¹Ndugu, mtu akipatikana ameanguka, ninyi mlio wa Kiroho, mwonyeni Kiroho kwa upole, ashupae tena! Jiangalie mwenyewe, usijaribiwe nawe![#Mat. 18:15; Yak. 5:19.]

²Mchukuliane mizigo! Hivyo mtayatimiza Maonyo yake Kristo.[#2 Kor. 11:29.]

³Kwani mtu akijiwazia kuwa mwenye nguvu, tena siye, hujidanganya mwenyewe.

⁴Lakini kila mtu azitazame kazi zake mwenyewe, ziwe nzuri! Ndipo, atakapojivuma moyoni tu, asitolee wengine majivuno yake.[#2 Kor. 13:5.]

⁵Kwani kila mtu atauchukua mzigo wake mwenyewe.[#Rom. 14:12.]

Tutavuna, tuliyoyapanda.

⁶Lakini mwenye kufundishwa lile Neno na amgawie mfunzi mema yote, aliyo nayo![#1 Kor. 9:14.]

⁷Msidanganyike, Mungu habezwi! Kwani mtu aliyoyapanda, ndiyo, atakayoyavuna.

⁸Maana mwenye kupanda mwilini mwake atavuna humo mwilini kuoza. Lakini mwenye kupanda Rohoni atavuna humo Rohoni uzima wa kale na kale.[#Rom. 8:13.]

⁹Tusichoke kuyafanya yaliyo mazuri, kwani siku zake zitakapotimia, tutavuna pasipo kukoma.[#2 Kor. 4:1; 2 Tes. 3:13.]

¹⁰Basi, kwa sababu tuko nchini bado, wote na tuwatendee mema, lakini kuliko wengine wenzetu wa kumtegemea Bwana!*[#2 Petr. 1:7.]

Tukuzo la msalaba wake Yesu Kristo.

¹¹Yatazameni haya maandiko yote, niliyowaandikia kwa mkono wangu mimi!

¹²Wote wanaotaka kupendeleza miili, hao huwashurutisha kutahiriwa; tena hapana neno jingine, ni kwamba tu: Wasifukuzwe kwa ajili ya msalaba wake Kristo.[#Gal. 5:11; Fil. 3:18.]

¹³Kwani nao wenyewe waliotahiriwa hawayashiki Maonyo, ila hutaka, ninyi mtahiriwe, wapate kujivunia miili yenu.

¹⁴Lakini mimi sitaki kujivuna, isipokuwa kwa ajili ya msalaba wake Bwana wetu Kristo, maana mlemle mimi nimefiwa na ulimwengu, nao ulimwengu umefiwa na mimi mlemle.[#1 Kor. 1:31; 2:2.]

¹⁵Kwani ukiwa naye Kristo Yesu, kutahiriwa siko, wala kutotahiriwa siko, ila kuwa kiumbe kipya ndiko.[#Gal. 5:6; 1 Kor. 7:19.]

¹⁶Nao wote wanaoendelea na kujipingia hivyo na watengemane, upole uwakalie pamoja nao Waisiraeli wa Mungu![#Sh. 125:5.]

¹⁷Basi, tangu sasa asionekane atakayenisumbua tena! Kwani mwilini mwangu mimi ninayo makovu ya Yesu.[#2 Kor. 4:10.]

¹⁸Upole wa Bwana wetu Yesu Kristo uzikalie roho zenu, ndugu! Amin.