaomtegemea wapewe kile kiagio kitokacho kwenye kumtegemea Yesu Kristo.[#Rom. 3:9-20; 11:32.]

Kuongozwa na Maonyo.

²³*Lakini tegemeo lilipokuwa halijatokea bado, tulilindwa, tuyatii Maonyo, tukawa tumefungwa pamoja, tungoje, tegemeo litakapofunuliwa.[#Gal. 4:3.]

²⁴Hivyo ndivyo, Maonyo yalivyotuongoza kama watoto, yakatupeleka kwake Kristo, tupate wongofu kwa kumtegemea.

²⁵Lakini tangu hapo, tegemeo lilipotokea, hatushikwi tena na mwongozi.[#Rom. 10:4.]

²⁶Kwani ninyi nyote m wana wa Mungu kwa kumtegemea mkiwa wake Kristo Yesu.[#Yoh. 1:12; Rom. 8:17.]

²⁷Maana ninyi nyote mliobatiziwa Kristo mmemvaa Kristo.[#Rom. 6:3; 13:14.]

²⁸Kwake yeye hakuna tena Myuda na Mgriki, wala mtumwa na mwungwana, wala mume na mke, kwani ninyi nyote m mmoja kwa kuwa wake Kristo Yesu.[#Rom. 10:12; 1 Kor. 12:13.]

²⁹Nanyi mkiwa wake Kristo, basi, mmekuwa hata uzao wake Aburahamu, tena m warithi kwa kiagio, mlichowekewa.*[#Gal. 3:7; Rom. 9:7.]